Deuteronomio 1:1-46
1 Jeroca iquenquetsatacaajiriri Moiseshi maaroni ishanincapee, isavicajeitantapaacari caaraiteriqui acaqueroca nijaqui Jordán, pajitachari Arabá, montetarori Suf, otimayetapai nampitsipee Parán, Tófel, Labán, Haserot jero Dizahab.
2 Iponeantajeitanajari toncaariqui Horeb, yareejeitacaro nampitsi Cadés-barnea. Ocarati 11 quitaiteri yaniijeitaque, iquenapaaque toncaariqui quenantachari Seír.
3 Ari aparoquera iitaiterite, caratatsiri 11 cashiri, iro 40 osarentsi, avisanaque imanatacantacariri Moiseshi ishanincapee, itsoncajeitantacariri Sihón ivincatsariteni amorreopee savicantaroniri nampitsi Hesbón, jeri Og pincatsariventironiri nampitsi Basán, savicantaroniri nampitsi Astarot, quempejitarori nampitsi Edrei. Aitaque iquenquetsatacaajiriri Moiseshi ishanincapee irimoncaratantearori maaroni icantaqueriri Tasorentsi.
4 -
5 Ainiroquera isavicajeitapai quipatsiqui Moab, ari icantasanojeitaqueri:
6 “Anta toncaariqui Horeb icantajeitaquee Atasorentsite: ‘Osamanitaque pisaviquimojeitaquero oca toncaari.
7 Meeca pivetsicaarantajeitajea pijajeite iipatsitequi amorreopee paajeitapeero, pintsoteayetanaquero maaroni tsipanampiyetarori ora quipatsi Arabá, otimayetinta toncaaripee, opampaiteayetapai néguebiquiniri, otsapiyetapaaca iipatsite canaaneopee, jero otishiqui Líbano, irosati antearojaqui nija Éufrates.
8 Irotaque quipatsi nopajeitaquempiri. Pijajeite pisavicajeitantapemparo; tempa narotaque Tasorentsi cantasanotaqueriri intacantajeitaquempiniri Abrahamani, Isaacani aisati Jacoboni, nompajeiteri pishanincajeitajeari irisavicajeitantajeari.’
Icoyeantacari cantacoventantatsiri.
(Éxo. 18.13-27)
9 “Aisati nocantaquempi: ‘Eiro nomatirotsi apaniro nojivatacaajeitempi.
10 Tempa yoshequiacaasanojeitaquee Avincatsarite Tasorentsi, aquempejeitacari impoquiropee.
11 ¡Aiquero irishequiacaasanojeitanaquee catsini Tasorentsi iquemisantajeitaqueri intacantajeitaqueeri. Aisati intasoncacoventajeitee, irimoncaratero icantasanotaqueriri intacantajeitaqueerini!
12 Iro cantaincha eiro nomatiro apaniro novetsicajeitempiro pomerentsitimoyetempine aisati pantavacaayetearica.
13 Irosati nocantantaquempi: Pincoyeavacaajeitea aparopeeni pishanincasanori iotasanotatsiri quenqueshireasanotachari, noncanterita iriori irijivatacaajeitempi.’
14 “Ari picantajeitanaquena: ‘Jee, cameetsataque picantaquenari.’
15 “Irosati nocantajeitantacari aparopee jivatacayerine 1,000, jivatacayerine 100, jivatacayerine 50 aisati jivatacayerine 10.
16 Irosati nocantajeitantacari: ‘Cameetsayea poameetsayeteneri pomerentsitimoyetariri pishanincapee aisati pinquempeteri pashinisati atiri.
17 Ariorica pincantacoventante, eiro pinashitacaaritsi pincantacoventeri. Ocameetsati irimoncaraavacaajeitea, iriorica caari ashitaarantasanotachane aisati ashitaarantincari. Eiro catsini pitsaroacaaritsi; tempa irio Tasorentsi nintacaaquempirori pincantacoventante. Irompa iroorica pomerentsitasanotachari caari pimati poameetsateneri, impoiji pamaquenari noameetsatantajeanariri.’
18 “Aisati noametasanojeitaqueri maaroni paitapeerica irantayeteri.
Itiancantacari 12 amenanontantatsiri.
(Núm. 13.1–14.4)
19 “Ashitoajeitantanajarori Horeb, aquenajeitantanajari toncaariqui irosati areejeitantacaro iipatsite amorreopee, amoncarataquero icantaqueeri Atasorentsite. Aquenajeitantapaacarori antearoite caaraiteri covencaiteri. Tempa pineajeitaquero avirori, irosati areejeitantacaro Cadés-barnea.
20 Irosati nocantajeitantaquempi: ‘Meeca areejeitacaro iipatsite amorreopee, irotaque ipajeitaqueeri Atasorentsite, icantaqueriri peerani intacantaqueerini. Tsamequeti meeca aajeitapeero asavicantajeitapemparo, eiro atsaroajeititsi aisati eiro acantashirejeititsi.’
21 -
22 Iro cantaincha picantajeitaquena: ‘Tempa oncameetsateji antianque acarajeitica amenanonterone quipatsi. Ariorica impiajeitapaaje incamantajeitapaaje, ayotanteari jaoca anquenajeitanaqueri, aisati jaanica inteari amanajeitapeeri.’
23 “Ora picantajeitaquenari ocameetsatimotaquena, irosati nocoyeantayetaca aparopee ashanincasanoripee, icarati 12.
24 Ari itoncaajeitanaque toncaariqui, irosati yareejeitantacaro oirincaiteacotapai Escol. Ishoncajeitanacaro maaroni quipatsi yamenanontayetanaqueri savicajeitatsiri.
25 Irosati ipiajeitantajaro, yamajeitaque oitsoquipee shiocayetatsiri. Irosati icamantajeitantapaaquee: ‘Ora quipatsi ipashitaqueeri Atasorentsite, cameetsaite catsini.’
26 Iro cantaincha te pincoajeiteji pijajeite, pipiatsatacaro icantavetaquempiri Tasorentsi.
27 Aisati picantimajeitaqueri pivancopeequi, picantajeiti: ‘Te irinintajeiteeji Tasorentsi, irompa yamamempeantajeitajeeri aca asavicajeivetani Egiptoqui. Icoaque meeca iroacantajeitee, intsoncajeitee amorreopee.’
28 Impoiji picantajeitanaque: ‘¿Jaoca ancantajeiteari? Tempa icamantajeitapaaquee acarajeitiri yora savicajeitatsiri anta, oshequi ishintsitasanotaque. Antearitsantsapee ini, yanaajeitaquee ainti. Aisati antearopee inampi aisati oquempeta itantoyetirori ishoncayetaquero, maaroni. Yora antearitsantsayetatsiri iriotaque ishanincapee Anac. Ora picantajeitaqueri oashiretacaajeitaquee catsini.’
29 “Iro cantaincha nocantanaquempi: ‘Eiro paamajeitaritsi aisati eiro pitsaroacaajeitaritsi.
30 Timatsi Atasorentsite jivajeitanaqueeneri, iriotaque piacoventajeiteeneri, iquempetaquero yonijaajeitantaqueerori itasorenca anta Egiptoqui aisati anta caaraiteriqui; tempa iriotaque amaqueeri apocajeitantacari irosati meeca aca, iquempetacari atiri acatsatiriri itomi.’
31 -
32 Iro cantaincha te pishiretimateariji Avincatsarite Tasorentsi, iriovetaca jivajeitaqueeri. Tsiteniripeequi iquitasantetacotaquee, yonijaajeitaqueero avotsi aquenajeitantapaacari. Aisati quitaiteripeequi yovaaqueero mencori. Ariorica ocatiapaaca irosati amaoreajeitanta.
33 -
Icantimatantacariri ishanincapeeni Israel Tasorentsi.
(Núm. 14.20-35)
34 “Iquemantaquempiri Tasorentsi picantimajeitaqueri, irosati iquisantanaca, icantasanotaque: ‘Narotaque Tasorentsi; yoca atiripee ipiatsataquena; te incameetsajeiteji. Tecatsi meeca aparoni areejeitachane anta cameetsaiteriqui quipatsi nocashiacaajeivetacariri intacantajeitacariniri.
35 -
36 Irintiquea Caleb itomini Jefuné, iriotaque areetachane, aisati iriori irishanincajeitajeari. Iriojeitaque nomperi quipatsi yamenanontaitiri; tempa iriotaque quearioventaquerori iquemisantasanotaquena.’
37 “Avirotaque cantacaajeitacarori icantantaquenari Tasorentsi: ‘Aisati avirori, eiro pareetarotsi quipatsi. Irintiquea areetachane Josué itomini Nun amitacotimpiri, irio poyeetajempineri. Ocameetsati meeca poveshireacayeari; tempa iriotaque pajeiterine pishanincapee quipatsi.
38 -
39 Pijitacantashijeivetacari quisajeitimpiri ario iraapitsajeitavaquempiro pijinapee jeri pitomipee. Iro cantaincha pitomipee, yora caariquera quenqueshireyeterone paitapeerica cameetsatatsiri aisati caari cameetsatatsi, iriojeitaque savicajeitantapemparone quipatsi nomperiri.
40 ¡Avirojeiquea avinti, meeca pimpiajeitanajero caaraiteriqui, irosati pareejeitantajearo incajare Quitioncari!’
Itsoncaarantanteetacariri ishanincapeeni Israel.
(Núm. 14.39-45)
41 “Irosati picantantanaquena: ‘Queario nantimojeitaqueri Tasorentsi caari cameetsatatsi. Meecaquea nojajeite nomanajeitempa; tempa irotaque icoacaaquenari Tasorentsi.’ Irosati pijajeitantavetanaca paajeivetanaca pivesamentopee, pijitashijeivetaca cameetsa pitoncaajeitanaque toncaariqui. Iro cantaincha icantaquena Tasorentsi: ‘Pincantajeiteri: Te quiso noajeiteri, eiro ijajeititsi, itsoncajeitavaquericari quisajeitimpiri.’
42 -
43 “Aitaque nocantasanojeivetaquempi. Iro cantaincha te pinquemisantenaji, irointi pipiatsajeitanacaro icantavetaquenari Tasorentsi. Pijijeivetaca ari panaacojeitaqueri, pitoncaajeivetanaca pimanajeitantearirime.
44 Iro cantaincha ineajeitavaquempi irinti amorreopee savicajeitatsiri toncaariqui, irosati ipocashijeitantaquempi. Iquempejeitacari sani yoijanajeitanaquempi, yoaarantajeitavaquempi anta quipatsiqui Seír, irosati nampitsiqui Hormá.
45 Pipiajeitantajari, piraimovetapaacari Tasorentsi. Iro cantaincha te inquemisantempiji.
46 Irotaque asavicantajeitapaacari caaraiteriqui Cadés oshequi osarentsi.
