Números 32:1-42
32 Yora ishanincapeeni Rubén jeri Gad oshequi catsini ivirapee. Ari ineajeitaquero quipatsi Jazer aisati Galaad, ocameetsaiteasanoyetaque iroantayeteariri ivirapee. Ijatashitaqueri Moiseshi, antaveetatsiri Eleazar jeri jivatacaayetiriri ishanincasanoripee, icantapaaqueri:
2 -
3 —Pamenero onta quipatsi otimayetinta nampitsipee Atarot, Dibón, Jazer, Nimrá, Hesbón, Elealé, Sebam, Nebo jero Beón.
4 Imatacaajeitaquee Tasorentsi atsoncajeitantacariri savicantayetaroniri. Noneaquero quipatsipee ocameetsaiteasanoyetaque avantayeteariri vacapee; tempa narojeitaque virajeitariri.
5 Tempa oncameetsatimotempi pimpajeitenaro narori nosavicajeitanteari, eiroquea nomonteajeitantanacatsi intatiqueronta nija Jordán.
6 Ari icantanaqueri Moiseshi:
—¿Picoaquempa pisavicajeitapee avinti aca, irintiquea jajeitatsine ashanincapee irimanajeitapempa?
7 ¿Paita picoantacari pincantashireacaajeiteari maaroni ashanincapee, eiro imonteajeitantanacatsi iraajeitantapemparori quipatsi icashiacaajeitaquempiri Tasorentsi?
8 Oca picantajeitaqueri irotaque yantajeitaqueri ashanincapeeni, asavicajeitantapaacaniri nampitsiqui Cadés notiancavetacari yamenanontaveitaro onta quipatsi.
9 Yareejeitacaro osanteni Escol, yamenanontayetaquero maaroni. Impoiji ipiajeivetanajaro icantashireacaajeitapaaqueri maaroni ashanincapeeni, eiro yareejeitantarotsi quipatsi icashicaavetacariri Tasorentsi.
10 Irotaque iquisasanotantacariri Tasorentsi ashanincapeeni poneajeivetajanchari Egiptoqui, moncarayetaquerori 20 irosarentsite irosati anteariyetanaintsiri. Icantasanotaque: ‘Te irishiretasanotenaji. Eiro ineajeitirotsi quipatsi nocashiacaavetacariri, nocantasanotaqueriri Abrahamani, Isaacani jeri Jacoboni.’
11 -
12 Apaniro irinti Caleb itomini Jefuné quenezeosati, jeri Josué itomini Nun ishiretasanotacari irinti Tasorentsi.
13 Ari iquisasanotaqueri Tasorentsi ashanincapeeni, iquenacaayetaquenani caaraiteriqui ocarataque 40 osarentsi, irosati itsoncajeitantaca icamajeitaque maaroni antimotaqueriri Tasorentsi caari cameetsatatsi. Tecatsi aparoni timanajantsine.
14 Meeca avirojeitaque itomipee antayetironiri caari cameetsatatsi, irotaque picoantacari pinquempejeitajeari ashanincajeitaniri, pinquisacantajeariri aisati Tasorentsi, iroasanquejeitantajeariri ashanincapee.
15 Teerica pincoajeiteji pinquemisantasanoteri Tasorentsi, irotaque irishinejeitanteariri ashanincapee intimajeitanaje aisati osamani aca caaraiteriqui. Aviro cantacaajeitearone intsoncasanojeitanteari incamajeite.
16 Ari icantasanojeitaqueri:
—Nocoajeitaque nontantotacoyetanaqueri maaroni novishatepee aisati novetsicayetanajero nampitsipee osavicantajeiteari maaroni nojinapee.
17 Naroquea jajeitatsine nomanajeitempa, nojivajeitanaqueri ashanincapee, irosati nareejeitantaquearo quipatsi irisavicajeitantapempari iriori. Irotaque nocoajeitantacari novetsicanajero nampitsipee, nontantotacoyetanajero osavicajeitantaiteari nojinapee cameetsa, eiroquea yoajeitantarotsi savicajeitatsiri aca.
18 Eirotsita nopiajeitajarotsi aca irosati iraajeitantaquearori ashanincapee quipatsi irisavicajeitanteari iriori.
19 Ariorica naajeitaquero oca quipatsi acaquerocaniri, eiro nocoajeitajitsi aisati quipatsi intatiqueroniri nija Jordán.
20 Irosati icantantanacari Moiseshi:
—Ocameetsataque, ariorica pimajeitaquero oca picantajeitaqueri pijajeitanteari pimanajeitea pimoncaratantearori icoacaaquempiri Tasorentsi.
21 Ariorica pimonteajeitanaquero intatiqueroqui ora nija Jordán, pintimajeitavaquetsita anta irosati irimatacaajeitantaquempiri Tasorentsi pintsoncajeitanteariri maaroni quisajeitimpiri.
22 Aisati pintsoncaquero pimanatacoventajeitaquero quipatsi, irosati pimpiajeitantajearo. Tempa aitaque pimoncarataquero icoacaaquempiri Tasorentsi aisati iriori ashanincapee. Impoijiquea paasanojeitero oca quipatsi, icoacaaquempiri Tasorentsi.
23 Irompa eirorica pimoncarajeitirotsi, pantimojeitaqueri Tasorentsi caari cameetsatatsi, piotasanojeite aitaque pashinoncaimentajeitaquearo coajica pantajeitaqueri.
24 Pimajeiteroqueti povetsicajeitajero nampitsipee osavicajeitanteari pijinapee, aisati pintantotacoyetanaqueri povishatepee. Pimoncarajeiteroyea picantaqueri.
25 Ari yora ishanincapeeni Gad jeri Rubén icantajeitanaque:
—Aitaque nomajeitaquero picantaquenari.
26 Noisavicajeitanaquerotsita nojinapee, notomipee, aisati maaroni novirapee aca nampitsiqui Galaad.
27 Naintiquea jajeitatsine nomanajeitea, nomoncarajeitero icoacaaquenari Tasorentsi picantaquenari.
28 Impoiji icantiri Moiseshi, antaveetatsiri Eleazar, Josué jeri jivatacaajeitiriri ishanincasanoripee:
29 —Incarajeitanaquempirica ishanincapeeni Gad jeri Rubén pimonteajeitanaquero nija Jordán, irimoncaratantearori icoacaaquempiri Tasorentsi pimanatacoventajeitantearori quipatsi. Paajeitaquerorica, irosati pimpajeitantaqueari oca quipatsi Galaad, irisavicajeitanteari iriori.
30 Irompa eirorica ijajeititsi, aitaque pincarajeiteriri pisavicajeite quipatsiqui Canaán.
31 Yora ishanincapeeni Gad jeri Rubén icantajeitanaji:
—Aitaque nomajeitaquero icoacaaquenari Tasorentsi, nojajeitaque nomanatacoventantearori quipatsi Canaán. Iro cantaincha irotaque naajeiteri narori oca quipatsi acaquerocaniri.
32 -
33 Irosati ipantacari Moiseshi ishanincapeeni Gad, Rubén jeri cashetani ishanincasanoripeeni Manasés iipatsitepeeni Sihón yora amorreo, ipincatsariventiniri, jero Basán ipincatsariventiniri Og aisati maaroni nampitsipee timayetatsiri.
34 Ari yovetsicajeitaquero ishanincapeeni Gad nampitsipee Dibón, Atarot, Aroer, Atarot-sofán, Jazer, Jogbehá, Bet-nimrá aisati Bet-arán. Yovetsicasanojeitaquero, aisati yovetsicanontayetaqueri irovishatepee.
35 -
36 -
37 Aisati iriori ishanincapeeni Rubén yovetsicajeitaquero nampitsipee Hesbón, Elealé, Quiriataim, Nebo, Baal-meón aisati Sibmá. Ipashiniyetajiro aparopeeni ovajiro, ipajiyetajiro ivajiropeequi vetsicayetajirori.
38 -
39 Yora ishanincapeeni Maquir, itomini Manasés, ijajeitanaque quipatsiqui Galaad, yaajeitapaaquero. Yojocajeitapaaqueri amorreopee savicajeitatsiniri.
40 Irosati ipantacari Moiseshi quipatsi Galaad, isavicajeitantacari.
41 Impoiji iriori ishanincapeeni Jaír, itomini Manasés, yaajeitaquero pashinipee nampitsi isavicajeitantaniri amorreopee. Ipajitajiro Havot-jaír.
42 Jeri iriori ishanincapeeni Nóbah yaajeitaquero nampitsi Quenat, jero pashinipee timayetatsiri. Ipajitacotajaro ivajiroqui Nóbah.
