Deuteronomio 24:1-22
24 “Ariorica iraavetearo shirampari tsinane, iro cantaincha teerica incoashireanajero ineaquerorica jaocarica ocantimotacariri, ocameetsati irisanquenataje cantacoterone: ‘Nojocajiro.’ Impoiji impajero, irosati intiancantajearo.
2 Ariorica ojataje, ocameetsati aaje pashini shirampari.
3 Iro cantaincha aisatirica inquempetajero iriori irimanintanajero, ocameetsati irisanquenataje cantacoterone: ‘Nojocajiro.’ Impoiji impajero, irosati intiancantajearo. Irompa ariorica incamaque ojimentavetajari,
4 eiro imatirotsi iraajero ojivavetacari. Tempa te oncameetsatanajeji. Irotaque caari ineacameetsati Tasorentsi. Aisati avirori eiro pantajeitirotsi, picaariperotirocari quipatsi impempiri Avincatsarite Tasorentsi.
Pashinipee icantacantayetiri.
5 “Intimerica shirampari iroaquera aatsine ijina, eiro ijatitsi iromanatea. Aisati eiro pantacairitsi paitapeerica antaveerentsiyetatsiri, irisavicashitavaqueatsita aparo osarentsi inquimoshiretacantearori ijina yaaqueri.
6 “Ariorica pimperi pishaninca paitapeerica, impinatantajempiri, te oncameetsate pincoacoteri tincaimentotsi, iroorica mapi itononcaitanteetari. Tempa irotaque yoantari iriori.
7 “Ariorica irineetaqueri acarajeitiri peacaashitearine ashaninca imperanatanteariri iroorica impimantaqueri, ocameetsati poacanteri. Eiroquea otimimotantimpitsi caari cameetsatatsi.
8 “Iroorica aayetempine patsaarontsi, pimoncaratasanotero maaroni incantempiri antaveetatsiri ishanincapeeni Leví. Ocameetsati incamantasanoyetempiro noquempetaqueri narori.
9 Pinquenqueshirejeitajero yoashinoncantacarori Avincatsarite Tasorentsi María nianqui avotsi aponeajeitantanajari Egiptoqui.
10 “Ariorica pimperi pishaninca timimoyetimpiri, eiro piqueanaquetsi ivancoqui pincoacotanteariri paitarica, paitavaqueriri.
11 Ainti pincatiapee saiteriqui, poyeeri iramaquempiro picoacotaqueriri.
12 Iriorica caari otimimotasanoyeti paitapeerica pempirone ivashicaro, eiro poimaacotitiritsi. Poimpiitajanteanari irishaavijiiteanajerica catsirincaiteri, impashicanajeari iriori irimaanajerica. Irotaque intasoncacoventantempiri Tasorentsisanori Pitasorentsite pantaquero cameetsatatsiri.
13 -
14 “Eiro pantaveetacaashitaritsi pishaninca, aisati eiro pitsaneapitsataritsi pimpinateri coiteaveeyetatsiri tsoncacoyetachari. Aisati pinquempetaqueri pashinisati saviquimojeitimpiri.
15 Ocameetsati pimpinatiteari tequera irishaavijiiteanaje catsirincaiteri; tempa irinti tsoncacori icoita quireequi iramanantanteari. Eirorica pipinatiritsi, ari iraventaqueari Tasorentsi incantantempiri: ‘Ainiro pantane.’
16 “Ariorica irantero caari cameetsatatsi iriri, eiro yoimenteetiritsi itomi. Aisati yantayetiri iriori itomi, eiro yoimenteetiritsi iriri. Aparopeeni incamimentero yantayetiri.
17 “Eiro picantacotashiyetaritsi pashinisati, aisati camayetatsiri iriri. Aisati eiro paitayetirotsi oitsaarepee camajimentaaro ompinatantajempiri.
18 Pinquenqueshirejeitajero iperanayeevetantaquempiniri anta Egiptoqui, yoimishitoajeitantajimpiri Avincatsarite Tasorentsi. Irotaque nocantantimpiri pimoncarajeitero maaroni ocapee.
19 “Ariorica paviijeitiro pivanquire, pipeacotanacarorica poisopatiyetaqueri, eiro pipiashitanajarotsi. Pishineteri iraajerota pashinisatipee saviquimoyetimpiri, iriorica camatsiri iriri, iroorica camajimentaaro. Irotaque intasoncacoventantempiri Avincatsarite Tasorentsi paitapeerica pantayeteri.
20 “Ariorica paviiyetero oitsoquipee porivomashite, eiro picoyeasanoyetanaquerotsi. Aisati pinquempetaquero povamashite, eiro paaperoyetanaquerotsi oitsoquipee. Iraviiyetajerota iriori pashinisati, camayetatsiri iriri jero camajimentaaropee.
21 -
22 Pinquenqueshiretasanojeitero iperanayeevetaquempini anta Egiptoqui. Irotaque nocantantimpiri pimoncarajeitero maaroni ocapee.
