Deuteronomio 17:1-20
17 “Eiro pitainiritsi Avincatsarite Tasorentsi amashiyetachari vaca, iriorica ovisha jaocarica icantayetari. Irotaque ipinquiri.
2 “Jaocarica pinampiyetapemparori impempiri, irineetaqueririca ashaninca iroorica tsinane irantaquero caari icoacaimpi Avincatsarite Tasorentsi, impiatsataquearo Icantacantiri,
3 impincatsatashiyetaquearirica ijitasorentsiyeetiri intiyeroashitaqueari, iriorica catsirincaiteri, cashiri, impoquiropee, caari icoacaavetari Tasorentsi,
4 ariorica pinquemacotaqueri; ocameetsati pamenasanotero queariotasanotaquerica. Irosati paantanaqueari papatotapinijeitanta pincantacoventanteariri impichaanayeeteri, irosati incamantaquea.
5 -
6 “Incaraterica apite camantacoterine, ariorica mava, aitaque poacantaqueri. Irompa aparorica, eiro poacantiritsi.
7 Yora camantacoterine, iriotaque jivaterine impicheeri. Impoijiquea impichaanajeiteri maaroni ashanincapee, eiroquea ishequiantanacatsi antirori caari cameetsatatsi.
8 “Ariorica ontimimotaquempi pomerentsitasanotachari, iroorica oantantsi, antavacantsi, tsecavacantsi aisati paitapeerica avisayetatsine pinampiqui, teerica pimatero pincantacoventante; ocameetsati pijate anta Inantariqui icoyeaqueri Avincatsarite Tasorentsi.
9 Pinquenquetsatacaapeeri antaveetatsiri ishanincapeeni Leví jeri pashinipee cantacoventantayetatsiri, jaanicarica pineapaaqueri, iriotaque pincamantapeeri oca avisayetaintsiri. Impoijiquea incamantayetempiro jaoca pincanteriri pincantacoventantayeteariri antayetaquerori ocapee.
10 Impoijiquea pimoncaratasanotapeero maaroni yoametavaquempiri, eiro catsini poashiniapairotsi.
11 -
12 Jaanicarica cantashiveetapaachane, eirorica iquemisantirotsi icantavetari antaveetiniriri Tasorentsi, iriorica cantacoventantatsiri, ocameetsati poacanteri. Eiroquea ishequiantatsi antayeterone caari cameetsatatsi.
13 Ariorica inquemacojeitaqueri pishaninca, irotaque intsaroajeitantanaqueari, eiroquea ipiatsajeitantatsi iriori.
Iotacaasanotiri pincatsariyetatsine.
14 “Ariorica pareejeitaquearo quipatsi impempiri Avincatsarite Tasorentsi, pimanatacoventaquerorica pisavicantajeiteari, ariorica pincantajeite: ‘Acoajeiti intime pincatsariventajeiteeneri, anquempetanteariri savicayetatsiri nampitsipeequi itimayeti pincatsariventayetiriri,’
15 ocameetsati pincoye pishanincasanori yora irinintacaaqueri Avincatsarite Tasorentsi. Te oncameetsateji pincoye pashinisati.
16 Yora pincatsariventempine te oncameetsateji irishequiacantayeteri cavaayopee, aisati eiro itiancayetitsi atiri anta Ejiptoqui iramantayeteari cavaayo irimanatacayeari. Tempa icantasanotaquempi Tasorentsi: ‘Eiro catsini pipiajeitanajarotsi Egiptoqui.’
17 Aisati te oncameetsate iraye oshequi ijina, opeacotacairicari ipincatsatiri Tasorentsi. Aisati eiro yoshequiiritsi oro jeri plata.
18 “Ariorica irintanaquearo impincatsariventempi, ocameetsati irisanquenatacotacantero oca nocamantaquempiri, iquempoyeacotaqueri antaveetatsiri ishanincapeeni Leví.
19 Incanteani quiso iroyero. Irotaque irineanatapiniteri quitaiteripeequi, irimatantearori impincatsatapiniteri Avincatsarite Tasorentsi aisati irimatapinitero maaroni icantacantiri.
20 Eiroquea ishemeventantaro, irijitacantea yanaacotaqueri ishanincapee. Aisati eiro ipeacotarotsi oca icantacantiri Tasorentsi. Irotaque intasoncacoventanteariri cameetsa, impincatsariventempi osamani, aisati inquempetajea irishanincajeitajeari iriori.
