Deuteronomio 23:1-25
23 “Intimerica ivetacaitsoquiyeetiri, ariorica itoshiviyeetiri,
2 aisati inquempetea itomi yashitashiyeetari, jeri irishanincajeivetajeari; te oncameetsateji incarajeiteri ampatotimentajeitearine Tasorentsi.
3 “Aisati iriori ishanincapeeni Amón jeri ishanincapeeni Moab, aisati irishanincajeivetajeari iriori.
4 Tempa aponeantajeitanajari Egiptoqui, asotoimojeivetanacari, te impajeitavaqueeji nija aisati avajeiteari. Aisati ipinataqueri Balaam itomini Beor, poneainchari nampitsiqui Petor Mesopotamiaquiniri, yoamaimanajeitantavetavaqueeri.
5 Iro cantaincha yora Avincatsarite Tasorentsi te inquemisanteriji Balaam, irointi yoashiniajiro itasoncacoventajeitaquee; tempa oshequi inintasanojeitaquee.
6 Eiro meeca paacameetsajeitiritsi, aisati pincanteani eiro picarajeitiritsi.
7 “Irintiquea edomosatipee, eiro piquisanentiritsi, iriotaque acarajeitiri. Aisati pinquempejeiteri egiptosati; tempa aitaque asaviquimojeivetapaintariri iipatsitequi.
8 Yora irishanincajeitanajeari iriori, iriotaque quempejeitanajeeneri, quemisantajeitanajerine Tasorentsi.
Icantacantiro intecatsijeitanteari.
9 “Ariorica pimanajeiteri quisajeitimpiri jaocarica pisavicajeitapeeri, eiro pantavintsatavacaayetatsi, pantirocari caari cameetsatatsi.
10 Intimerica picarajeitiri aparajatashitarori imainequi ishiramparitantari, ocameetsati irishitoanaque nijanteaji, eirotsita ipoquitajatsi; tempa te incameetsatanaje. Ariorica irishaavijiiteanaque catsirincaiteri, irosati incaatantajea. Ariorica ontsitenijencaiteanaje, irosati impiantapaajea pisavicajeitaquenta.
11 -
12 “Aisati ariorica pishite, ocameetsati pijate nijanteaji, pincanteani paapinitero pinqueecashitantearori. Ariorica pishitaque irosati pintijacotantanaquearo.
13 -
14 Tempa icantani quiso yoimpi Avincatsarite Tasorentsi pisavicajeitaquenta, inticaacoventantempiri panaacojeitanteariri quisajeitimpiri. Irotaque ocameetsatantari pincaaraiteero pisavicantajeitari, irineacameetsatantearori Tasorentsi. Eiro otimayetitsi paitapeerica jencaayetatsine, eiroquea inijantareantimpitsi.
Jaoca incanteriri iperanayeetari.
15 “Intimerica iperanayeetari irishiapitsatajeririca peranatariri, ariorica incantapempi: ‘Nocoi nosavicapaaje,’ ocameetsati paavajeri. Eiro poipiavajiritsi nampitaririqui.
16 Pishineteri incaratapaajempi piipatsitequi irisavicantapaajeari jaocarica ocameetsatimotaqueriri nampitsi, tecatsi ashereanaterine.
Jero pashinipee caari icoacairi irantayeteri.
17 “Eiro itimitsi acarajeitica antayeterine ishiramparirinte jero tsinane antashiyetearine shiramparipee, quempetacotearineri pincatsatashiyetarori ijitasorentsiyetiri.
18 Eiro pishinejeitiritsi irijate Inantariqui Avincatsarite Tasorentsi, iraanaqueri quireequi ipinayeetiriri yantantarori caari cameetsatatsi, impinacoventantearori icashiacairiri. Tempa te irineacameetsateroji Tasorentsi antayeterone ocapee.
19 “Eiro pishintsinatiritsi pishanincapee impinatajempi, iriorica pimpaqueri quireequi iroorica oanarontsi, aisati paitapeerica pincoacotantajeariri quimota.
20 Irintiquea pishintsinate pashinisati, irompa yora pishaninca eiro pishintsinatiritsi. Irotaque intasoncaventajeitantempirori Avincatsarite Tasorentsi paitapeerica pantayeteri anta pisavicajeitapaajenta.
21 “Ariorica pincashiacayeteri Avincatsarite Tasorentsi paitapeerica, eiro pisamanitirotsi pimoncaratero. Eirorica pimoncaratirotsi, aitaque incantimentaquempiro; avirotaque cantacayearone pantaquero caari cameetsatatsi.
22 Irompa tecatsirica pincashiacaayeteri, eiro otimitsi pantane.
23 Irompa picoasanotaquerica pincashiacayeteri, ocameetsati pimoncaratasanoteneri.
24 “Ariorica pijate irovamashitequi pishaninca, ocameetsati poayetea oitsoqui pinintacaari. Iro cantaincha eiro paanaquetsi piantirequi.
25 Aisati ariorica pijate itiricomashitequi, ocameetsati pisapiriyayetanaque. Iro cantaincha eiro pipesacoyetanaquerotsi.
