Deuteronomio 20:1-20
20 “Ariorica pijajeite pimanateri quisajeitimpiri, pinquemacojeiteririca oshequi iyavaayote jero ishiacomentopee imanatacaajeitari, aisati yoshequitasanotaque manajeitachari carajeitiriri, yanaacojeitaquempi avinti; eiro pitsaroacaajeitaritsi. Pinquenqueshiretasanotea tempa quiso yoaquempi Avincatsarite Tasorentsi oimishitoajeitajeeri asavicantajeivetacaniri Egiptoqui.
2 Irotaintsirica pijate pimanajeitea, yora antaveetatsineri Tasorentsi ocameetsati incantavaqueri manajeitachaneri: ‘Pinquemajeite noshaninca, ariorica pijajeitaque pimanatea, eiroyea pitsaroajeititsi, aisati eiro picantashirejeititsi.
3 -
4 Tempa timatsi Avincatsarite Tasorentsi quisacoventajeitempine, pimajeitanteariri panaacojeiteri.’
5 “Impoiji incante iriori jivatacantatsiri: ‘Jaanicarica vetsicayetatsiri iroaquera ivanco, tequerarica intimantearo, eiro ijatitsi; yojocashitanacarocari iroyeetaqueririca, yaitajiricari itsipa.
6 Aisati jaanicarica panquitatsine iroaquera irovamashite, tequerarica iraayeteroji iroantearori, eiro ijatitsi; yojocashitanacarocari iroyeetaqueririca, yaviititajiricari itsipa.
7 Timatsirica aisati cashiayetarori tsinane iraantearori, eiro ijatitsi; yojocashitanacarocari iroyeetaqueririca, yaitajiricari itsipa icashiavetari.’
8 “Impoiji incantasanojeiteri manajeitachane: ‘¿Timatsimpa tsaroashireyetaintsiri caari neaperoyetacha? Itsaroashiretaquerica, eiro ijatitsi; yoimintsaroajeitiricari iriori acarajeitiri.’
9 Ariorica intsoncajeitaquero incamantajeiteri, irosati irijivatantanaquea jivatacaayetiriri manajeitachaneri.
10 “Ariorica pareejeitearo nampitsi, ocameetsati pijivate pincantapeeri savicajeitatsiri: ‘Tsame aacameetsatavacaajeitea.’
11 Ariorica incoaque irosati irishinejeitantaquempi pinqueajeitanaque maaroni, impoiji imperanajeitempi irishintsinajeitempi.
12 Irompa teerica incoajeite iraacameetsajeitempi, irointi incoajeitaque iromanatempi, irosati pishoncajeitantaquearo inampi; impoiji pimanajeiteri.
13 Irio Avincatsarite Tasorentsi matacaajeitempine pintsoncantajeiteariri savicajeitatsiri.
14 Irointiquea tsinanepee, jananequipee, ivirapee aisati paitapeerica timayetatsiri, iriotaque pashijeitajeari. Tempa irio Avincatsarite Tasorentsi coacaaquempirori paitantayeteariri.
15 Aisati pinquempeyetaquero otsipapee nampitsi timayetatsiri areejiqui, caari quempejitaro nampitsipee pisavicajeitapenta.
16 Irintiquea savicajeitatsiri nampitsiqui, impempiri Tasorentsisanori Pitasorentsite pisavicantajeitapaajeari; eiro pishinetiritsi aparo iravisacotaje. Pintsoncasanojeiteri hititapee, amorreopee, canaaneopee, ferezeopee, heveopee, jeri jebuseopee. Pinquempetacanteri, poapinitiniri Tasorentsi; tempa irotaque icoacaaquempiri;
17 -
18 eiroquea yoamejeitantimpirotsi yantanirojeitiri iriori. Ipincatsatashiyetari ijitasorentsiniroyetiri, pantimotiricari caari ineacameetsati Tasorentsisanori Pitasorentsite.
19 “Ariorica pijatashitero nampitsi pimanatanteariri savicajeitatsiri, osamani pishoncayetaquearo, eiro pichaquiyetapairotsi ivanquirepee. Tempa irotaque pantsoyetapeeri oitsoqui. Caari oni atiri omanatantempiri, irointi inchatopee.
20 Irointiquea pinchaquiyetapee caari yatsoyeeti oitsoqui. Irotaque paayetapeeri pataimentopee, pimatantearori pimanajeiteri manajeivetempine, irosati panaacojeitantaqueari.
