Números 20:1-29
20 Ari ishoncapaaja cashiri intanajarori osarentsitantajeari, yareetantacarori ishanincajeitaniri Israel caaraiteriqui Sin. Isavicajeitapaaque osamani nampitsiqui Cadés, ari ocamaqueri María, aitaque itijeetaquerori.
2 Yora ishanincapee tecatsi iraajeitero nija, irosati yapatotimentantacari Moiseshi jeri Aarón, icantajeitiri:
—¡Cantenane ancamajeititaqueame antsipataquearime pashinipeeni ashaninca yoamaajeitaqueri Tasorentsi!
3 -
4 ¿Paitaquea pamajeitantaquenari aca caaraiteriqui? ¿Picoaquempa noncamajeite aisati iriori novirapee?
5 ¿Paitaquea paajeitantajatanari nosavicajeiveitani Egiptoqui, pamajeitaquena ocovencaiteapaica? Tecatsi ampanquiveetanteari, te aneeroji iyeramashi, ovamashi, granaropee, ¡aisati te aneimateroji nija irajeiteri!
6 Iquemantacariri Moiseshi jeri Aarón, irosati inijantareantanacari ishanincapee, ijatanaque iqueantapinitaroriqui Pancotsi yapatotimentantariri Tasorentsi, yoivojeitapaaca quipatsiqui. Irosati oconijatimotantapaacari ishipaquireane Tasorentsi.
7 Ari icantiri Tasorentsi Moiseshi:
—Payero pinchaquiire, pincanteri pirenti iramitacotempi pampatojeiteri pishanincapee. Impoiji ponijaacaajeiteari pineanatero imperita. Pineavaquero nija osotoaajatanaque irirajeitavaqueri aisati iriori ivirapee.
8 -
9 Ari imataquero Moiseshi icantaqueriri Tasorentsi, yaaquero irinchaquiire timatsiri Inantariqui Tasorentsi. Irosati yapatojeitantacari ishanincapee otimaquenta imperita. Iquisatsataqueri icanti:
—¡Pinquemajeite, piatsajeitachari. Ariompa nosotoaajatacaaquero nija imperitaquica, nompantempiri pirajeiteri!
10 -
11 Icantantanacari Moiseshi, yoancanaquero irinchaquiire ipasatantacaro, apite yapiitaquero. Ari osotoaajatanaque nija, irosati irajeitantavaca atiripee aisati ivirapee.
12 Iro cantaincha icantiri Tasorentsi Moiseshi jeri Aarón:
—Avirojei, te pishirejeitenaji aisati ponijaacaajeitacari pishanincapee nocameetsatasaanoti aisati te pimpincatsatenaji, eiro meeca pareetacaajeitaritsi quipatsiqui nocashiacaavetaquempiri.
13 Irotaque nija sotoaajataintsiri Meribáqui, icantimajeitantacariri ishanincajeitaniri Israel Tasorentsi, aisati yonijaajeitaqueri icameetsatasanoti.
Te irishineteri Edomosati ishanincajeitaniri Israel inquenajeitanaque inampiqui.
14 Ainiroquera isavicajeitaque nampitsiqui Cadés, yora Moiseshi itiancaque canterine pincatsaritatsiri Edomaqui:“Icantimpi pishanincapee, yora ishanincajeitaniri Israel: ‘Piotacojeitaquena oshequi opomerentsitimojeitaquena avishimotaquena paitapeerica.
15 Yora intacantajeitaqueerini ijajeitaque Egiptoqui, aitaque isavicajeitaqueri oshequi osarentsi. Iro cantaincha yora egiptosati oshequi yoashinoncaajeitaquena, iquempejeitaqueri intacantajeitaqueerini.
16 Impoiji naventajeitacari Tasorentsi, iquemaquena nocavintsaajeitaca. Ari itiancaqueri inampire yaajeitajana Egiptoqui.“ ‘Jerocana meeca nosavicajeitapaaque nampitsiqui Cadés, ovecaratapaaca piipatsite.
17 Nocoajeiti pishinejeitena nonquenajeitanaque piipatsitequi. Eiro noquenimojeitanaquerotsi otimayetinta pivanquirepee, aisati povamashitepee, aisati eiro niritajeitanaquempirotsi pinijatepee piquianayetiri. Apatiro nonquenantajeitanaquearo avotsi iquenantapiniyeetari. Eiro noquenashiveetanacatsi irosati navisantanaquearo piipatsite.’ ”
18 Iro cantaincha icantavaqueri pincatsaritatsiri Edomaqui:“¡Te noncoyeji pinquenajeitapee noipatsitequi, ario nomanajeitavaquempi!”
19 Ari icantasanovetari:“Ainti nonquenajeitanaque avotsiqui iquenantapiniyeetari. Ariorica nirajeitanaquero pinijate piquianatiri aisati iriori novirapee, ario nompinajeitanaquempi. Apatiro nonquenajeitanaque piipatsitequi.”
20 Iro cantaincha icantasanotiri pincatsari:“¡Eiro piquenajeitapaitsi!”
Irosati ipocashijeitantacari, yamajeitaqueri manajeitachari neaperotasanojeitachari, iroimpiajeitantavaqueariri. Te incoyeji catsini irishinejeiteri inquenajeitanaque iipatsitequi. Irosati iquenajeitantanaca ishanincajeitaniri Israel otsipaqui avotsi.
21 -
Icamantacari Aarón.
22 Ari yovaajeitanaja, yojocanajiro nampitsi Cadés, yareejeitacaro toncaari Hor, ovecaratapaaca quipatsi Edom. Ari icantiri Tasorentsi Moiseshi jeri Aarón:
23 -
24 “Yora Aarón aitaque incameri aca, eiro yareetarotsi quipatsi nocashiacaaqueriri pishanincapee. Tempa pipiatsajeitaquena Meribáqui osotoaajatantanacari nija. Te pinquemisanteroji nocantavetaquempiri.
25 Meeca paanaqueri Aarón aisati itomi Eleazar toncaariqui Hor, ari pisapocarerori iitsaare yantaveetacairi, pinquitsaatajeri Eleazar. Aitaque incameri Aarón.”
26 -
27 Ari imataquero Moiseshi icantaqueriri Tasorentsi, ineajeitavaqueri ishanincapee itoncaajeitanaquero toncaari Hor. Ari isapocapaaqueri iitsaareni Aarón yantaveetacairi, iquitsaatajiri Eleazar. Aitaque icamaqueri toncaariqui. Ari yoirincapaaja Moiseshi aisati Eleazar.
28 -
29 Iquemajeitantacari ishanincapee camaque Aarón, iraacojeitaqueri ocarataque 30 quitaiteri.
