Números 30:1-16
30 Yora Moiseshi icamantiri maaroni jivatacaajeitiriri ishanincasanoripee icantiri, jero oca icantaqueri Tasorentsi:
“Intimerica pishaninca incashiacayenaro paitarica, iriorica icantasanoti: ‘Queario nomoncaratero nocantasanotaqueri,’ ocameetsati irimoncaratero maaroni icantaqueriri.
2 -
3 “Iroorica tsinane evancaro, saviquimotiriri iri, ocoaquerica oncashiacayenaro paitarica antayetenari, ariorica iriotacotaquero iri ocoaqueri, teerica incantimenteroji; ocameetsati omoncaratasanotero ocashiacaaquenari.
4 -
5 Irompa teerica incoacayeroji iri, eiroquea omoncaratirotsi ocoavetacari. Tempa te incoacayeroji, aisati narori eiro nocoacairotsi omoncaratero.
6 “Irompa iroorica tsinane cashiacayenane antayetenaro paitapeerica, teerica onquenqueshiretasanoteaji, impoiji aaque ojime, ariorica iriotacovetaquearo ocoaqueri, teerica incantimenteroji; ocameetsati omoncaratasanotero ocashiacaaquenari.
7 -
8 Irompa teerica incoacayeroji ojime, eiroquea omoncaratirotsi. Aisati narori eiro nocoacairotsi omoncaratero.
9 “Iroorica camajimentaaro, irompa iroorica yojocashiyeetari cashiacayenane, ocameetsati omoncaratasanoyetero ocashiacaaquenari antayetenari.
10 “Aisati aatsiri ojime ocoasanotaquerica antayetero paitarica ocashiacaaquenari, ariorica iriotacotaquero ojime, eirorica icantimentirotsi ocoaqueri; ocameetsati omoncaratasanotero ocantasanotaqueri.
11 -
12 Irompa teerica incoacayeroji ojime, eiroquea omoncaratirotsi ocoavetacari. Tempa yora ojime te incoacayeroji, aisati narori eiro nocoacairotsi omoncaratero.
13 “Yora ojime irio cantasanotatsine, omoncaraterorica ijina paitarica ocashiacaaquenari antayeteri aisati ontitanteari, aisati irio cantatsine eiro omoncaratantarotsi.
14 Irompa eirorica incantimentirotsi, irimajeretashitaquearica avisanaque aparo quitaiteri aisati apitetanaque oni iotanaque icoacaasanotaquero, omoncaratero ocoaqueri.
15 Irompa osamanitanaquerica iotacotantavetacarori, irojocacaashitajearorica, irio cantacayearone eiro omoncaratantarotsi ijina ocoavetari.”
16 Irotaque oca icantacantiri Tasorentsi icamantaqueriri Moiseshi, jaoca incanterori shirampari ijina aisati timatsiri irishinto evancaro saviquimotiriri ivancoqui.
