Deuteronomio 10:1-22
10 “Irosati icantantajana Tasorentsi: ‘Pincotaye avirori apicotate mapi, onquempetajearo nopavetaquempiri. Aisati povetsique aparo cajón, impoiji pintoncaapaaje pinquenquetsatacantajenari.
2 Irosati nampiitantajearo nosanquenatacotajero nosanquenayevetacari piporocacotapaaqueri, impoiji pinquempoyeacotero Cajóqui timatsiri Nonantariqui.’
3 “Irosati naantaca inchato acacia, novetsicaque cajón. Impoiji nocotaaque apicotate mapi, irosati notoncaacantanajaro.
4 Ari isanquenatavajiro icantacantiri caratatsiri 10, iquempetacantasanotajiro ora piquemajeitaqueri nianqui amorecatsantsaatantacari paamaritatsiri toncaariqui apatojeitantacari. Irosati ipacotantavajanaro.
5 Ari noirincapaaja irosati notetacotantapaacaro Cajóqui. Nomoncarataquero icantaquenari Tasorentsi, irosati ocanta meeca.”
Yovaacaajeitanajari Moiseshi ishanincapee.
6 (Ari yojocanajiro ishanincapeeni Israel Beerot-bene-jaacán, irosati yareejeitantacaro Mosera. Aitaque icamapaaqueri Aarón aisati aitaque itijeetaqueriri. Irosati ipoyeetantanajari itomi Eleazar irantaveetaje.
7 Impoiji yovaajeitanaja, irosati yareejeitantacaro Gudgoda. Ari yovaajeitanaja, aisati irosati yareejeitantacaro Jotbata otimasanoyetapai nija.
8 Aitaque icoyeaqueriri Tasorentsi ishanincapeeni Leví anatacotapiniterone Cajón otimantari Icantacantiri. Iriotaque aisati jatapinitatsine inantapinitariqui impincatsatapinitanteariri, aisati irineanatacotapiniteri intasoncacoventanteariri, irosati icantiro meeca.
9 Irotaque caari otimanta iipatsite iriori iquempejeitaca irinti ishanincapee otimayetaque. Iriotaque Tasorentsi ashitearine peerine paitapeerica. Tempa irotaque icantasanotitacari.)
10 “Notimantajantari toncaariqui 40 quitaiteri aisati 40 tsiteniri, aisati noquempetacantajiro nintantaitarori. Iro nopiantanajari, aitaque iquemisantaquerori Tasorentsi nocantaqueriri, caari itsoncajeitantimpi.
11 Irosati icantantajana: ‘Tsame pijate pivetsicapaajea pijivatanajeri pishanincapee, irimanatacoventantearori quipatsi nocantasanotitacariri intacantajeitaquempiri.’
Icoacaasanotiriri Tasorentsi atiri.
12 “Meeca noncantempi noshanincapee. ¿Paita icoacaasanojeitimpiri Avincatsarite Tasorentsi? Apatiro icoacaimpi pimpincatsateri, pinquemisantasanoteri, pinintasanoteri, pishiretasanoteari aisati pimoncaratasanotero icantacantiri pisavicantajeiteari cameetsa.
13 -
14 Pinquenqueshireacoteri meeca, iriotaque vetsicaqueriri timantayetarori inquite, conijayetatsiri aisati caari conijayetatsi jeri timantayetarori quipatsi.
15 Tempa intacari Tasorentsi inintasanotaqueri intacantajeitaqueerini, impoiji icoyeaqueri ishanincajeitaniri. Tempa avirojeitaque meeca panaacojeitaqueri nampitsipeequiniri. Irotaque aneantacarori meeca.
16 “Ocameetsati meeca pinquenqueshireapinitanaquero icoacaaquempiri Tasorentsi, aitapaaque piquisoshirejeitaque,
17 Tempa iriotaque Pivincatsarite Tasorentsi pincatsariventiriri tasorentsiyevetachari aisati iriotaque pincatsariventiriri pincatsariyevetachari. Iriotaque Pincatsaritasanotatsiri, mayetirori maaroni, aisati ipincatsayeetiri. Te irinashitacanteaji, aisati te inquempeteari, atiri impinayeetanteariri.
18 Iriotaque cavintsairiri camatsiri iriri jero camajimentaaro, aisati inintasanotiri pashinisati saviquimojeitimpiri, otimantari yoari aisati iquitsaatari.
19 Ocameetsati pinintajeiteri avirori; tempa aisati piquempejeivetacari pisavicantajeivetacaniri Egiptoqui.
20 “Pimpincatsatasanoteri apaniro Avincatsarite Tasorentsi, aisati pinquemisantasanoteri. Ariorica pincoye pincantasanoteri itsipa paitapeerica, irointi apatiro pincante: ‘Irio Tasorentsi iotatsi.’
21 Iriotaque piveshireimentasanoteari; tempa imatasanotaquempiro maaroni caari ineapiniyeeti, pineajeitaqueri.
22 Peerani ijajeitantacari intacantajeitaqueerini anta Egiptoqui, icarajeitanaque 70. Iro cantaincha ishequiacaasanojeitaquee Avincatsarite Tasorentsi aquempejeitanacari impoquiropee.
