Deuteronomio 16:1-22
16 “Ariorica irimoncaratapaajea cashiri Abib, aitaque pimoncaratapinijeiterori pinquimoshireventajeitero yavisantaniri inampire Tasorentsi. Irotaque pimpincatsatapinijeitanteariri Avincatsarite Tasorentsi; tempa iriotaque cashiri yoimishitoajeitantajeeri tsiteniriqui asavicantajeivetaniri Egiptoqui.
2 “Aitaque paapiniyeteneriri Tasorentsi Irinanteariqui iriorica pivacate aisati povishate, poyeneriri.
3 “Aitaque poapinijeiteariri. Pisomatantapiniteari tanta caari tapiacha oncarate 7 quitaiteri. Irotaque quenqueshiretacayempirone yoashinoncaajeitanteevetaquempiniri Egiptoqui. Pincanteani pinquenqueshiretapinitero quitaiteriqui ashintsitantacari ashitoajeitanaji.
4 Ora caratatsine 7 quitaiteri, eiro catsini otimayetitsi tapiacaarori tanta maaroni ivancopeequi ashaninca. Aisati ivatsapee, eiro poanontayetavajatsi poantamanajeariri.
5 Ariorica pinquimoshireventajeitero yavisantaniri, eiro poayetiritsi pivira jaocapeerica pisavicayeteri impempiri Avincatsarite Tasorentsi, ainti paapiniteri anta incoyeasanoterinta Irinanteari. Poanteariri ariorica irishaavijiiteanaje catsirincaiteri, pimoncaratajero ashitoajeitantanajari Egiptoqui.
6 -
7 Irosati pintashitantaquearo ivatsa, aisati aitaque poajeiteariri. Ariorica onquitaiteamanaje, irosati pijajeitantanajea pisavicayetapaaquenta.
8 Oncarate 6 quitaiteri poajeitearo tanta caari tapiacha. Iro caratapaatsine 7, irotaque pampatojeitanteari pinquimoshireventeri Atasorentsite. Tecatsi catsini antaveeyetatsine.
Apitetatsiri iquimoshiretantari.
9 “Ariorica avisanaque 7 tomincopee ora pintaantacarori paviijeitiro pivanquire, aitaque pinquimoshireventajerori. Pamayetajeneri Avincatsarite Tasorentsi picoacayetari pimpincatsatanteariri. Tempa iriotaque tasoncacoventaquempirori.
10 -
11 Irosati pinquimoshireventantaquearo anta Irinanteariqui. Pincaratero pijinapee, pitomipee, piveranaropee, ishanincapeeni Leví, pashinisati saviquimoyetimpiri, camatsiri iriri jero camajimentaaro.
12 Pinquenqueshirejeitajero iperanayeevetaquempini Egiptoqui. Irotaque ocameetsatantari pimajeitero maaroni icantacantiri.
Yovecarantarori iquimoshiretantari.
13 “Ariorica pintsoncayetaquero paviiyetiro tirico, aisati picamitsoajayetiro ova, irosati pinquimoshireventantajearo povetsicantayetacarori pivancoshetajaniquipee oncarate 7 quitaiteri.
14 Ocameetsati pinquimoshirejeite; pincaratero pijina, pitomipee, piveranaropee, jeri ishanincapeeni Leví, aisati saviquimoyetimpiri, camayetatsiri iriri jero camajimentaaro.
15 Oncarate 7 quitaiteri pinquimoshirejeite, pimpincatsatanteariri Avincatsarite Tasorentsi anta Irinanteariqui. Irotaque intasoncacoventantempirori pivanquirepee aisati paitapeerica pantayeteri. Tecatsi coiteimojeitempine, cameetsa pisavicajeite pinquimoshirejeitanteari.
16 “Maaroni shiramparipee oncarate mava irijatapinite anta Irinanteariqui Atasorentsite osarentsipeequi. Jero inquimoshireventapiniteri: yoapinijeitantarori tanta caari tapiacha 7 tomincopee, jero yovetsicantayetarori ivancoshetajaniquipee. Tecatsi jatashiyetachane, ocameetsati iraayetanaque aparopeeni iriori ocarati itasoncacoventayetaqueriri Avincatsarite Tasorentsi.
17 -
Incantacoventante cameetsa cantacoventantayetatsiri.
18 “Ocameetsati pincoye cantacoventantatsineri jeri amitacoyeterine. Iriotaque vetsicayetenerine ashaninca anta nampitsipeequi impempiri Tasorentsisanori Pitasorentsite, paitapeerica irantaque. Ocameetsati incantacoventantasanote cameetsa.
19 Te oncameetsate poashiniyero queariotasanotatsiri piquenqueshiretiri, aisati eiro pinashitacaaritsi itsipa. Aisati eiro picoitsi impeetempi quirequi poashinoncaacantanteariri pishaninca. Ariorica pincoashiyetanaquearo oca, eiro picantacoventantanajitsi cameetsa, aisati eiro piquemisantanajiritsi neanavetachari cameetsa.
20 Apatiro pinquenqueshiretasanojeitanaquero queariotasanotatsiri, pimajeitanteari pisavicajeite cameetsa anta quipatsiqui impempiri Tasorentsisanori Pitasorentsite.
21 “Eiro catsini pipanquiyeti inchato pimpincatsatanteariri povetsicashiyeteari, aisati eiro poimotirotsi altar pipincatsatantariri Tasorentsisanori Pitasorentsite.
22 Aisati eiro poveviricaayetitsi mapipee, piquempetaricari pincatsatiriri ijitasorentsitashiyeetari, irotaque ipinquiri Tasorentsisanori Pitasorentsite.
