Deuteronomio 12:1-32
12 “Jero oca icantacantiri Tasorentsi. Ocameetsati pimatapinijeitero ariorica pisavicantajeitapaaquearo quipatsi impempiri Tasorentsi, icantasanotaqueriri intacantajeitaqueerini.
2 “Ariorica pimanajeitaqueri nampitsipeequiniri, pintsonquitasanojeitanaqueri yoatiantariri ijitasorentsiyetiri ipincatsatapinitantariri: yoayetiri toncaariqui, otishipeequi jero ishaaviji antearomencoyetatsiri inchato.
3 Pintatsinquitayeteri itaantayetanariri, pimporoquitajeiteri imapinepee, pintaitajeiteri irinchatorepee ipincatsayetiri, aisati pintsonquitajeiteri ishiacantayevetari ijitasorentsitiri, tecatsiquea quenqueshireacotanajerine.
4 “Eiro piquempetacantiritsi Avincatsarite Tasorentsi ariorica pimpincatsateri. Irointiquea incoyeaquerica jaocarica ontimeri Inantari iipatsitepeequi acarajeitiri, aitaque pijatapinijeiteri pimpincatsatanteariri.
5 -
6 Aitaque poyeneriri pivirapee pintayeneri aisati paajeitanaqueneri diezmo jero picashiacairiri aisati pampashiteariri, jeri aisati jivatatsiri itimi irijani pivacate jeri povishate.
7 Aitaque poimentajeiteariri Avincatsarite Tasorentsi. Pincaratero pijinapee jeri pitomipee pinquimoshireventajeitero oitsoquipee pivanquire intasoncaventajeitempiri.
8 “Eiro piquempetacantajeitirotsi antajeitiri aca, antanontayeta acoacaayetari arori.
9 Queario, tequerata meeca pareejeitearo quipatsi impempiri Avincatsarite Tasorentsi, pisavicajeitanteari cameetsa.
10 Ariorica pimonteanaquearo nija Jordán pisavicajeitantapempari cameetsa, eiro pamaanajaritsi irashereajeitajempi quisajeitempineri aisati eiro pitsaroajeitanajitsi.
11 Impoiji incoyeaque Avincatsarite Tasorentsi irinantapiniteari, aitaque paapinijeiteneriri maaroni nocantaquempiri: pivirapee poyeneriri, pintaasanoyeteneriri, jero aparotatsiri pimpashiyeteariri aisati picashiacayetiriri.
12 Aitaque pinquimoshireventapiniteriri, pincaratero pijinapee, pitomipee, pinampirepee jeri ishanincapeeni Leví saviquimojeitimpiri; tempa tecatsi iriori iipatsite.
13 “Quearioyea pitaashiyetanaricari Tasorentsi pivira jaocapeerica.
14 Apatiro pintaapiniteneri jaocarica ontimeri Irinanteari incoyeaqueri, aitaque pimoncaraterori maaroni nocantaquempiri.
15 “Aintiquea jaocarica pisavicayetapeeri, ocameetsati poyeri pivira itasoncaventaquempiri Avincatsarite Tasorentsi. Omavetaquea teerica pimoncaratero amejeitari, ocameetsati poajeiteari maaroni picoiri, pinquempetacanteri maniro jeri gacela.
16 Irointiquea iriraja pojoquero, eiro catsini poajeitarotsi.
17 “Aisati eiro poajeitarotsi pinampipeequi picashiacayetiriri tirico, oreji orivo, irijanipee pivacate jeri povishate jivayetatsiri itimi jero picashiacayetiriri picoacaari.
18 Aintiquea paapinitero anta Irinanteariqui Avincatsarite Tasorentsi, aitaque pinquimoshireventajeiterori oitsoquipee pivanquire pantaveeventiri. Pincaratero pijinapee, pitomipee, pinampirepee jeri iriori ishanincapeeni Leví.
19 Eiro pipeacojeitaritsi pimperi iriori iroyeari; tempa iriotaque picarajeitiri.
20 “Ariorica impaquempiro Avincatsarite Tasorentsi quipatsi antearoite icashiacaaquempiri, picoaquerica poajeitea ivatsa, aitaque poajeitaquea jaocarica pinintacaari.
21 Ariorica pisavique areejiqui, eirorica pisaviquimotirotsi Irinanteari Avincatsarite Tasorentsi, aitaque poyeriri pisavicajeitapaaquenta pivacate iriorica povishate itasoncaventaquempiri. Aitaque poajeiteariri maaroni picoacaari, pimoncaratero nocantaquempiri.
22 Aisati iquempeta iriorica gacela aisati maniro, eiro pititaritsi, ocameetsati poajeiteari. Omavetaquea teerica pimoncaratero ameyevetari.
23 Iro cantaincha eiro catsini poajeitarotsi iriraja aisati eiro poacotarotsi ivatsa; tempa irotaque oaneajeitiriri iriori.
24 Ocameetsati pojoquero quipatsiqui, eiro poajeitarotsi, pisavicantajeiteari cameetsa aisati iriori pitomipee. Tempa pimoncarataquero ineacameetsatiri Tasorentsi.
25 -
26 Irointiquea paitapeerica pinashitacayeari pimperiri jeri pincashiacayeriri, paanaqueri anta Irinanteariqui Avincatsarite Tasorentsi; aitaque pintayeneriri. Ora iriraja pisaitantearo altar, irointiquea ivatsa ocameetsati poajeitearo.
27 -
28 “Pinquemasanojeitavaque, pimoncaratero maaroni nocantaquempiri, pisavicanteari cameetsa aisati iriori pitomipee pincanteani. Tempa pimoncarataquero ineacameetsatiri Tasorentsisanori Pitasorentsite.
Icantasanotiri eiro ijitasorentsitashiyetatsi.
29 “Ariorica irimatacaajeitaquempiri Avincatsarite Tasorentsi savicajeitatsiri nampitsipeequi, pintsoncajeitaqueririca, aisati pisavicantajeitajearorica iipatsitepee; queariompiyea piquempetacojeitapaaricari pijatashitiricari ijitasorentsiyetiri, picoashireanaquecari pimpincatsateri.
30 -
31 Eiro pantimojeitiritsi Avincatsarite Tasorentsi caari ineacameetsati, eiro yamavetacotimpirotsi. Tempa irotaque yantayetiri savicajeitatsiri nampitsipeequi. Ariorica ipincatsatapinitiri ijitasorentsiniroyetiri, ¡yoiniri itomipee itainiri!
32 “Irointiquea pimatapinijeitero maaroni nocamantaquempiri. Eiro catsini pisanquenatajitsi pashini, aisati eiro piveayetajirotsi.
