Números 21:1-35
21 Yora pincatsari canaaneo savicatsiri nampitsiqui Arad néguebiquiniri, iquemacotaqueri ishanincajeitaniri Israel iquenajeitapaaquero avotsiqui Atarim. Ari ijatashijeitaqueri imanajeitavaqueri, yaarantajeitavaqueri aparopee ishaninca.
2 Impoiji icantasanotaqueri ishanincajeitaniri Israel Tasorentsi: “Ariorica pamitacotaquena nomanajeiteri savicajeitatsiri nampitsipeequi, aitaque nontsoncasanojeitaquero maaroni inampipee.”
3 Ari iquemaquero Tasorentsi icoacotaqueriri, irosati imatacantacari itsoncajeitaqueri maaroni canaaneopee aisati iroori inampipeeni. Impoiji ipajitaquero nampitsi Hormá.
Yoatiacotaquero Moiseshi bronce ishiacantaqueri maranque.
4 Ari yojocanajiro ishanincajeitaniri Israel toncaari Hor, iquenajeitanajiro jatantachari incajarequi Quitioncari. Ishoncajeitanaja eiro iquenantatsi quipatsiqui Edom. Ari nianqui te iramavejeitanajero, ishemajeitanaca.
5 Irosati icantimajeitantajari Tasorentsi aisati Moiseshi, icantajeitiri:
—¿Paitaquea paajeitantajantanari Egiptoqui? Poamaacantajeitantenari meeca aca caaraiteriqui. Te aneimateroji nija aisati noajeiteari. ¡Aashireajeitapaaquena oca oanarontsi, te anquemajeitearoji!
6 Irosati itiancantacanari Tasorentsi maranquepee quepiatasanoyetatsiri, yatsicajeitapaaqueri; oshequi catsini camajeitaintsi.
7 Ari ijatashijeitaqueri Moiseshi, icantapaaqueri:
—¡Te oncameetsateji nantajeitaqueri, nocantimataqueri Tasorentsi aisati nocantimataquempi avirori! ¡Pincanteri Tasorentsi impeajerita maranquepeeca!
Irosati icantantajari Moiseshi Tasorentsi impeacotajeneri ishanincapee yantaqueri.
8 Ari icantiri iriori Tasorentsi:
—Povetsique aparo bronce pishiacantaqueri maranque, poaqueri overaapaaca inchaquii, impoiji poatiacotaqueri. Ariorica iramenajeri yatsicayetaqueri, aitaque iravisacotaje.
9 Ari imataquero Moiseshi yovetsicaque bronce ishiacantaqueri maranque, yoaqueri overaapaaca inchaquii, yoatiacotaqueri. Ariorica yamenajeitajiro yatsicayetaqueri yavisacojeitanaji.
Oshequi yovaapinijeitaca aisati yareeyetaca.
10 Ari yovaajeitanaja ishanincajeitaniri Israel, irosati isavicajeitantapaaca Obot.
11 Impoiji yovaajeitanaja aisati, isavicajeitapaaque Ijé-abarim anta caaraiteriqui moabaquiniri iquenapai catsirincaiteri.
12 Ari yovaanaja aisati, irosati isavicajeitantapaaca osanteniqui Zéred.
13 Impoiji yovaajeitanaja aisati, irosati isavicajeitantapaaca intatiquero nija Arnón. Ora nija oponeaca caaraiteriqui, oquenaajatanaque iipatsitequi amorreopee; irotaque overantari iipatsite moabitapee aisati iriori amorreopee.
14 Irotaque ocantacotiri sanquenarentsi imanatavacantari irashi Tasorentsi.“Aquenajeitanaque nampitsi Vaheb, quipatsinta Sufáquiniriosantenipeequi aisati nijaqui Arnón,
15 irosati otsapijapeequi osantenipeeareejatachari nampitsiqui Ar,irosati overapaaca nampitsi Moab.”
16 Ari iponeajeitanaja nijaqui Arnón irosati yareetantacaro Beer (aitaque ontimeri quianarentsi), icantaquerinta Tasorentsi Moiseshi: “Pampatojeiteri pishanincapee, nompajeiterita nija.”
17 Aitaque ipampoyeaventajeitaquerori nija ishanincajeitaniri Israel:“¡Osotoaajatapaaque nija quianarentsiqui!¡Tsame ampampoyeacoventero quianarentsi!
18 ¡Yora jivatacantajeitatsiri iquianataqueroirinchaquiirequi ipincatsaritantari,yora irioperoyetatsiri isotoaajatacaaquero irinchaquiirequi!”
Ari yovaajeitanaja iponeanaja caaraiteriqui irosati Matanaqui.
19 Yovaajeitanaja aisati, irosati Nahaliel. Yovaanaja aisati, irosati Bamot. Impoiji yovaanaja aisati, irosati oirincaiteapai moabaquiniri, iquenajeitanaquero toncaariqui Pisgá, aitaque yamenacoyeetirori caaraiteri.
20 -
Imanajeitaqueri ishanincajeitaniri Israel pincatsari Sihón.
(Deut. 2.26-37)
21 Ari itiancaque Moiseshi aparopee ishanincajeitaniri Israel canterine Sihón ivincatsarite amorreopee:
22 “Nocoaque nonquenajeitanaque piipatsitequi, eiro nantitayetanaquempirotsi pipanquiyetiri poanepeequi, povamashite, aisati eiro niritayetanaquempirotsi pinijate piquianayetiri. Apatiro noanaquero avotsiqui piquenantapinitari, irosati navisantanaquearo piipatsite.”
23 Iro cantaincha yora Sihón te irishinejeiteriji inquenajeitanaque iipatsitequi. Irointi yapatojeitaqueri iratiritepee, ijatashijeitaqueri itonquiojeitavacari caaraiteriqui, yareejeitantapaacariri nampitsiqui Jahas, imanajeitapaaqueri.
24 Iro cantaincha ipiajeitavacari ishanincajeitaniri Israel, itsoncajeitavaqueri irinti. Irosati isavicajeitantapaaca iipatsiteniqui, oponeanaca nijaqui Arnón, irosati nijaqui Jaboc, timatsiri ovecaratapaaca iipatsite iriori ishanincapeeni Amón, otiminta inampipee tantotacotachari.
25 Aitaque ocantari isavicajeitantapaacaro ishanincajeitaniri Israel nampitsi Hesbón, inampipeeni amorreopee, jero pashinipee otsipanampiyetari.
26 Ora Hesbón, irotaque nampitsi isavicantaniri Sihón pincatsariventiriniri ishanincapee. Yora Sihón imanajeitaqueri intaroniri ipincatsariti ishanincapeeni Moab, yaitajeitaqueri maaroni iipatsite irosati nijaqui Arnón.
27 Irotaque icantajeitantari pampoyeincaripee:“¡Pimpocajeitanaque nampitsiniqui Hesbón,inampini pincatsari Sihón!¡Povetsicasanojeitajero aisati cameetsa,onquisotasanotanteari!
28 Oponeanaca nampitsiqui Hesbón, inampi Sihón,amorecanaque paamaritatsiri;otsoncajeitaquero nampitsi Ar, anta quipatsiqui Moabaisati savicajeitatsiniri catonco nijaqui Arnón.
29 ¡Avirojei ishanincapeeni Moab,oshequi pashinoncaajeitaca!¡Peajeitaquempi, pincatsatiriri pijitasorentsitane Quemós!Ishinejeitaqueri patiritepee ishiajeitanaca.Ora pijinapeeni yaajeitanaquero pincatsari Sihón.
30 Iro cantaincha otsoncajeitaca inampipeeni ipincatsariventiniri:Hesbón, Dibón, Nófah, irosati Medebá;opeajeitaca maaroni.”
Itsoncajeitaqueri ishanincajeitaniri Israel Og, pincatsariventironiri nampitsi Basán.
(Deut. 3.1-11)
31 Aitaque ocantari yora ishanincajeitaniri Israel yaajeitaquero iipatsite amorreopeeni.
32 Aisati yora Moiseshi itiancaque aparopee shirampari amenanonterone nampitsi Jazer. Ari imanajeitaquero nampitsipee tsipanampiyetarori, yojocajeitaqueri ishanincapeeni amorreo savicantajeitaroniri.
33 Impoiji ipiajeitanaja, iquenajeitanajiro nampitsiqui Basán. Iro cantaincha yora pincatsiri Og yapatojeitaqueri maaroni manajeitachari carajeitiriri, ijatashijeitaqueri nampitsiqui Edrei imanajeitavaqueri.
34 Ari icantiri Tasorentsi Moiseshi: “Eiro pitsaroacaajeitaritsi, aitaque namitacojeitaquempi pintsoncajeiteri maaroni manajeitachari aisati paajeitero iipatsitepee. Piquempetaqueri Sihón, ishanincani amorreo, pincatsaritatsiniri anta nampitsiqui Hesbón.”
35 Ari imataquero ishanincajeitaniri Israel yoajeitaqueri Og jeri itomipeeni aisati maaroni manajeitacharini. Tecatsi aparoni timanajantsine, irosati yaajeitantacaro iipatsiteni.
