Números 28:1-31
28 Ari iquenquetsatacaajiri Tasorentsi Moiseshi, icantiri:
2 “Pincanteri pishanincapee eiro ipeacojeitarotsi iramapinitena tanta aisati itaapinitanari noneacameetsajencatasanotiri, omoncaratapinitearica nonashitacaari quitaiteri inquimoshireventapinijeitantenari.
3 “Jeri iramapiniteri intayenari: apite ovisha moncarataquerori aparo irosarentsite caari amashitacha. Incanteani maaroni quitaiteripeequi intaapinitenari, impincatsatantenari.
4 Aparo intaamanaque, irio itsipa intaanajeri ishaaviniji.
5 Iramayetaque aisati 2 kilo cameetsavanetasanotatsiri tirico conoavatsatachari aparoni voteyaqui oreji oriva.
6 (Irotaque itaapinitiniriri toncaariqui Sinaí, ineacameetsajencatasanotiri Tasorentsi.)
7 Aisati iramayetaque aparoni voteyaqui ovaja, intsipataayetaqueri aparopeeni ovishajaniqui. Ocameetsati irisacotero Nonantariqui, impincatsatantenari.
8 Impoiji intayeri pashini ovisha ishaaviniji, inconoaqueri cameetsavanetatsiri tirico jero ovaja inquempetacantaqueri intaamanaqueri. Irotaque oca noneacameetsajencatasanotiri intaapinitenari impincatsatantenari.
Iramayeteri quitaiteriqui imaoreajeitantari.
9 “Areetapinitearica quitaiteri imaoreajeitantari, ocameetsati iramayetaje apite ovisha moncarataquerori aparo irosarentsite caari amashitacha, aisati 4 kilo cameetsavanetasanotatsiri tirico conoavatsatachari quejitsi aisati ovaja.
10 Iriotaque intaapinitenari quitaiteripeequi imaoreantari. Aisati intsipataaqueri intaapinitenari maaroni quitaiteripeequi.
Iramapiniteri cashiripeequi.
11 “Aisati oquempeta maaroni cashiripeequi intanajarori quitaiteri, ocameetsati iramayete intaasanotenari: apite irijani vaca, aparo ovisha, aisati 7 irijani moncarataquerori aparo irosarentsite caari amashiyetacha.
12 Aisati iramaque 6 kilo cameetsavanetasanotatsiri tirico conoavatsatachari quejitsi, intsipataayetaqueri aparopeequi vacajaniqui. Aisati inquempetaqueri aparopeeni ovisha, intsipataayetaqueri 4 kilo tiricovane conoavatsatachari quejitsi.
13 Aisati iriori aparopeeni ovishajaniqui, intsipataayetaqueri 2 kilo tiricovane conoavatsatachari quejitsi. Irotaque intaasanotenari noneacameetsajencatasanotiri impincatsatantenari.
14 Aisati intsipataayetaqueri aparopeeni vacajaniqui apite voteyaqui ovaja. Aisati aparopeequi ovisha intsipataayetaqueri aparoni voteyaqui iro otsipa nianqui. Aisati iriori aparopeequi ovishajaniqui, intsipataayetaqueri aparopeeni voteyaqui. Irotaque iramapiniteri cashiripeequi intaasanotenari maaroni osarentsipeequi.
15 Ariorica intayenari quitaiteripeequi, ocameetsati iramaque aparo chiivo iroimenterori caari cameetsatatsi intsipataaqueri ovaja.
Iramayeteri areetapinitearica Yavisantaniri.
(Lev. 23.5-8)
16 “Aisati ariorica omoncaratapinitea 14 quitaiteri irio cashiri intanajarori osarentsi, ocameetsati inquimoshireventajeitero Yavisantaniri impincatsajeitantenari.
17 Iro onquitaiteamanaque 15 inquimoshirejeitanteari, oncarate 7 quitaiteri iroapinijeitearo tanta caari conoacha tapiacaarori.
18 Irintantanaquearori irampatojeitea eiro yantaveejeitajitsi maaroni.
19 Iramayetaque intayenari apite vacajaniqui, aparo anteari ovisha, aisati 7 irijani moncarataquerori aparo irosarentsite caari amashiyetacha.
20 Aisati iramaque tiricovane conoavatsatachari quejitsi, oncarayetaque 6 kilo intsipatayeriri aparopee vacajaniqui, aisati 4 kilo irashi ovisha, jero 2 kilo intsipatayeriri aparopeeni ovishajaniqui.
21 -
22 Aisati iramaque aparo chiivo iroimenterori caari cameetsatatsi yantayetiri, nompeacotantajeanariri.
23 Iriotaque iramayeteri maaroni yocapee intaapinitenari onquitaiteamanaque.
24 Aitaque incantajeiteari iramapinitena ovaja aisati intaapinitenari aparopeequi quitaiteri, irosati omoncaratanteari 7 quitaiteri iquimoshirejeitantari. Irotaque noneacameetsajencatasanotiri impincatsatantenari.
25 Ariorica omoncaratapaajea 7 quitaiteri irampatojeitajea, eiro catsini yantaveejeititsi quitaiteriqui maaroni.
Iramayeteri intarori oitsoquiyeti ivanquirepee.
(Lev. 23.9-22)
26 “Aisati ariorica omoncaratea quitaiteri inquimoshireventantearori ivanquirepee iroaquera yaviiyeti, avisanaque 7 tomincopee, ocameetsati irampatojeitea inquimoshireventajeitantearori, eiro catsini yantaveejeititsi quitaiteriqui.
27 Iramajeitaque intayenari noneacameetsajencatasanotiri apite vacajaniqui, aparo ovisha, aisati 7 irijaniqui moncarataquerori aparo irosarentsite.
28 Aisati iramayetaque tiricovane conoavatsatachari quejitsi oncarate 6 kilo intsipatayeriri aparopeeni vacajaniqui, aisati 4 kilo intsipatayeriri ovisha, impoiji 2 kilo intsipatayeriri aparopeeni ovishajaniqui.
29 -
30 Aisati iramaque aparo chiivo iroimenterori caari cameetsatatsi, nompeacotantajeanariri.
31 Iriotaque intayenari, intsipataayetaqueri ivanquirepee jero ovaja. Aisati intsipataqueri intaapinitenari maaroni quitaiteripeequi, eiro yamashitaritsi amashiyetachari.”
