Números 18:1-32
18 Icantiri Tasorentsi Aarón:
“Aviro aisati pitomipee jeri maaroni ishanincapeeni Leví, cantacaajeitearone paitarica pantaque caari noninti aca Nonantariqui. Iro cantaincha apaniro aviro aisati pitomipee, irio cantacayerone paitarica irantajeitaque caari noninti irantaveetimente
2 Ocameetsati iramitacojeitempi itsipapee pishaninca Nonantariqui otiminta Nocantacantiri. Iro cantaincha eiro yantirotsi paitapeerica timatsiri Nonantariqui aisati altariqui, icamajeiticari aisati avirori.
3 -
4 Ocameetsati iramitacojeitempi apaniro ishanincasanoripeeni Leví, irantayetero nocoacaayetiriri. Eiro yamitacotashitimpitsi pashinisati.
5 Avirojeitaque nocoacaasanotaqueri pantaveete Nonantariqui aisati altariqui, eiroquea noquisajeitantaritsi pishanincapee.
6 Nonashitacaajeitacari pishanincapee iramitacojeitantempiri irantaveejeite Pancotsiqui papatotimentantanari.
7 Avintiquea aisati pitomipee, avirojeitaque antaveetatsine altariqui aisati tsompoina oticaashiroqui Nonantari. Avirotaque nocoacaasanotaqueri pantaveetatimentero. Jaanicarica coashitachari inquempetempi, aitaque incamaque.”
Iraayeteri antaveeyetatsiri aisati amitacojeitiriri.
8 Aisati icantiri Tasorentsi Aarón:
“Nopajeitaquempiro maaroni yamayetanari pishanincapee pamenantearori aisati poancanari altariqui, nonashitacaasanotacari. Irotaque pashi aisati pitomipee oca nocantacantiri, oncantaitatiyempani.
9 Irotaque pashijei: yamayetanari pishanincapee pitaapiniyetanari, ora ivanquirepee aisati yoimentirori caari cameetsatatsi iroorica yamimentirori icantacaari. Maaroni oca nonashitacaari, ocameetsatasanotaque; irotaque pashiteari aisati iriori pitomipee.
10 Maaroni shirampari picarajeitiri, ocameetsati poajeitearo aca oyaiteriqui Nonantari; tempa nonashitacaasanotacaro ocameetsatasanotaque.
11 “Aisati nopaquempiro yamayetanari pishanincapee inashitacaanari, irotaque poacayeariri pitomipee jero pishintopee saviquimotimpiri. Ocameetsati iroyearo iriori. Oca nocantacantiri, oncantaitatiyempani. Jaanicarica pishanincasanori oameetsatatsari, iriotaque oyearoneri.
12 Aisati nopaquempiro ivanquirepee pishaninca intarori oitsoquiyeti, yamapiniyetanari aparopeequi osarentsi: ora cameetsajatasanotatsiri quejitsi aisati ovaja jero cameetsavanetasanotatsiri tirico.
13 Aisati oquempetaca intaantarori oitsoquiyeti yaviiyetiri ipapinitanari, irotaque pashijeiteari. Jaanicarica pishanincasanori, oameetsatatsari, iriotaque oyearoneri.
14 Maaroni yamayetiri pishanincapee inashitacaayetanari, irotaque pashiyeteari avirori.
15 “Maaroni jivatatsiri itimi itomipee pishaninca aisati jivayetatsiri itimi ivira yamayetanari, iriotaque pashijeiteari. Irintiquea yora itomi jivayetatsiri itimi, ocameetsati impinacoventajeri irantajeariri. Aisati inquempetaqueri iriori jivatatsiri itimi ivira caari yoyeeta.
16 Irantajeariri omoncaratapaaquearica aparo iyashirite itimantari incarate 5 imentaqui plata, moncaratachari timatsiri Nonantariqui.
17 Eiro pishinecoventiritsi irayeetajeri jivayetatsiri itimi vacajaniqui, ovisha, iriorica chiivo. Tempa icashiacaasanotaquenari, icameetsatasanotaque; iriotaque poyenari; aisati iriraja pisaitero altariqui, jero ireji pintayero. Irotaque noneacameetsajencatasanotiri.
18 Ora ivatsa irotaque pashi avirori aisati ineji jero ivori iracosanoriquiniri pinashitacaanari,
19 Maaroni ipayetanari pishanincapee inashitacaanari, nopaquempiri poacaajeiteariri pitomipee, pishintopee saviquimotimpiri. Oca nocantacantiri oncantaitatiyempani. Irotaque nocantaqueri noncarajeitempi, aisati iriori pishanincajeitajeari. Eiro opashinititsi, oncanteani.”
20 Icantiri aisati Tasorentsi Aarón:
“Aviro, eiro otimitsi piipatsite pashitasanoteari iquempejeitaca itsipapee pishaninca. Narotaque pashitempirone pashijeiteari.
21 Aisati iriori itsipapee ishanincasanoripee Leví, nopaarantaqueri ivanquirepee pishaninca yamayetanari. Irotaque ovinaro yantaveetana Pancotsiqui papatotimentantanari.
22 Yora ishanincajeitaniri Israel eiro iquempejitarotsi Novanco, tempa ari irantaquero caari cameetsatatsi, icamajeiticari.
23 Apaniro irantaveete Pancotsi yapatotimentantanari, ishanincapeeni Leví. Aisati iriotaque cantacayearone paitarica irantayetaque. Oca nocantacantiri, oncantaitatiyempani, eiro otimitsi iipatsite pishanincajeitajeari coajica.
24 Tempa nopaarantajeitaqueri ivanquirepee pishanincasanori yamayetanari. Irotaque nocantantacari: Eiro otimitsi iipatsitesanori iipatsitepeequi pishanincasanori.”
25 Ari icantiri iriori Moiseshi:
“Pincanteri ishanincapeeni Leví: Ariorica yaapinitiro panquirentsi nopaqueriri, yamaarantanari pishanincapee, ocameetsati irinashitacayena capichaji impajenari.
26 -
27 Irotaque irinashitacaapinitenari, inquempetacantero yamaarantapinitanari pishanincapee ivanquire tirico aisati ovaja.
28 Maaroni impaarantayeteriri pishanincapee, ocameetsati irinashitacayena cameetsatasanotatsiri, aisati imperi antaveetatsiri Aarón.
29 -
30 “Pincanteri aisati: Ariorica irinashitacaaquenaro cameetsatasanotatsiri, ora pashinipee inquempetacantajero iro irashi itiricote aisati ovaja,
31 ocameetsati iroajeitearo aisati ishanincapee jaocarica intimeri. Tempa irotaque ovinaro yantaveetana Pancotsiqui papatotimentantanari.
32 Ariorica irinashitacaaquenaro cameetsatasanotatsiri, impoiji ocameetsati iroajeitearo pashinipee, eiro otimitsi irantane. Aitaque oncanteari eiro icaariperotantarotsi inashitacaanari pishanincapee, aisati eiro icamajeitantatsi.”
