Deuteronomio 2:1-37
2 “Irosati apiajeitantanajaro caaraiteriqui, aquenantajeitanajaro avotsi jatantachari incajarequi Quitioncari, noquemisantaquero icantaquenari Tasorentsi. Oshequi osarentsi aniijeitaque, ashoncajeitacaro toncaaripee quipatsiquiniri Seír
2 Irosati icantantajana Tasorentsi: ‘Oshequitaque osarentsi pishoncacaro oca toncaaripee, meeca pijajeitaje pinquenajeitanaje quirinca.
3 -
4 Pincantajeiteri pishanincapee: Ari anquenajeitanajeri Seíriqui isavicajeitinta ashaninca yora ishanincapeeni Esaú. Oshequi meeca itsaroacaajeitaquempi, iro cantaincha ocameetsati paamaventajeitea.
5 Eiro pimanajeitapairitsi aisati te noncoacayempiji paarantiteri capichaji iipatsite. Tempa narotaque paqueriri irisavicajeitanteari irishanincajeitajeari coajica.
6 Irointiquea pincoacotapeeri impimantempiro poajeiteari aisati pimpinajeitero nija pirajeiteri.’
7 Icantani Atasorentsite itasoncacoventaquee, aisati iticaacoventaquee maaroni paitapeerica antayetaqueri. Icantani quiso yoajeitaquee irosati omoncaratantaca 40 osarentsi aquenaquenajeitantacari antearoitequi caaraiteri; tecatsi coiteimotaqueene.
8 “Irosati ajocantanajaro avotsi quenantachari Arabá, jero quenantachari Elat aisati Esión-geber. Avisanaquero iipatsite ashanincapee, yora ishanincapeeni Esaú. Aitaque ashoncajeitanajari areetantajarori avotsi jatantachari caaraiteriqui moabaquiniri.
9 Impoiji icantajana Tasorentsi: ‘Eiroyea pashereapairitsi ishanincapeeni Moab, aisati eiro pimanajeitapairitsi; tempa iriojeitaque ishanincapeeni Lot. Aisati te noncoacayempiji paarantiteri capichaji quipatsi Ar; tempa irotaque nopaqueriri.’ ”
Iquenquetsatacotiri savicantaroniri quipatsi Ar
10 (Ora quipatsi Ar irotaque isavicantajeitaniri emitapee, oshequi catsini inajeitini aisati antearitsantsapee, iquempejeitarini ishanincapeeni Anac.
11 Yora atiripee ijitashitari iriori refaítapee, irioquea ishanincapeeni Moab ijitiri emitapee.
12 Iroquea Seír, aitaque isavicajeitiniri iriori horeopee. Iro cantaincha yora ishanincapeeni Esaú itsoncajeitaqueri, irosati yaajeitantajaro iipatsiteni. Iquempetaquero ishanincajeitaniri Israel itsoncajeitaqueri savicayetatsiri quipatsiqui Canaán, ipaqueriri Tasorentsi.)
13 “Ari icantajeitajee Tasorentsi: ‘Povaajeitanajea, pimonteanajero osanteni Zéred.’ Irosati amonteantajeitanajaro.
14 “Aponeajeitantanajarori Cadés-barnea, irosati amonteantajeitanacaro osanteni Zéred, ocarataque 38 osarentsi. Aitaque icamajeititaca ashanincapee manajeitacharini; omoncarataca icantasanotaqueri Tasorentsi.
15 Tempa omapocaqueri itasorenca Tasorentsi, icamajeitantacari maaroni.
16 “Ari icamajeitantacari maaroni yora manajeitacharini, irosati icantantajana Tasorentsi:
17 -
18 ‘Pavisajeitanajero otsapitapaaca Moab, irosati pinquenantajeitanajea anta Ar.
19 Ariorica pineajeitapeeri ishanincapee Amón yora ishanincapeeni Lot, eiro pashereapairitsi aisati eiro pimanajeitapairitsi. Te noncoacayempiji paarantitapeeri capichaji iipatsite; tempa irotaque nopajeitaqueriri.’ ”
20 (Ora quipatsi Ar, irotaque isavicantaniri refaítapeeni. Yora amonitapee ipajitirini zomzomeopee.
21 Antearoite inampini aisati yoshequiasanotini antearitsantsapee, iquempejeitarini ishanincapeeni Anac. Iro cantaincha ishinejeitaqueri Tasorentsi amonitapee itsoncajeitantacariri, irosati yaitajeitantajari iipatsite.
22 Iquempetacantaqueri ishanincapeeni Esaú yora horeopeeni, itsoncajeitantacariri, yaapitsajeitaqueri iipatsite. Aisati iquempeyeetaqueri iriori heveopeeni savicajeiveitachaniri nampitsijaniquipeequi quempejitarori nampitsi Gaza. Yora filisteopee iponeajeitaca ovoyeshitanaque Creta; yoajeitapaaqueri, irosati isavicajeitantapaaca inampipeeniqui.)
23 -
24 “Irosati icantantajee Tasorentsi: ‘¡Tsame, povaajeitanajea, pimonteanajearo nijaqui Arnón! Narotaque matacayempirine Sihón yora amorreo, pincatsariventirori anta nampitsi Hesbón. ¡Pimanajeitapeeri, paitajeitanteariri iipatsite!
25 Meeca nomatacaasanotempi intsaroacaasanojeitantempiri savicajeitatsiri maaroni nampitsipeequi; ariorica inquemacojeitavaquempi, impioncashijeitanaquea.’
Yoanteetacariri pincatsari Sihón.
(Núm. 21.21-30)
26 “Asavicajeitantapaacari caaraiteriqui Cademot, notiancaque camanterine Sihón pincatsariventirori Hesbón iraacameetsajeitantavaqueeri. Jeroca nocantavaqueriri:
27 ‘Nocoaque nonquenajeitapee piipatsitequi, apatiro nonquenantajeitapemparo piquenantapinijeitari, eiro nantitayetanaquempirotsi paitapeerica timayetatsiri.
28 Ariorica oncoiteimojeitaquena noajeiteari aisati nirajeiteri, ario nompinatanaquempi. Irointiquea nocoaque pishinetavaquena navisajeitanaque.
29 Iquempejeitavaquena ishanincapeeni Esaú, savicatsiri quipatsiqui Seír, jeri iriori ishanincapeeni Moab, savicajeitatsiri nampitsiqui Ar, irosati amonteajeitantanaquearo nija Jordán, areejeitantearori quipatsi impashijeitaqueeri Atasorentsite impajeiteeri.’
30 “Iro cantaincha yora pincatsari Sihón, te incoye irishinejeitee anquenajeitapee iipatsitequi. Tempa irio Tasorentsi cantacaashireacacariri iquisoshiretantacari, imatacaajeitantaqueeri amanajeitaqueri, atsoncajeitantacariri.
31 “Irosati icantantajana Tasorentsi: ‘Meeca noshinejeitempiri Sihón pintsoncajeiteri maaroni, paajeitero iipatsite.’
32 “Ari ipocashijeivetaquee Sihón yamajeivetacari oshequi manajeitachari, irosati imanajeitantavetapaaquee anta nampitsiqui Jahaza. Iro cantaincha imatacaajeitaquee Atasorentsite atsoncajeitantacariri irinti, maaroni itomipeeni jeri maaroni manajeivetachaniri.
33 -
34 Aisati maaroni nampitsipeequiniri atsoncasanojeitaqueri, avajeitaqueri shiramparipee, tsinanepee, jananequipee; tecatsi timanajantsine.
35 Irintiquea aitajeitaqueri ivirapee aisati timimoyetiriniri pinatasanoyetachari.
36 Intanacaro amanajeitanaqueri savicajeitatsiniri nampitsiqui Aroer quempejitarori nija Arnón, jero nampitsi timatsiri oirincaiteapai irosati nampitsi Galaad. Tecatsi aparoni nampitsi piajeitavaqueene; tempa irio Atasorentsite matacaajeitaqueerori amajeitantacariri.
37 Apatiroquea irinti caari amanajeitanaque ishanincapeeni Amón aisati saviquimotirori nija Jaboc jeri pashinisatipee savicayetatsiri toncaaripeequi. Tempa iriotaque itsaneacojeitaqueeri Atasorentsite. Icantaqueeri: ‘Eiro pimanajeitanaqueritsi.’
Yoanteetacariri pincatsari Og.
(Núm. 21.31-35)
