Números 35:1-34
35 Ainiroquera isavicajeitapaaque ishanincajeitaniri Israel opampaiteapai moabaquiniri, oquempejitapai nija Jordán aisati montetarori Jericó, ari iquenquetsatacaajiri Tasorentsi Moiseshi, icantiri:
“Pincanteri maaroni pishanincapee iraayetapaaquerica iipatsite, ocameetsati imperi ishanincapeeni Leví nampitsipee irisavicanteari iriori, aisati impacotaqueri otimantayetari paashitomashi.
2 -
3 Aitaque irisavicayeteri iriori nampitsipeequi, otimayeti paashitomashi iroantayeteariri ivacate aisati pashinipee ivirayetari.
4 Ora paashitomashi imperiri antearoiteyetaque, omponeanaquea otantotacoroqui nampitsi oncarate 450 metro ojatsantsaayetaque.
5 Maaroni quipatsi cameetsa irimoncarayetaqueneri oncarate 900 metro oncaraitetaque, irimoncarayetaquero maaroni acaquerocapeequi. Ontimaque inampi nianqui, oshoncaquearo paashitomashi otsapipeequi.
6 “Ontime aisati 6 nampitsipee iraventeari oavacaashiyetachaneri, eiroquea yoanteetaritsi iriori, ora impaqueriri onashitanaquea. Impoiji impajeri aisati oncarataque 42 nampitsipee. Ampatoanaquea 48 impaqueriri impacoyetaqueri paashitomashi.
7 -
8 Ora nampitsipee iraacoyetapaaqueri aparopeeni pishanincasanoripee, ocameetsati imperi iriori ishanincapeeni Leví. Yora aintsiri antearoite iipatsite, oshequi imperi nampitsipee. Irintiquea aintsiri capichaiteji, imperi iriori aparopee nampitsi; eiro ipiritsi oshequi.”
Nampitsipee iraventeari oantayetatsineri.
(Deut. 19.1-13; Jos. 20.1-9)
9 “Icantiri aisati Tasorentsi:
“Pincanteri pishanincapee, ariorica irimonteajeitanaquearo nija Jordán irareejeitaquearorica quipatsi Canaán,
10 -
11 ocameetsati incoyee nampitsi iraventajeiteari jaanicarica oantayetatsine, teerica intsataashiteariji.
12 Aitaque irishianaqueri, eiroquea yoyeetantajaritsi incoavetearica ishanincasanori camaintsiri impiacoventajeari. Eiro yoyeetitaritsi tequerarica iriotacotasanojeiteri maaroni ishanincapee, incantacoventanteariri.
13 Oncarate 6 nampitsipee iraventeari: ontime mava acaqueroca nijaqui Jordán, aisati mava anta quipatsiqui Canaán.
14 -
15 Irotaque iraventeari maaroni pishanincapee aisati pashinisati saviquimojeitiriri jeri iriori quivantatsiri. Aitaque irishianaqueri iraventantapemparori.
16 “Jaanicarica antsinacantaquearine itsipa ashiro tenatatsiri incamaquerica, iriotaque oantashitachari. Ocameetsati incantacoventeeteri, iroyeeteri iriori.
17 “Jaanicarica posantaquearine itsipa mapi incamaquerica, iriotaque oantashitachari. Ocameetsati incantacoventeeteri, iroyeeteri iriori.
18 “Iriorica itsipa imposantaqueari inchaquii incamaquerica, iriotaque oantashitachari. Ocameetsati incantacoventeeteri iroyeeteri iriori.
19 Yora ishanincasanori camaintsiri, iriotaque oajerine oantaintsiri ariorica irineajeri.
20 “Aisati ariorica inquisanenteri itsipa intsataaqueririca intatsincaqueri, iroorica imposantaqueari paitarica. Aisati iroorica imposaqueri iracoqui incamaquerica, ocameetsati iroyeeteri iriori; tempa iriotaque oantatsiri. Yora ishanincasanori camaintsiri, iriotaque oajerine ariorica irineajeri.
21 -
22 “Irompa intatsincashitaquearirica incarajapaaque, teerica inquisanenteriji aisati imposantaqueari paitarica, iroorica mapi irovishoncaquero teerica irineeriji, omposapaaqueririca incamaque, te intsataashiteariji.
23 -
24 Impoiji iroameetsatero pishanincapee irimoncaratantearori nocantacantiri. Incantacoventanteariri ariorica iroyeetajeri, irompa eirorica.
25 Ariorica iriotacotasanotaqueri pishanincapee te intsataashiteariji iroyeri, eiroquea ishinecoventiritsi iroajeri ishanincasanorini camaintsiri. Ocameetsati iroimpiajeri nampitsiqui yaventapaacari, aitaque irisaviqueri irosati incamanteari jivatatsiri yantaveeti nonashitacaasanotari.
26 Irompa ariorica irisotoanaquero oipatsite nampitsi yaventari, yora ishanincasanori camaintsiri irineaqueririca jaocarica; iroajeririca iriori, te irio cantacayearone.
27 -
28 Irotaque ocameetsatantari intimavaqueta nampitsi yaventari, irosati incamanteari jivatatsiri yantaveeti. Impoijiquea impianajero iipatsitequi.
29 “Oca nocantacantiri, irotaque irimoncarajeiteri maaroni pishanincapee, aisati iriori irishanincajeitajeari coajicani jaocarica irisavicajeiteri.
Icantacantiro Tasorentsi camantacoterineri oantayetatsineri.
30 “Maaroni oantayetatsiri ocameetsati iroyeeteri, oshequirica camantacoterineri. Irompa aparonirica, eiro yoyeetiritsi.
31 “Te oncameetsateji irayeri quireequi impinacoventeeveteariri oantatsiri eiro yoanteetaritsi, ocameetsati irovasanoyeeteri.
32 “Aisati te oncameetsateji irayeri quireequi irishinetantajeariri oamantaintsiri savicaintsiri nampitsipeequi yaventari, irijataje iipatsitequi tequerarica incame jivatatsiri yantaveeti.
33 “Te oncameetsate incaariperotero oantayetatsiri quipatsi irisavicajeitapaajenta. Irotaque ocameetsatantari iroyeeteri; tecatsi pashini incanteriri.
34 “Eiro catsini icaariperotirotsi quipatsi irisavicajeitanteari; tempa aitaque noncarajeiteriri pishanincapee. Narotaque Tasorentsi, carajeitaqueriri meeca.”
