Deuteronomio 25:1-19
25 “Ariorica impianatavacayea atiri inquisavacanteari, ocameetsati irijate anta icantacoventantapiniyeeti, incantacoventanteeteariri. Yora cantacoventantatsiri irio ioterine jaanica yanteetashitacari, irosati incantacoventantaqueari intacantacarori.
2 Ocameetsatirica impasatacanteri ari iroivotacanteri quipatsiqui irineacoventanteariri impasayeeteri. Irimoncaratajeneri ocarati yantaqueri.
3 Ocameetsati impasateri, eiro yoavisainiritsi 40 yoashinoncaasanotiricari ishaninca, icantashireacaasanotaricari.
4 “Eiro pipashicavantetiritsi vaca ariorica paaticaitacairi oitsoquipee pivanquire.
Ocantacotiri camayetatsiri caari itimi itomi.
5 “Intimerica ashaninca saviquimoterine irirenti, ariorica incamaque, teerica intimacayeroni ijina; eiro aashitajatsi pashini shirampari. Ocameetsati aajeri irirentini; tempa iriotaque ojimetsorisanori.
6 Ariorica intimacaajero otomi, ocameetsati impajitacotajeari iriritsorini, eiroquea opeantatsi ivajiro, intimantajeari irishanincatasanojeitajeari.
7 Irompa eirorica icoirotsi, ocameetsati ojate anta icantacoventantapiniyeeti. Oncantapeeri jivatacantayetatsiri: ‘Yora nojimetsori te incoyeji iraajena. Te incoyeji intimacaajena irishanincatasanotajeari irirentini pajitacotajearine ivajiro, carajeitajerine ashanincapee.’
8 Irosati incajemacantantaqueari incantasanotanteariri: ‘Ocameetsati paajero.’ Incantanaquerica iriori: ‘Te noncoye naajero.’
9 Impoiji ojatashiteri quempeji onijaacayeari jivatacantatsiri osaporeiteri ishineerate aisati onquitiojavoroteri. Oncante: ‘¡Aitaque incanteriri yora caari coatsi intime irishanincatajeari irirentini!’
10 Irosati impajiyeetantaqueari: ‘Ishanincapee isaporeiteetiri ishineerate.’ ”
Pashini icantacantayetiri
11 “Ariorica irantavacayea atiri, oneacoventaqueririca ijina ompocashitapaaqueririca, ontinincaitsoquitapeeri yora antaqueriri, ocameetsati pincantacoventero, impesavacoyeetero. Eiro picavintsairotsi.
12 -
13 “Ariorica pamanantayete aisati pimpimantayete paitapeerica, te oncameetsate pamatavitantearo mocaramentotsi tenayetatsiri aisati pimoncaratantari tsantsayetatsiri. Irointiquea pimoncaratantea cameetsatatsiri, intasoncaventajeitantempiri Avincatsarite Tasorentsi, pintimajeitanteari oshequi osarentsi anta quipatsiqui impajeitempiri.
14 -
15 -
16 Te irineacameetsateri Tasorentsi maaroni antayetirori ocapee, yamatavitavacantayetari.
Icantiri intsoncasanojeiteri Amalec.
17 “Pinquenqueshirejeitajero aponeantajeitanajari Egiptoqui. Aquenajeitantapaacari caaraiteriqui imanajeitavaquee Amalec nianqui, yoaarantavaqueri impoijeitatsiri caari neaperojeitacha, yatsanajeitavaquee; tempa amaojeitaque. Te impincatsatimateriji Tasorentsi.
18 -
19 Irotaque nocantantimpiri: Ariorica iroimpacaacoventaquempi Avincatsarite Tasorentsi, eiro itimanajitsi quisajeitempine savicantayetarori nampitsi pisavicantajeiteari, ocameetsati pintsoncasanojeiteri ishanincapeeni Amalec; tecatsi quenqueshireacotanajerine. ¡Eiroyea pipeacojeitarotsi!
