Números 22:1-41
22 Yora ishanincajeitaniri Israel yovaajeitanaja aisati, isavicajeitapaaque opampaiteapai moabaquiniri. Imontetacotapaacaro nija Jordán aisati Jericó.
2 Yora Balac, itomi Sipor iquemacoyetaqueri ishanincajeitaniri Israel yoajeitaqueri amorreopee.
3 Aisati iriori ishanincapee itsaroacaasanojeitacari, ineajeitaqueri oshequi catsini inajeiti.
4 Ari icantajeitiri jivatacaajeitiriri madiánasati: “Yonta atiripee ari intsoncajeitapaaquero aipatsite iraajeitapaaquero, iquempetacari vaca itsonquiro paashitomashi.”
Yora Balac iriotaque pincatsariventiriri ishanincapee.
5 Ari itiancaque camanterine Balaam, itomi Beor savicatsiri nampitsiqui Petor, quempejitarori nija Éufrates, quipatsiqui Amav. Jero icantavaqueriri incantapeeriri Balaam:“Yareejeitapaaca oshequi quenapaatsiri Egiptoqui, itsoteapaaquero maaroni nampitsipee. Meeca isaviquimojeitapaaquena aca.
6 Pimpocanaqueta intsipaite pamitacotena, poamaimateri nomatanteariri noimpiajeitavajeri noipatsitequi. Tempa oshequi ineaperotasanojeitaca, yanaacojeitaquena nainti. Niotacotimpi paitarica pincanteri cameetsatatsiri, ari omataquea. Aisati ariorica pincantacanteri imatsiyeeteri, ari omataquea.”
7 Yora jivatacaajeitiriri ishanincapee aisati madiánasati ijajeitaque, yaanaque quireequi impinacoventerori irimatsitacanteri. Yareetantacari isaviquinta Balaam, icamantapaaqueri icantavaqueriri Balac.
8 Ari icantavaqueri Balaam:
—Pimaanaquetsita aca, nonquemisantavaquerita Tasorentsi paitarica incantenari.
Ari imaimojeitanaqueri.
9 Ari iconijatimotaqueri Tasorentsi Balaam tsiteniriqui, isampitiri:
—¿Jaoca iponeari yora pitsipajeitacari?
10 Yacanaqueri Balaam:
—Yora Balac, itomi Sipor, pincatsaritatsiri anta nampitsiqui Moab, itiancaqueri. Icamantana yareejeitapaaca oshequi catsini atiri poneajeitachari Egiptoqui, itsoteapaaquero maaroni nampitsipee. Meeca icoi Balac nojate intsipaite nomatsitacanajeiteri, irimatanteariri iranaacojeiteri, iroimpiajeitantajeariri iipatsitequi.
11 -
12 Ari icantanaqueri Tasorentsi Balaam:
—Eiro poijatanaqueritsi, aisati eiro pimatsitacantiritsi yora atiripee; tempa notasoncaventajeitaqueri.
13 Ari oquitaiteamanaji itinaamanaja Balaam, icantiri itiancane Balac:
—Pimpiajeitanajero pinampiqui. Te incoacayenaji Tasorentsi noijatanaquempi.
14 Irosati ipiajeitantanaja. Ari icantapaaqueri Balac:
—Te incoyeji impoque Balaam.
15 Iro cantaincha aiquero itiancatii Balac pashini jivatacantajeitatsiri, icarajeitanaque oshequi irioperoyetatsiri. Te inquempeteariji javeitachari.
16 Ari ijajeitanaque, yareejeitantapaacari icantapaaqueri:
—Icajemacantimpi pincatsari Balac, itomi Sipor; icanti:
“ ‘Pimpocanaqueta, eiro piquisotanaquetsi.
17 Ari nompaquempi antearoite pinatasanotachari. Ario nomataquero maaroni paitarica pincantenari. Nocoi intsipaite pimpocanaque pimatsitacanteri atiripee.’ ”
18 Ari icantanaqueri Balaam:
—Ariorica irimavetaquearo Balac impaquenari maaroni oro, plata timatsiri ivincatsarimentoqui, eiro nomatirotsi catsini nantashitearo narori caari icoacaana Novincatsarite Tasorentsi.
19 Pimaanaquetsita avirori, nonquemisantavaqueritsita Tasorentsi paitarica incantajenari aisati.
20 Ari tsiteniriqui iconijatimotajiri Tasorentsi Balaam, icantiri:
—Avirorica ipocashitiri yocapee, pijate poijajeitanaqueri. Iro cantaincha panteroyea paitarica noncantempiri.
Inijaacari inampire Tasorentsi Balaam.
21 Ari oquitaiteamanaque itinaamanaca Balaam, yovetsicaquero iraashinote. Iquijacotacaro, yoijajeitanaqueri itiancane Balac; itsipatanacari apite inampire.
Iro cantaincha iquisaqueri Tasorentsi Balaam; tempa ijataque. Itiancaqueri inampire iticaavaqueri nianqui avotsi.
22 -
23 Oneantapaacariri iraashinote inampire Tasorentsi, icatiaca nianqui avotsiqui yajiricaque isavirite; impoiji otempacaanaqueri caraiteriqui. Irosati ipasatantacaro ompiacantajeariri avotsiqui.
24 Impoiji icatiapaaja inampire Tasorentsi avotsiqui nianqui avitencatachari otiminta ovamashipee montetavacachari, tantotacotachari mapipeequi.
25 Oneantajariri aashino inampire Tasorentsi, irosati oshenacacantanacari Balaam otantotacoroqui, otsinacaquiitantacari iitiqui. Irosati ipasatantajaro aisati.
26 Ari ijivatanaji inampire Tasorentsi, icatiapaaja orijaniquitasanotapaaque; tecatsinta inquenaje intempaaje acaquerocapeequi.
27 Oneantajariri aisati iraashinote inampire Tasorentsi, irosati oponaacantanacari quipatsiqui. Ari iquisasanotanaca Balaam, ipasatasanotaquero irinchaquiirequi.
28 Irosati ineanatacantacaro Tasorentsi aashino, ocantiri Balaam:
—¿Paitampa nantaqueri? Mavatanaque meeca pipasanataquena.
29 Ari icantanaquero Balaam:
—Orate paita pantavintsatantaquenari. Ontimaqueme cotsiro, noaquempime meeca.
30 Ocantanaqueri iroori:
—Tempa narotaque paashinote, piquijaacotapinitari irosati meeca. Piotana te nomperatimatempiji.
Yacanaquero Balaam:
—Queario picantaque.
31 Irosati inijaacantacari Tasorentsi Balaam inampire icatiaca avotsiqui nianqui yajiriqui isavirite. Ari yoivotashitanacari irosati quipatsiqui.
32 Yora inampire Tasorentsi icantiri:
—¿Paita pipasatantacarori mava paashinote? Narotaque ticaavaquempiri piquenapaaquenta. Te noneacameetsateroji pijatashiteri.
33 Ora aashino oneaquena, irotaque ocoquitacantaquempiri ocarataque mava. Eirome ocoquitacaimpime, aitaque noavaquempime. Irointiquea eiro noirome.
34 Ari icantanaqueri Balaam inampire Tasorentsi:
—Queario, nantaquero caari cameetsatatsi. Te nioteji aviro ticaavaquenari avotsiqui. Teerica oncameetsatimotempi nojate, ari nompianaje.
35 Iro cantaincha icantiri inampire Tasorentsi:
—Poijajeitanajeriqueti atiripee. Irointiyea pincantaque paitarica noncantempiri.
Irosati yoijajeitantanacari.
Balac yaacameetsatavaqueri Balaam.
36 Iquemacotantavacariri Balac nianquitaque Balaam, irosati ijatantanaca nijaqui Arnón, overapaaca iipatsite, itonquiotavacari.
37 Icantavaqueri:
—Piquemaque nocajemacantavetaquempi ¿paita caari pipoquitanta intsipaite? ¿Pijitimpa eiro nomatirotsi nompempiro cameetsatasanoyetatsiri?
38 Yacanaqueri Balaam:
—Je, pocaquena meeca nonempi. Iro cantaincha tecatsi noncantea nomatero nantashitearo nocoiri, apatiro noncamantempiro paitarica incantenari Tasorentsi.
39 Irosati yoijatantanacari anta Quiriat-Husot, iroacantanteanariri Balac vacapee jeri ovishapee, iraanaqueneri Balaam jeri jivatacantayetatsiri icarajeitaqueri.
40 -
41 Ari oquitaiteamanaque yora Balac yaanaqueri Balaam toncaariqui Bamot-baal, oconijaiteapainta yamenacojeitantacariri ishanincajeitaniri Israel isavicajeitapaaquenta.
