Números 36:1-13
36 Yora jivatacantayetatsiri ishanincasanoripeeni Galaad, ishanincapeeni iriori Maquir, itomini Manasés, itomini José, aisati jivatacaayetiriri ishanincapee, ijatashitaqueri Moiseshi, icantapaaqueri:
2 —Tempa aviro icoacaaqueri Tasorentsi pivishonquimentero quipatsi paitarica, pimpantayeteariri ashanincapee. Aisati icoacaaquempi pimpajero irishintopeeni Selofhad yashitaniri. Tempa iriotaque noshanincasanorini.
3 Irompa ariorica aaque ojimepee pashinisati ashanincajeitari; ora quipatsi ashijeiteari irio ashitajearoneri ishanincasanoripee ojimentacari, eiro nashijeitajarotsi narori. Aitaque oncanteari iraarantitenaro noipatsite nashijeivetacari.
4 Ariorica omoncaravetapaajea osarentsi iroimpacantajearori ashanincapee quipatsi, irosati oncantea irashitearo pashinisati. Eiro nashitasanojeitajarotsi narori.
5 Irosati icamantantacari Moiseshi ishanincapee icantaqueriri Tasorentsi. Icantajeitiri:
—Ocameetsataque icantaqueri ishanincapeeni José.
6 Yora Tasorentsi icoacaaquero irishintopeeni Selofhad ojimenteari ishanincasanoripeeni iri, jaanicarica ocoaqueri.
7 Ora quipatsi iraayeteri pishanincapee, te oncameetsateji irashitearo pashinisati pishaninca. Incanteani irashitasanotearo iipatsite yashitasanojeitacari ishanincasanoripee.
8 Otimirica tsinane, jaanicarica oshanincatasanoyetari ashitearone quipatsi, iriotaque ojimenteari oshanincasanori. Aitaque incanteari aparopeeni ashanincapee irashitasanotantearori yashiyetari iriripeeni.
9 Eiro catsini yashiyetarotsi pashinisatipee. Incanteani aparopeeni ashaninca irashitasanoyetearo iipatsite iraayeteri.
10 Ari omajeitaquero Mahlá, Tirsá, Hoglá, Milcá aisati Noá icantaqueriri Tasorentsi Moiseshi. Ojimentayetacari itomipee oshanincasanori, ishanincapeeni Manasés. Irosati ashitasanotantajaro iipatsite irini.
11 -
12 -
13 Irotaque oca icantacantiri Tasorentsi icantaqueriri Moiseshi. Aisati icamantaqueri maaroni ishanincapee isavicajeitantapaacari opampaiteapai moabaquiniri, quempejitarori nija Jordán aisati omontetaro Jericó.
