Números 23:1-30
23 Impoiji icantiri Balaam:
—Povetsicacante aca 7 altaripee; impoiji poacante 7 vacajaniquipee, aisati 7 anteari ovisha.
2 Ari imataquero Balac icantaqueriri Balaam. Icarataque itaayetaqueri aparopeequi altar apite: aparo vacajaniqui aisati aparo ovisha anteari.
3 Ari icantiri Balaam Balac:
—Pisaviquimotavaquerita ataaqueri, namenavaquerita Tasorentsi ariorica ironijaaquena. Impoijiquea noncamantapempiro paitarica incantaquenari.
Irosati ijatantanaca otishiqui ocaaraiteapai.
4 Ari yonijaacari Tasorentsi. Icantiri:
—Novetsicacantaque 7 altaripee aisati notaacantaque aparo vacajaniqui aisati ovisha aparopeequi altar.
5 Irosati iotacantacari Tasorentsi Balaam incanteri. Ari icantajiri:
—Pimpianaje isavicaquenta Balac, pincantapeeri nocantaquempiri.
6 Ipiantanajari, ineapaajiri Balac icatiimotari itaaqueri, aisati itsipajeitacari ishanincapee jivatacantayetatsiri.
7 Irosati ineanatantanaca, icanti:“Noponeanacaro toncaariqui Aram iquenapai catsirincaiteri;icajemacantaquena Balac, ivincatsarite ishanincapeeni Moab.Icantana: ‘Pimpoque pamitacotenapimatsitacantajeiteri ishanincajeitaniri Israel,pincoacayeri irashinoncaajeitea.’
8 Iro cantaincha ¿paitampa noamaimatanteariricaari icoacai Tasorentsi irashinoncayea?Eiro nocoacairitsi irashinoncaajeitea;tempa te incoacayeriji Tasorentsi.
9 Meeca namenacotaqueri otishiquinoneajeitaqueri, yonta atiripee inashita isavicajeiti,te inquempejeiteariji pashinipee nampitsipeequiniri.
10 Iquempejeitacaro ovane impanequi,¿Jaanica materone iriojeiteri jaoca icarajeitiri?¡Cantenane, noncamaquerica,nonquempeteari yontapee cameetsajeitatsiri.Ariorica noncamaque,nocoaque nonquempeteari irioripee!”
11 Irosati icantantanacari Balac:
—¿Paita pantiri? Tempa iro namantaquempiri pimatsitacantajeiteri quisajeitanari, irointi meeca picantacoventaqueri cameetsatatsiri.
12 Ari yacanaqueri Balaam:
—Tempa nocantitaquempi, paitarica incantenari Tasorentsi, irotaque noncanteri.
13 Iro cantaincha aiquero icantanaitiiri Balac:
—Tsame ajate aisati anta, teenta inconijateji maaroni. Apatiro pamenacojeiteri savicajeitapaintsiri acaqueroca. Iriotaque pimatsitacantajeiteri.
14 Irosati ijatacantacari toncaariqui Zofim, otishitapai Pisgá. Yovetsicacaapaajiri 7 altaripee; itaacantaqueri aparopee vacajaniqui aisati ovisha aparopeequi altar.
15 Ari icantajiri aisati Balaam:
—Pisaviquimotavaquerita ataaqueri, namenavajerita Tasorentsi.
16 Ari yonijaajari Tasorentsi, iotacaajiri aisati incanteri. Impoiji icantajiri:
—Pimpianaje isavicaquenta Balac, irosati pincantapeeri nocantaquempiri.
17 Ari ipianaja, ineapaajiri Balac icatiimotari itaaqueri virantsi, itsipajeitari jivatacantayetatsiri. Isampitavajiri:
—¿Jaoca icantimpi Tasorentsi?
18 Irosati ineanatantanaca Balaam, icanti:“Pinquemena, Balac, avirotaque itomi Sipor.
19 Yora Tasorentsi te inquempeteariji atiri caamanejeitatsiri;te intseeyempa, aisati te impashinitero iquenqueshiretiri.Paitarica icantiri, imataquero,paitarica icantasanotiri, imoncaratiro.
20 Icantasanotaquena nomatantearori noncantacoventante cameetsa;ariorica itasoncacoventanti Tasorentsi,eiro nomatirotsi narori nompiatsateari.
21 Te aneeroji irantane ishanincajeitaniri Israel.Quiso yoajeitiri Tasorentsi; iriotaque Ivincatsarite.
22 Iriotaque Tasorentsi amajeitajiriri Egiptoqui.Ipiacoventajeitaqueri iquempetari búfalo.
23 Tecatsi materine irimatsitacantayeeteri ishanincajeitaniri Jacob.Eiro imatirotsi iroashinoncayeri matsitantayevetachari ishanincajeitaniri Israel.Meeca ocameetsati ancanteri ishanincajeitaniri Israel:‘¡Oshequi catsini yonijaaquempiro Tasorentsi caari ineapiniyeeti!’
24 Yonta atiripee, ariorica intinaanaque,antearoite isareanta,iquempetacari anteariite maniti.Eiro yoipacaimatirotsi irosati iroantaqueari ivatsatsiteaisati iritaqueri iriraja.”
25 Irosati icantantanajari Balac:
—¡Teerica pimateroji pimatsitacantajeiteri yonta atiripee, irointiquea eiro picantacoventiritsi cameetsa!
26 Yacanajiri Balaam:
—¡Tempa nocantaquempi, paitarica incantenari Tasorentsi, irotaque noncanteri!
27 Irosati icantantanajari Balac:
—Tsame ajate aisati anta. Arioyeata incoacayempiri Tasorentsi pimatsitacanteri ishanincajeitaniri Israel.
28 Ari yaanajiri aisati anta otishitapai toncaari Peor, yamenacotapaaquero maaroni caaraiteri.
29 Icantajiri aisati Balaam Balac:
—Povetsicacantaje aca 7 altaripee aisati poacantaje 7 vacajaniqui aisati 7 ovisha.
30 Ari imataquero Balac icantaqueriri, yoacantaque aparopeequi altar, aparo vacajaniqui aisati aparo ovisha.
