Números 31:1-54
31 Ari iquenquetsatacaajiri Tasorentsi Moiseshi, icantiri:
“Pintsoncajeiteri madiánasatipee, pimpiatacoventajeari pishanincapeeni, impoijiquea pincame.”
2 -
3 Irosati icantajeitantacari Moiseshi ishanincapee:
—Povetsicajeitea aparopeeni pijajeite pimanajeiteri madiánasatipee, icoacaaquempi Atasorentsite pimpiajeiteari, pintsonqueri poajeiteri.
4 Ocameetsati pintiancayete aparopeeni ashanincasanoripee, incarayetaque 1,000 manajeitachaneri.
5 Aitaque icantacari, icoyeajeitaque aparopeeni ishanincasanoripee icarayetaque 1,000 yapatoanaca 12,000 manajeitachaneri.
6 Irosati itiancantacari Moiseshi manajeitachaneri, icaratanaqueri Finees itomi antaveetatsiri Eleazar. Iriotaque aayetanaquerori inashitacaayetari jero tiorentsipee intiotanteari irimanajeitaquearica.
7 Ari imanajeitapaaqueri itsoncajeitaqueri maaroni, yoajeitaqueri. Imataquero icantaqueriri Tasorentsi Moiseshi.
8 Yoajeitaqueri 5 pincatsariyetatsiniri madiánasati: Eví, Réquem, Sur, Hur jeri Reba, aisati Balaam, itomi Beor.
9 Irointiquea tsinanepee, jananequipee aisati virantsipee jero yashiyetaniri pinatasanoyetachari, yaajeitavaquero. Aisati itaajeitaquero maaroni inampipeeni jero nampitsijaniquipee.
10 -
11 Ora yaayetavaqueri oararontsipee, atiripee jeri virantsipee: yaajeitanaquero isavicajeitapaaquenta Moiseshi, Eleazar, yora antaveetiniriri Tasorentsi, aisati ishanincapee, opampaiteapai moabaquiniri, quempejitarori nija Jordán aisati montetarori Jericó.
12 -
13 Yora Moiseshi jeri antaveetatsiri Eleazar aisati maaroni jivatacaayetiriri ishanincasanoripee ijajeitanaque intonquiotantavajeariri manajeitachari.
14 Iro cantaincha Moiseshi iquisavaqueri jivatacaayetiriri caratatsiri 1,000 aisati 100 manajeitaitachari.
15 Icantavaqueri:
—¿Paitaquea caari poajeitantaro tsinanepee?
16 Tempa iroojeitaque oametaqueriri Balaam yantacaajeitantacariri ashanincapeeni caari cameetsatatsi, ipincatsajeitantacarori ijitasorentsitashiyetari Baal-peor. Ipiatsajeitacari Tasorentsi, irotaque icamajeitantacari, yoasanquetaajeitaqueri.
17 Poajeiteri meeca evancaripee aisati maaroni tsinanepee antayetaqueriri shirampari.
18 Irointiquea evancaro caariquera antayeterine, eiro poajeitirotsi, paajeitanajero poisavicajeitajero.
19 “Avirojei maaroni oantayetaintsiri, jeri ajiricayetaqueriri camayetaintsiri aisati pamajeitaqueri, pintimajeitavaquetsita nijanta otsapitapaaca asavicajeitantari oncarataque 7 quitaiteri. Ariorica oncaratapaaque mava quitaiteri aisati oncaratapaaquerica 7, ocameetsati poameetsajeitajempa.
20 Aisati poameetsayetajero maaroni quitsaarentsipee jero vetsicayetachari meshinantsipee, ivitipee chiivo aisati vetsicayetachari inchato.”
21 Yora antaveetatsiri Eleazar icantajeitiri maaroni manajeitaitachari:
—Jero oca icantacantiri Tasorentsi icantaqueriri Moiseshi.
22 Maaroni vetsicayetachari oro, plata, bronce, ashiroyetatsiri jero plomo, caari taachane, ocameetsati pintaajero aisati pinquivantajeitajearo nija yoameetsatanteetari. Irointiquea paitapeerica caari quisoyetatsi taasanotachari, pinquivashiyetajearo irointi nijaqui.
23 -
24 Oncaratapaajerica 7 quitaiteri pinquivayetajero piitsaarepee, oncameetsatantanajeari. Impoijiquea pijajeitaje asavicajeitinta.
Ipavacaajeitacaro yaayetavaqueri.
25 Ari icantiri Tasorentsi Moiseshi:
“Pisanquenatacojeiteri jaoca icarajeiti atiri aisati virantsipee paitajeitavaqueriri ishanincapeeni Madián. Iramitacotempi antaveetatsiri Eleazar aisati jivatacaayetiriri pishanincasanoripee.
26 -
27 Impoiji pimpaarantavacaajeitearo cashetani; pimpajeiteri manajeitaitachari, iro pashini pimpajeiteri maaroni pishanincapee.
28 Impoiji pinashitacayena narori yashijeitacari manajeitaitachari: incarayetaquerica 500 atiripee, vacapee, aashinopee aisati ovishapee, paayetaque aparopeeni, pimperi antaveetatsiri Eleazar. Iriotaque nashiteari narori.
29 -
30 Aisati pinquempetaqueri yashijeitacari pishanincapee: incarayetaquerica 50 atiripee, vacapee, aashinopee aisati ovishapee, paayetaque aparopeeni. Pimpajeiteri ishanincapeeni Leví, antaveetatsiri Nonantariqui.”
31 Ari imoncarataquero Moiseshi aisati Eleazar icantaqueriri Tasorentsi.
32 Jero ocarataqueri maaroni ovaararontsipee yaitajeitaqueriri madiánasatipeeni.Icarataque 675,000 ovishapee,72,000 vacapee,61,000 aashinopee,32,000 evancaropee caariquera antayetiri shirampari.
Te inconoyeroji yaanontajeitavacari manajeitaitachari.
33 -
34 -
35 -
36 Jero ipaarantaqueriri cashetani manajeitaitachari:icarataque 337,500 ovishapee,inashitacaacanari Tasorentsi 675.
37 -
38 Aisati iriori vacapee, icarataque 36,000,inashitacaacanari Tasorentsi 62.
39 Yora aashinopee caratatsiri 30,500,icarati 61 inashitacaacanariri Tasorentsi.
40 Aisati iroori evancaropee, ocarataque 16,000,inashitacaacanari Tasorentsi 32.
41 Impoiji ipaqueri Moiseshi antaveetatsiri Eleazar irashi Tasorentsi. Imoncarataquero icantaqueriri.
42 Aisati iquempetaca cashetatatsiri ipaarantaqueriri maaroni ishanincapee: icarayetaque 337,500 ovishapee, 36,000 vacapee, 30,500 aashinopee aisati 16,000 tsinane evancaropee caariquera antayetiri shirampari.
43 -
44 -
45 -
46 -
47 Ari yaayetaque Moiseshi carayetatsiri 50, aparopeeni tsinane aisati iquempeyetaqueri virantsipee, ipajeitaqueri ishanincapeeni Leví, antaveejeitatsiri Inantariqui Tasorentsi. Imoncarataquero icantaqueriri.
48 Yora jivatacaayetiriri manajeitachari ijatashijeitaqueri Moiseshi, icantapaaqueri: “Narojei, jivatacaajeitiriri manajeitaitachari, meeca namenajeitapaajiri tecatsi pearantachane.
49 -
50 Jero meeca namayetaquerica nocashiacaaqueriri Tasorentsi, naayetavaqueri aparopeeni: brazaletepee, maavacorontsipee, aniiyopee, aretepee jero pashinipee cameetsayetatsiri. Irotaque nonquenqueshireacotantajeiteariri yoavisaacojeitaquena. Irotaque nompinaventajeari yoavisaacotaquena Tasorentsi”
51 Ari yaavaquero Moiseshi aisati Eleazar maaroni oropee ipajeitaqueriri jivatacaajeitiriri manajeitaitachari, icashiacaaqueriri Tasorentsi. Ocarataque otenataque 184 kilo.
52 -
53 Irotaque ipayetaqueriri aparopeeni manajeitaitachari yaitayetavaqueriri quisajeitiriri.
54 Impoiji yaajeitanaquero Pancotsiqui yapatotimentantariri Tasorentsi, inquempoyeantearori, inquenqueshireacotanteariri maaroni ishanincajeitaniri Israel.
