Deuteronomio 13:1-18
13 “Intimerica picarajeitiri conijatashitanainchane incamantantero paitarica, iriorica mishiveetashiyetachari, incamantempirorica avisayetatsineri caari pineapiniti,
2 ariorica omoncarataquea incamantempiri, irosati incantantempi: ‘¡Tsame ampatotimentajeiteari pashini tasorentsiyetatsiri caari piojeiti ampincatsajeiteri!’
3 ¡Eiro piquemisantiritsi! Tempa icoaque Avincatsarite Tasorentsi irineantajeitempi queariorica pinintasanoteri aisati pishiretasanoteari.
4 Ocameetsati pinquearioventasanotero pimpincatsateri Tasorentsi apaniro; pimoncarajeitero icantacantiri. Pinquemisantero irineane aisati pampatotimentajeiteari. Pincanteani quiso poanaqueri.
5 Irintiquea camantantashiyetachari iriorica mishiveetashiyetachari, ocameetsati poacanteri. Tempa icoacaajeitaquempi pimpiatsateari Avincatsarite Tasorentsi oipacaacoventajimpiri iperanayeevetantaquempiniri Egiptoqui. Aisati icoacaaquempi pimpeacojeitearo icoacaavetaquempiri Pitasorentsite pimoncarajeiteri. Ocameetsati poyeri. Eiroquea ishequiantanacatsi antacaayetempirone caari cameetsatatsi.
6 “Iriorica pirenti, pitomi, pishinto, pijina jeri pitsipatapinivetari, ariorica irimanacayempi pincarajeitanteariri pimpincatsateri ijitasorentsiyeetiri caari pioyetini aisati caari ioti intacantajeitaqueerini, ijitasorentsitashiyetari savicayetatsiri quempeji aisati pashinisatipee areejipeequiniri quipatsi;
7 -
8 eiro piquemisantirotsi incoacaavetempiri, aisati eiro pipincatsatiritsi. Eiro catsini picavintsairitsi iriori; eiro pintacoshirearitsi aisati eiro pimanacotiritsi.
9 Ontimatiye poyeri. Avirotaque intearine pimpicheeri, impoijiquea impichaanajeiteri pishanincapee irosati incamantaquea. Tempa icoacaajeivetaquempi pimpeacotearime Atasorentsite oimishitoajeitajimpiri iperanajeitanteevetaquempiniri Egiptoqui.
10 -
11 Impoijiquea iriojeitanaque ashanincapee, irotaque intsaroajeitantanaqueari, eiroquea yantapinijeitantajarotsi caari cameetsatatsi.
12 “Ariorica pisavicayetapee nampitsipeequi impempiri Avincatsarite Tasorentsi, pinquemacotaqueririca nijantaca piatsatariri Tasorentsi, ipincatsatacaashiyetacari ashanincapee ijitasorentsitashiyeetari caari pioti;
13 -
14 Ontimatiye pamenasanotero piquemaqueri. Queariotasanotaquerica ora yantimotasanotaquempiri caari pineacameetsatacotiri,
15 irosati pijatashijeitantaqueari savicajeitatsiri nampitsiqui, poajeiteri. Pintsonquitajeitanaqueri ivirapee aisati timimoyetiriri.
16 Impoiji paajeitero irovararopeeni, pimpiojeitero nianqui nampitsi, irosati pintaantajeitaquearo, ontsoncantanaqueari. Pinquempetacantero pivira pitaasanopinitiniriri Tasorentsisanori Pitasorentsite. Pintsoncasanotanaquea nampitsi, omporocayetanaque, tecatsi catsini matajerone irovetsiqueetajero.
17 “Eiro catsini paayetavaquetsi. Pintsoncasanojeitero pintayero, eiroquea iquisajeitantimpitsi Tasorentsi; irointi irineshinoncajeitempi aisati iroshequiacaasanojeitempi, tempa irotaque icantasanotaqueriri intacantajeitaqueerini,
18 ariorica pincanteani pinquemisantasanoteri Avincatsarite Tasorentsi, pimoncarajeitero icantacantiri nocamantajimpiri aisati pantasanojeiteneri ineacameetsatiri.
