Deuteronomio 11:1-32
11 “Pinintasanojeiteri Avincatsarite Tasorentsi aisati pimoncaratasanotero icantacantiri.
2 “Pinquenqueshirejeitajero jaoca icantacari Tasorentsi yoasanquetaaquempiri yoametaquempi, caari iotacojeiti pitomipee aisati caari ineajeiti. Aisati pinquenqueshiretajero
3 imayetaqueri anta Egiptoqui caari ineapiniyeeti, yonijaaqueriri pincatsari jeri ishanincapee.
4 Aisati itsoncantacariri manajeitacharini yoijanajeitantavetaqueeri, yomitsitiacotaqueri incajarequi Quitioncari, iyavaayotepeeni aisati ishiacomentopeeni.
5 Pinquenqueshiretajero aisati yonijaajeitaqueeri aquenajeitantapaacari caaraiteriqui, irosati areejeitantacaro aca.
6 Aisati yoasanquetantacariri Datán jeri Abiram yora itomipeeni Eliab ishanincasanori Rubén, otencareantanacari quipatsi otijajeitaqueri aisati ishanincasanoripeeni, ivancopeeni jero timimoyetiriniri. Tempa aneajeitaquero.
7 Avirojeitaque neaquerori paitapeerica imataqueri Tasorentsi.
Itasoncacoventasanotaquero Tasorentsi quipatsi.
8 “Pimoncaratasanojeitero meeca icantacantiri oca nocamantajimpiri pineaperotasanotantanaqueari, pimajeitantearori pimanatacoventero quipatsi paantearori.
9 Irotaque pisavicantajeitajeari oshequi osarentsi anta quipatsiqui icashiacaaqueriniri Tasorentsi intacantajeitaqueerini aisati irishanincajeitajeari. Oshiocasanoyetapai panquiveerentsiyetatsiri, eiro ocoiteimojeitajaritsi paitapeerica.
10 Ora quipatsi pimanatacoventajeiteri te onquempetapemparoji Egiptoni pipanquinontayeveta, oshequi pipomerentsiventaro pisaitacoveetiro.
11 Irompa pisavicajeitapaajenta, aitaque otimayetapairi toncaaripee aisati oirincaiteacoyetapai paashitomashi. Ocantani opariapiniti incani tsincacotirori.
12 Icantani Tasorentsi itasoncaventapinitiro maaroni osarentsipeequi.
13 “Ariorica pimoncarajeitero maaroni oca nocamantajimpiri meeca, aisati pinintasanojeiteri Avincatsarite Tasorentsi, pimpincatsatasanotaqueririca aisati pishiretasanotearirica,
14 aitaque iroariapinitaquempiro incani. Onquimojantsitapinite aisati osarentsitapinite pimatanteari pantaveejeite, paviiyetantearori tirico aisati ontimantayeteari iracayete ova jero quejiquiyetatsiri.
15 Irishiocacaasanoyetero inchashiyetatsiri iroajeiteari pivirapee, iroshequiasanojeitantanaqueari poajeiteari.
16 Quearioyea, pishinetacari iramataviyeetempi. Aisati eiro pipeacotari Tasorentsi, pipincatsatashiyetaricari ijitasorentsiyeetiri; eiro pitiyeroashitaritsi.
17 Ariorica pimpincatsatashiyetaqueari, aitaque iroasanquetaimentaquempiri. Eiro yoariajimpirotsi incani, eiro otimayetanajitsi oitsoqui pivanquire. Irotaque pincamitantajeiteari intsipaite anta cameetsaiteriqui quipatsi impempiri.
18 “Pinquenqueshiretasanotero ocapee nocamantaquempiri, pimaatacotearo pacoqui aisati pishiticainatacotearo pivancainapeequi. Irotaque irioyeetantempiri.
19 Poametapinijeiteri pitomipee ocantayetiri anta pivancopeequi: ariorica paniitacairi, irotajantsirica pimaaje aisati ariorica pintinaamane.
20 Pisanquenatacoyetero otincamipeequi pivanco aisati piqueapinitantaroriqui.
21 Irotaque pintimanteari osamani aisati pitomipee anta quipatsiqui icantitacariri Tasorentsi intacantajeitaqueerini nompajeiteri, pinquempetantearori inquite ocantani otimi.
22 “Ariorica pinquearioventasanojeitero pimoncaratero maaroni icantacantiri oca nocantaquempiri pimajeitero, aisati pinintasanoteri Avincatsarite Tasorentsi, pinquearioventasanotero pinquemisanteri,
23 irosati irimatacantempi panaacojeitanteariri savicayetatsiri nampitsipeequi. Pintsoncajeitanteariri shequiasanojeivetachari aisati neaperotasanoyevetachari.
24 Anta pinquenajeitanaquenta, irotaque pashiteari: omponeanaquea caaraiteriqui, irosati otishiqui Líbano, jero quenapaatsineri nijaqui Éufrates, irosati incajarequi Mediterráneo.
25 Tecatsi catsini piajeitavaquempine; tempa irio Avincatsarite Tasorentsi cantacaashireacaajeitearine. Intsaroacaashijeitantavaquempiri jaocarica pinquenayetanaqueri; tempa icantasanotitaca.
26 “Meeca noncamantempiro: pincoyeanontearo tasoncaventantsi iroorica oashinoncantsi:
27 ora tasoncaventantsi, ariorica pinquemisantajeitero icantacantiri Avincatsarite Tasorentsi oca nocamantajimpiri, iroquea oashinoncantsi, ariorica pimpincatsatashiyetanaqueari ijitasorentsitashiyeetari, aisati pintseencanajerorica icantacantiri aisati pojocanajerorica piquemisantiri Avincatsarite Tasorentsi.
28 -
29 “Ariorica irareetacaaquempi Avincatsarite Tasorentsi quipatsi pimanatacoventajeiteri, anta toncaariqui Guerizim pineanatacoteneri tasoncaventantsi. Iroquea toncaariqui Ebal, pineanatacoteneri oashinoncantsi.
30 Ora toncaaripee otimi intatiqueroqui nija Jordán, iipatsitequi canaaneopee savicatsiri opampaiteapai; omontetaro Guilgal tsipatarori Moré, otimantari inchatopee encina.
31 Meeca irotaintsi pimonteajeitearo nija Jordán, pimanatacoventajeitantearori quipatsi impashijeitaquempiri Avincatsarite Tasorentsi impempiri. Ariorica pimanatacoventajeitaquero aisati pisavicantajeitaquearo, ocameetsati pimajeitero maaroni icantacantiri, oca noametapinijeitaquempiri.
32 -
