Deuteronomio 27:1-26
27 Yora Moiseshi jeri jivatacantayetatsiri icantajeitiri ishanincapee:
“Pimoncarajeitero maaroni noncantempiri.
2 Ariorica pimonteajeitanaquearo nija Jordán, pareejeitaquearorica quipatsi impempiri Avincatsarite Tasorentsi, ocameetsati pintitiye mapipee antearo impoiji pintiritantearo shoco onquitamarotantanaqueari. Irosati pisanquenatantaquearo maaroni icantacantiri Tasorentsi nocamantaquempiri. Ocameetsati pimoncaratero ariorica pisavicantajeitaquearo oshiocasanoyetapai panquirentsiyetatsiri impempiri Tasorentsisanori Pitasorentsite; tempa icantasanotitacari intacantajeitaqueerini.
3 -
4 Irotaque nocantantimpiri pimonteanaquearorica nija Jordán, ocameetsati pintitiye mapipee toncaariqui Ebal. Irosati pintiritantaquearo shoco.
5 Impoiji paayete mapi, povetsiqueneri Tasorentsisanori Pitasorentsite altar. Eiro poameetsayetavaquerotsi, apatsentseinaropee onayetaque.
6 -
7 Aitaque pintayeriri pivira aisati pintaimenterori iraacameetsatantajempiri. Aitaque pinquimoshireventeriri poimentajeiteari.
8 Pisanquenatacotaqueroyea mapiqui, nocamantayetaquempiri, cameetsa onconijatasanotaque.”
9 Irosatiquera icarajeitiri Moiseshi ishanincapeeni Leví antaveetatsiri, icantajeitiri:
“Noshaninca, pimajerejeite, pinquemisantasanotena noncantajeitempi. Meeca avirojeitaque ishaninca Tasorentsisanori Pitasorentsite.
10 Irotaque ocameetsatantari pinquemisantasanojeiteri aisati pimatapinijeitero icantacantiri nocamantaquempiri.”
Inquenquetsatacotero oashinoncantsiyetatsiri toncaariqui Ebal eirorica iquemisantitsi.
11 Aisati icantajeitaqueri:
“Ariorica pimonteajeitanaquearo nija Jordán, yora ishanincapeeni Simeón, Leví, Judá, Isacar, José jeri Benjamín, irio catiimojeitapeerone toncaari Guerizim, onantari tasoncaventantsi.
12 -
13 Irioquea ishanincapeeni Rubén, Gad, Aser, Zabulón, Dan jeri Neftalí, catiimojeitapeerone toncaari Ebal onantari oashinoncantsi.
14 Impoiji irineanate ishanincapeeni Leví quimojenca, incante:
15 “ ‘Irashinoncayea vetsicayetatsine ijitasorentsiteri iroorica ashiro irishiacantayeteri paitapeerica, irimanavetaqueari. Eiro ineacameetsatacotiritsi Tasorentsi.’ Ari icantajeitanaque maaroni ashanincapee: ‘Jee, aitaque oncanteari.’
16 “ ‘Irashinocayea caari pincatsaterine iriri aisati iriniro.’ Ari incantajeitanaje maaroni: ‘Jee, aitaque oncanteari.’
17 “ ‘Irashinoncayea oaitayeterine ishaninca yoaticashiyetirori iipatsite iraarantitantajeariri.’ Ari incantajeitanaje maaroni: ‘Jee, aitaque oncanteari.’
18 “ ‘Irashinoncayea amataviterine maviteajari inquenacaashitanteariri.’ Ari incantajeitanaje maaroni: ‘Jee, aitaque oncanteari.’
19 “ ‘Irashinoncayea caari cantacoventerine cameetsa pashinisati, camajimentaaro, iriorica camayetatsiri iriri.’ Ari incantajeitanaje maaroni: ‘Jee, aitaque oncanteari.’
20 “ ‘Irashinoncayea onaiterine ijina iriri; tempa te impincatsateriji.’ Ari incantajeitanaje maaroni: ‘Jee, aitaque oncanteari.’
21 “ ‘Irashinoncayea antashiyetearine poshiniripee.’ Ari incantajeitanaje maaroni: ‘Jee, aitaque oncanteari.’
22 “ ‘Irashinoncayea antayeterone iritsiro, irishinto iriri iroorica oshinto irinirotsori.’ Ari incantajeitanaje maaroni: ‘Jee, aitaque oncanteari.’
23 “ ‘Irashinoncayea antayeterone irairo.’ Ari incantajeitanaje maaroni: ‘Jee, aitaque oncanteari.’
24 “ ‘Irashinoncayea oacanterine ishaninca.’ Ari incantajeitanaje maaroni: ‘Jee, aitaque oncanteari.’
25 “ ‘Irashinoncayea aayeterine quireequi impinayeeteriri iroashitanteariri ishaninca.’ Ari incantajeitanaje maaroni: ‘Jee, aitaque oncanteari.’
26 “ ‘Irashinoncayea caari pincatsaterone oca nocamantaquempiri aisati caari moncaraterone.’ Ari incantajeitanaje maaroni: ‘Jee, aitaque oncanteari.’
Intasoncaventeri Tasorentsi quemisantiriri.
(Lev. 26.3-13; Deut. 7.12-24)
