Números 29:1-40
29 Aisati icantiri:
“Yora caratatsiri 7 cashiri intanajearoneri aparo quitaiteri, ocameetsati irampatojeitajea maaroni, inquimoshireventajeitero itiotanteetarori tiorentsi. Tecatsi catsini antaveejeitatsine.
2 Ocameetsati iramayetaque intayenari noneacameetsajencatasanotiri caari amashiyetacha, aparo vacajaniqui, aparo ovisha aisati 7 irijaniqui, moncarataquerori aparo irosarentsite.
3 Aisati iramayetaque tiricovane conoavatsatachari quejitsi oncarayetaque 6 kilo intsipatayeriri vacajaniqui. Aisati intsipatayeriri ovisha oncarate 4 kilo. Impoiji 2 kilo intsipatayeriri aparopeeni ovishajaniqui.
4 -
5 Impoiji aparoni chiivo iroimenterori caari cameetsatatsi yantayetiri, nompeacotantajeanariri.
6 Jeri aisati intaapinitenari aparopeequi cashiri aisati intaapinitenari quitaiteripeequi, intsipataayetaqueri ivanquirepee jero ovaja. Irimoncarataquero nocantaquempiri, irotaque intayenari noneacameetsajencatasanotiri impincatsatantenari.”
Iramayeteri impeacotantajeanariri Tasorentsi yantayetiri.
(Lev. 23.26-32)
7 Icantiri aisati: “Irisati cashiri caratatsiri 7, iro 10 quitaiteri, ocameetsati irampatotimentajena aisati maaroni pishanincapee, intijeitanteari. Tecatsi catsini antaveejeitatsine.
8 Iramayetaque intayenari noneacameetsajencatasanotiri cameetsatasanotatsiri, caari amashiyetacha, aparo vacajaniqui, aparo ovisha aisati 7 irijani moncarataquerori aparo irosarentsite.
9 Aisati iramayetaque tiricovane conoavatsatachari quejitsi oncarayetaque 6 kilo intsipatayeriri vacajaniqui. Aisati intsipatayeriri ovisha oncarate 4 kilo. Impoiji 2 kilo intsipatayeriri aparopeeni ovishajaniqui.
10 -
11 Impoiji aparoni chiivo iroimenterori caari cameetsatatsi yantayetiri. Aisati intsipataaqueri intaapinitenari quitaiteripeequi, aisati ivanquirepee jero ovaja.
Iramayeteri iroveshireimentantearori ivancoshetajaniquipee.
(Lev. 23.33-44)
12 “Aisati ariorica oncaratanaque 15 quitaiteri, irisati cashiri caratatsiri 7, ocameetsati irampatotimentajena. Tecatsi catsini antaveejeitatsine. Oncarate 7 quitaiteri inquimoshireventajeitero impincatsatantenari.
13 Irintanaquearo iramayetaque ivirapee caari amashiyetacha: 13 vacajaniqui, apite ovisha aisati 14 irijaniqui, moncarataquerori aparo irosarentsite. Iriotaque intayenari, noneacameetsajencatasanotiri.
14 Aisati iramayetaque tiricovane conoavatsatachari quejitsi, oncarayetaque 6 kilo intsipatayeriri vacajaniqui. Aisati intsipatayeriri ovisha oncarate 4 kilo. Impoiji 2 kilo intsipatayeriri aparopeeni ovishajaniqui.
15 -
16 Impoiji iramaque aparoni chiivo iroimenterori caari cameetsatatsi yantayetiri. Aisati intsipatayeri intaapinitenari quitaiteripeequi, aisati ivanquirepee jero ovaja.
17 “Iro apitetapaatsineri quitaiteri, iramayetaje aisati caari amashiyetacha: 12 vacajaniqui, apite ovisha aisati 14 irijaniqui, moncarataquerori aparo irosarentsite.
18 Aisati iramayetaque ivanquirepee jero ovaja irimoncarataqueri icarayeti vacajaniqui, ovishapee aisati irijaniqui, irimoncarataquero nocantaquempiri.
19 Impoiji iramaque aparoni chiivo, iroimenterori caari cameetsatatsi yantayetiri. Aisati intsipatayeri intaapinitenari quitaiteripeequi, aisati ivanquirepee jero ovaja.
20 “Iro mavatapaintsiri quitaiteri, iramayetaje aisati caari amashiyetacha: 11 vacajaniqui, apite ovisha aisati 14 irijaniqui, moncarataquerori aparo irosarentsite.
21 Aisati iramayetaque ivanquirepee jero ovaja irimoncarataqueri icarayeti vacajaniqui, ovishapee aisati irijaniqui, irimoncarataquero nocantaquempiri.
22 Impoiji iramaque aparoni chiivo iroimenterori caari cameetsatatsi yantayetiri. Aisati intsipatayeri intaapinitenari quitaiteripeequi, aisati ivanquirepee jero ovaja.
23 “Iro caratapaintsiri 4 quitaiteri, iramayetaje aisati caari amashiyetacha: 10 vacajaniqui, apite ovisha aisati 14 irijaniqui, moncarataquerori aparo irosarentsite.
24 Aisati iramayetaque ivanquirepee jero ovaja irimoncarataqueri icarayeti vacajaniqui, ovishapee aisati irijaniqui, irimoncarataquero nocantaquempiri.
25 Impoiji iramaque aparoni chiivo iroimenterori caari cameetsatatsi yantayetiri. Aisati intsipatayeri intaapinitenari quitaiteripeequi, aisati ivanquirepee jero ovaja.
26 “Iro caratapaintsiri 5 quitaiteri, iramayetaje aisati caari amashiyetacha: 9 vacajaniqui, apite ovisha aisati 14 irijaniqui, moncarataquerori aparo irosarentsite.
27 Aisati iramayetaque ivanquirepee jero ovaja irimoncarataqueri icarayeti vacajaniqui, ovishapee aisati irijaniqui, irimoncarataquero nocantaquempiri.
28 Impoiji iramaque aparoni chiivo iroimenterori caari cameetsatatsi yantayetiri. Aisati intsipatayeri intaapinitenari quitaiteripeequi, aisati ivanquirepee jero ovaja.
29 “Iro caratapaintsiri 6 quitaiteri, iramayetaje aisati caari amashiyetacha: 8 vacajaniqui, apite ovisha aisati 14 irijaniqui, moncarataquerori aparo irosarentsite.
30 Aisati iramayetaque ivanquirepee jero ovaja irimoncarataqueri icarayeti vacajaniqui, ovishapee aisati irijaniqui, irimoncarataquero nocantaquempiri.
31 Impoiji iramaque aparoni chiivo iroimenterori caari cameetsatatsi yantayetiri. Aisati intsipatayeri intaapinitenari quitaiteripeequi, aisati ivanquirepee jero ovaja.
32 “Iro caratapaintsiri 7 quitaiteri, iramayetaje aisati caari amashiyetacha: 7 vacajaniqui, apite ovisha aisati 14 irijaniqui, moncarataquerori aparo irosarentsite.
33 Aisati iramayetaque ivanquirepee jero ovaja irimoncarataqueri icarayeti vacajaniqui, ovishapee aisati irijaniqui, irimoncarataquero nocantaquempiri.
34 Impoiji iramaque aparoni chiivo iroimenterori caari cameetsatatsi yantayetiri. Aisati intsipataaqueri intaapinitenari quitaiteripeequi, aisati ivanquirepee jero ovaja.
35 “Iro caratapaintsiri 8 quitaiteri, ocameetsati irampatojeitajea maaroni. Tecatsi catsini antaveejeitatsine.
36 Iramayetaje aisati caari amashiyetacha intaajenari: aparo vacajaniqui, aparo ovisha aisati 7 irijaniqui, moncarataquerori aparo irosarentsite.
37 Aisati iramayetaque ivanquirepee jero ovaja irimoncarataqueri icarayeti vacajaniqui, ovishapee aisati irijaniqui, irimoncarataquero nocantaquempiri.
38 Jeri aparoni chiivo iroimenterori caari cameetsatatsi yantayetiri. Aisati itaapinitanari quitaiteripeequi intsipataayetaqueri ivanquirepee jero ovaja.
39 “Irotaque oca intaapinitenari omoncarayetearica quitaiteripee nocantacantayetiri inquimoshireventantenari. Aisati iramayetaqueri icashiacaanari jero impashitenari, iriorica intaasanotenari, iroorica ivanquirepee jero ovaja, aisati iroorica iroimenterori naacameetsatantajeariri.”
40 Ari yovaaqueneri Moiseshi ishanincapee maaroni icantaqueriri Tasorentsi.
