Números 27:1-23
27 Otimi irishintopeeni Selofhad, opajita Mahlá, Noá, Hoglá, Milcá jero Tirsá. Irotaque ishanincapeeni Manasés, itomini José.
2 Ocaratanaquero ireentopee ojatanaque Pancotsiqui apatotimentantariri Tasorentsi oquenquetsatacairi Moiseshi, Eleazar jeri jivatacaayetiriri ishanincapee. Ocantapaaqueri:
3 “Icamaque apani caaraiteriqui, te incarateriji Coré piatsatacariri Tasorentsi. Icamashitaca, icamimentaquero irantane iriori. Te intimeji itomipee.
4 Iro cantaincha omavetaquea te intimeji itomi, te oncameetsateji ompempa ivajiro ishanincapee apani. Nocoi meeca pimpajeitenaro narori quipatsi, iquempejeitaca pashinipee noshanincasanori.”
5 Irosati iquenquetsatacantacari Moiseshi Tasorentsi, icamantaqueri ocantaqueriri tsinane. Ari yacanaqueri, icantiri:
6 -
7 “Cameetsataque ocantaqueri irishintopeeni Selofhad. Ocameetsati pimpero quipatsi yashiyetaniri iri, onquempejeitearita ishanincasanoripeeni.
8 Aisati pincamanteri pashinipee pishaninca: Ariorica incamaque shirampari, teerica intime itomi, irointi irishinto, irotaque aajerone yashiyetaniri iri.
9 Irompa teerica ontimeji irishinto, ocameetsati iraajero irirentisanoripee.
10 Aisati teerica intimeji irirentipeeni, ocameetsati iraajero iriritsoripee.
11 Irompa teerica intimeji iriritsoripee, ocameetsati iraajero ishanincasanoripee. Oca nocantaquempiri, irotaque nocantacantiri, irimoncarajeiteri maaroni pishanincapee.”
Icoyeaqueri Josué poyetajearine Moiseshi.
(Deut. 31.1-8)
12 Ari icantiri aisati Tasorentsi Moiseshi:
—Pintoncaanaque toncaariqui Abarim pamenacoyetero maaroni quipatsi intatiqueropeequi, irotaque nompajeiteriri pishanincapee.
13 Ariorica pineaquero, irosati pincamantaquea pincaratapaajeri pishanincapeeni, iquempetaca pirentini Aarón.
14 Tempa picarataqueri te pinquemisanteroji nocantavetaquempiri anta caaraiteriqui Sin, icantimajeitantaquenari pishanincapee. Te pinijaacaajeiteariji pimpincatsatena icoacotantaquenari nija.
(Iro icantacotiri nija sotoaajataintsiri anta nampitsiqui Meribá, nampitsiquiniri Cadés anta caaraiteriqui Sin.)
15 Ari icantanaqueri iriori Moiseshi Tasorentsi:
—Notasorentsite, aviro oaneiriri maaroni atiri, nocoi pincoyeaje aparo jivatacaajeitajerine maaroni yoca atiripee pishanincajeitacari, irijivajeitanajerita jaocarica, eiroquea iquenashiveetantanacatsi iquempetaricari ovisha caari timatsine shenterine.
16 -
17 -
18 Icantanaqueri Tasorentsi:
—Timatsi Josué, itomini Nun, timatsiri iotantari. Paanaqueri anta Eleazar, yora antaveetanari. Impoiji poanqueteneri paco iitoqui, irineajeitanteariri maaroni pishaninca. Aisati pincanteri irio jivatacaajeitanajerine, inquempetajempi avirori, impincatsajeitanteariri maaroni.
19 -
20 -
21 Ocameetsati irijatashiteri Josué antaveetatsiri Eleazar. Impoiji irayero Eleazar Urim inquenquetsatacantenari, niotacanteariri paitarica nocoacaaqueriri Josué iranteri. Iriotaque Josué cantajeiterine maaroni pishanincapee paitapeerica irantayeteri.
22 Ari imataquero Moiseshi icantaqueriri Tasorentsi. Yaanaqueri Josué antaveetatsiriqui Eleazar, aisati ineajeitaqueri maaroni ishanincapee.
23 Ari yoanquetaqueneri iraco Moiseshi iitoqui Josué, icantaqueri irijivatacantantajeari. Imoncarataquero icantaqueriri Tasorentsi.
