Deuteronomio 18:1-22
18 “Yora ishanincapeeni Leví antaveetatsiri, eiro otimayetitsi iipatsite. Eiro iquempejeitimpitsi avinti ontimayete. Irotaque iraarantavaqueri pamapiniteneriri Tasorentsi. Irio tasoncacoventerine iraapinitanteari; tempa irotaque icantasanotaqueri.
2 -
3 “Jero iraayeteri antaveeyetatsiri, iramayeteri pishaninca iroyeneriri Tasorentsi iriorica vaca jeri ovisha iraanontavaqueari imititsa, inoma jero imonqui,
4 aisati jivatatsiri oitsoquiyeti: tirico, ovaja, oreji orivo jero ivitipee ovisha iroaquera yameetiri.
5 Tempa iriojeitaque inashitacaacari Avincatsarite Tasorentsi aisati ishanincasanoripee incantaitatiyempani irantaveetapinite impincatsatapinitanteariri.
6 “Ariorica irisavicayetapee ashaninca jaocapeerica, incarataqueririca aparoni ishanincani Leví icoapaajirica impocaje Irinanteariqui Atasorentsite, ocameetsati irantaveetaje incaratapaajeri antaveetiniriri Tasorentsi.
7 -
8 Aisati iraapaje iroanaro yaapinitiri ishanincapee, jero ipeeyetiriri iririni.
Icantasanotiri eiro yantantarotsi yantayetiri pashinisati atiri.
9 “Ariorica pareejeitaquearo quipatsi impajeitempiri Avincatsarite Tasorentsi, eiro pantayetapairotsi yamejeitari savicajeitatsiri nampitsipeequi, piquempejeitaricari.
10 Aca picarajeitica, tecatsi aayeterine itomi intaanteariri, aisati eiro pantayetirotsi iotashinirotantarori paitapeerica. Eiro picantashiyetatsi timatsi avisayetatsine coajica; eiro pisheripiariyetitsi.
11 Aisati eiro povetsicayetitsi piotashiyetanteari. Eiro paventayetaritsi iotashiniroyevetachari jeri quenquetsatacaashiyetariri shiretsiyetatsiri, aisati camayetatsiri.
12 Oshequi ipinquiri Avincatsarite Tasorentsi antayeterone ocapee. Irotaque irishinejeitantempiri pintsoncajeiteri savicayetatsiri nampitsipeequi. Te oncameetsateji catsini yantajeitiri.
13 Ocameetsati irointi pincameetsashirejeitanaque, pinquemisantasanoteri Tasorentsi.
14 Yora savicayetatsiri nampitsipeequi pisavicayetapenta, iquemisantayetiri iotashiyetarori avisayetatsineri coajica jeri ionirotashiyetachari. Iro cantaincha yora Atasorentsite te irishinetempiroji pantajeitero ocapee.
Impoque camantantatsineri quempetajearine Moiseshi.
15 “Coajica intianque Avincatsarite Tasorentsi camantantatsiri quempetajenane, ocameetsati pinquemisantajeitavaqueri.
16 Tempa irotaque picoacotaqueriri anta toncaariqui Horeb, apatojeitantacari. Picantantacari: ‘Te noncoajeitaje nonquemajeri irineanataje Avincatsarite Tasorentsi, aisati te noncoaje noneajeitajero amorecatsantsaatatsiri paamari, nocamajeiticari.’
17 Irosati icantantaquena Tasorentsi: ‘Cameetsataque icantajeitaqueri.
18 Coajica nontianqueneri camantantatsine quempetajempine. Iriotaque pishanincasanori camantayetajempirone paitarica noncanteriri, irotaque iroaajempiri.
19 Maaroni caari quemisanterone incamatacoyevetenari, aitaque noncantimentaqueri coajica.
20 Irintiquea cantashitachari: Noquenquetsatacotiri Tasorentsi, incantashiyetapaaquea caari nocantayeveta, inquenquetsatacotashiyetapemparirica ijitasorentsitashiyetari, ocameetsati poacanteri.’
21 Ariorica pincantajeite: ‘¿Jaoca ancantajeiteari ayotanteari irotaquerica irineane Tasorentsi icantaqueeri, irompa caaririca?’ Ocameetsati pinquenqueshirejeitavaquero oca.
22 Ariorica incamantayetempiro icantiri, teerica omoncaratea, aitaque piotanaquerori te irio canterine Tasorentsi. Irisati coashitacha incantashiyetea, icoaque impincatsatanteeteariri. Iro cantaincha eiro pitsaroacaashitaritsi.
Irinashitacaayeteari nampitsipee iraventeari.
(Núm. 35.9-28; Jos. 20.1-9)
