Deuteronomio 28:1-68
28 “Queariorica pinquemisantasanoteri Avincatsarite Tasorentsi aisati pimatapinijeitero maaroni Icantacantiri nocamantaquempiri, irotaque irimatacantempiri panaacojeitanteariri maaroni nampitsipeequiniri.
2 Pineero tasoncacoventantsi, ariorica pinquemisantajeitaqueri.
3 “Intasoncaventempi pinampiqui aisati poanequi.
4 “Intasoncaventempiri pitomipee, pivanquirepee, irijanipee pivacate jeri povishatepee aisati paitapeerica pivirayeteari.
5 “Intasoncaventempiro piquempoyeantarori poapiniyetari jero pitashitantarori pitantane aisati maaroni paitapeerica pantayeteri.
6 -
7 “Imatacaajeitempiri Tasorentsi quisajeitempine. Ariorica irimanajeivetempi, iroveshintsaajeivetapaaquearica, iro cantaincha irishiapitsajeitanaquempi inquenashijeitanaquea jaocapeerica.
8 “Intasoncacoventasanotempiro pinquempoyeantayetarori pivanquirepee aisati maaroni pantayeteri; inquimoshiretacaasanojeitempi pinampiqui impempiri.
9 “Ariorica pimoncarajeitaquero maaroni icantacantiri aisati pinquemisantasanotanaqueri, incanteani irishanincatasanojeitempi; tempa inashitacaajeitaquempi picameetsatasanotaque; irimoncaratero icantasanotitacari.
10 Irosati iriojeitantanaquempi maaroni nampitsipeequiniri, avirojeitaque ishanincajeitajari Tasorentsi; irotaque intsaroacaajeitantempiri.
11 Oshequi incavintsaajeitempi Tasorentsi, irishequiacaasanojeitempiri pitomipee jeri irijanipee pivacate, aisati ontimasanoyete oitsoqui pivanquirepee anta quipatsiqui icantasanotitacariri intacantajeitaqueerini.
12 Incanteani irovariyempiro incani quipatsiqui coiteimotimpiri, oshiocasanoyetanteari cameetsa pivanquirepee pantaveeripeequi. Avirojeitaque payeterine pashinipee nampitsiquiniri, avintiquea eiro picoacotantayetitsi catsini.
13 Irimatacayempi Tasorentsi panaacotantajeite maaroni, tecatsi catsini anaacotempine. Avirojeitaque pincatsariventajeiterine pashinisatipee, tecatsi pincatsariventempine, ariorica pinquemisantero icantacantiri Avincatsarite Tasorentsi nocamantaquempiri aisati pimatapinijeitero.
14 Eiro catsini pipeacotarotsi, irointi pimoncaratero ocantayetiri, aisati eiro pipincatsatashiyetaritsi ijitasorentsitashiyeetari.
Irineajeiteri eirorica iquemisantiritsi Tasorentsi.
(Lev. 26.14-46)
15 “Irompa eirorica piquemisantiritsi Avincatsarite Tasorentsi, aisati eirorica pimajeitirotsi icantacantiri nocamantaquempiri, irotaque ompocashijeitantempiri oashinoncantsipee.
16 “Pashinoncaajeitea pinampiqui aisati poanequi.
17 Eiro otimitsi pivanquire piquempoyeantaroriqui poapiniyetari, eiro ocameetsatitsi pitashitantarori pitantane.
18 “Iroashinoncaajeitea pitomipee, aisati eiro ocameetsatitsi pivanquirepee paviiyeveteari jeri irijanipee pivacate, povishatepee aisati maaroni pivirayeveteari.
19 “Eiro ocameetsatitsi maaroni paitapeerica pantayeveteari.
20 “Iriotaque Tasorentsi tianquempirone oashinoncantsi, tsaviatantsi aisati oashiretantsi pantayevetearorica paitapeerica. Eiro osamanititsi intsoncasanojeitajempi; tempa pipeacotanacari pantashiyetanacaro caari cameetsatatsi.
21 “Irotaque intiancantempirori caamanetantsi tsoncajeitanaquempine anta nampitsipeequi pisavicajeivetapempanta.
22 Aisati intianquempiro mantsiarentsipee oamantatsiri: catsiirentsi, sompotsijenca, catsirincajencatantsi, osarentsiiteasanotanaque, oncamayetanaque pitiricomashite aisati omapocajeitempi mantsiarentsi pajencantatsiri oijanatanquempi irosati ontsoncantajeitajempi.
23 Eiro catsini pineimatajirotsi ompariaje incani, eiro oitsoquiyetanajitsi pivanquirepee.
24 Intianquemirome Tasorentsi incani, iro cantaincha irointi intiancajeitempiro quipatsijencari jero impanequijenca, irosati pincamantajeitaquea.
25 “Aisati impocashijeitanaquempi manajeitempineri. Pijatashijeivetanaqueari avirori, cameetsa piveshintsaajeivetanaquea, iro cantaincha irointi pishiapitsajeitanaqueri pinquenashiyetanaquea. Irineajeitaquempirica nampitsipeequiniri, oshequi iroajeitanaquempi cavaco.
26 Impocashijeitempi tisonipee jeri maniti oantayetachari, iroitajeitempiro pivatsani, tecatsi shancacoventempine.
27 “Iroashinoncaasanotempi Tasorentsi inquempetacantajeitempi ejiptosati. Intianquempiro patsaarontsijenca, eeretantsijenca jero patsetsijenca. Eiro pimayetirotsi paavintero.
28 “Aisati omapoquempi pineaveetashiyetanaquea, pincamarajaquiyetanaque, aisati pintsaviatashiyetanaquea, pintimpinacashiyetanaquea pinquempetanaqueari mavitiajari tsiteniriqui. Ora pantayeveteari eiro ocameetsatimojeitimpitsi. Pincanteani oquempequimotempi imperanayeetempi irishintsinayetempi pantaveete. Iro cantaincha, tecatsi amitacotimatempine.
29 -
30 Pincashiayevetea tsinane payeri, iro cantaincha pashini onaitempirone. Aisati povetsicayevetea pivanco, iro cantaincha eiro pisavicantayetarotsi. Ariorica pimpanquiyevetea povamashite, eiro poarotsi;
31 poayeveteari pivacate, iro cantaincha eiro poimataritsi ivatsa; pineacoventayeveteari iraiteetempiri paashinote, iro cantaincha eiro yoipaiyeetajimpiritsi; iraitajeitempiri quisaquempiri povishatepee, iro cantaincha tecatsi amitacotempine iraantavajempiriri;
32 pineacoventayeteri pitomipee jero pishintopee impimanteeteri pashiniqui atiri, maaroni quitaiteripeequi pincoapinivetea pineajerime, iro cantaincha eiro pimatacoventajiritsi.
33 Ora paviiyeveteari oitsoqui pivanquirepee, iroitajeitempiro atiri caari pineapinijeiti. Pincanteani pashinoncaajeitea imperanatasanoyeetempi, eiro yaacameetsayeetimpitsi.
34 Ariorica pineayetaquero ocapee, eiro piquenqueshiretanajatsi, irointi pineaveetashiyetanaquea.
35 “Aiquero iroashinoncaasanotempi Tasorentsi intianquempiro patsaarontsijenca oamaantatsiri. Ontsoncayetapempi piyeritopeequi, pivoripeequi, aisati maaroni pitsempequipeequi, eiro pimatirotsi paavintero.
36 “Aisati irishinetacoventempi Tasorentsi jeri pincatsariventimpiri irayeejeitanaquempi pashiniqui nampitsi caari pineapinitini aisati caari inei intacantajeitaqueerini. Aitaque pimpincatsayetapeeriri ijitasorentsiyeetiri vetsicayetachari inchato jero mapi.
37 Irosati iroajeitantanaquempi cavaco irantanayeetanaquempi, aisati irishirontimentajeitempi nampitsipeequiniri iraanaquempinta Tasorentsi.
38 “Pimpanquiyevetea oshequi pivanquire, iro cantaincha eiro paitsi oshequi oitsoqui, iroaarantitayetavaquempiro tsinaropee.
39 Aisati pimpanquiyevetea povamashite, pamenacoventapiniyevetaquearo. Iro cantaincha eiro poasanotatsi oitsoqui aisati eiro pirasanotitsi oja, intsonquitasanotavaquempiro quenitsipee.
40 Ontimasanoyevetea orivomashi pisavicayetapenta, iro cantaincha eiro pitiriyetarotsi oreji pincasancatanteari, oshequi osacoroncaiquitashiyetanaquea.
41 Intimayevetea pitomi jero pishinto, iro cantaincha eiro picarajeitiritsi, iraiteeyetanaquempiri pashinipeequi nampitsi.
42 Maaroni inchatopee jero pimpanquiyeveteari, intsonquitasanojeitempiro tsinaropee oitsoqui.
43 “Yora pashinisatipee saviquimoyetimpiri, aiquero irineaperotasanojeitanaquea. Avirojeiquea aiquero pijatanaqueri, eiro pineaperojeitanajatsi.
44 Impayetempi irinti, avintiquea tecatsi pimpayeteriri. Iriojeitaque neaperotanajanchane, aviroquea tecatsi pijitanajea.
45 “Ora oashinoncantsipee omapocajeitempi aajeitempi, oijanajeitanaquempi irosati ontsoncantajeitajempi. Tempa te pincoyeji pinquemisanteri Avincatsarite Tasorentsi aisati te pimoncaratero icantacantiri.
46 Oca oashinoncantsipee mapoquempineri avirori aisati pishanincajeitajeari, iotacantempiri te pimpincatsateriji Avincatsarite Tasorentsi, aisati te pinquimoshireventeriji; tempa ipavetaquempiro maaroni timimoyetimpiriri.
47 -
48 Irointi pantaveetasanotanaqueneri quisajeitimpiri intianquempiri Tasorentsi. Pinquemapinijeitero pitashe aisati pimire; oncoiteimotempi quitsaarentsi aisati paitapeerica. Iroashinoncaasanotempi Tasorentsi imperanatasanoyeetempi irosati pintsoncajeitantajea pincamajeitaje.
49 “Aisati intiancajeitempiri areejisati, caari piquematsatapiniyeti. Intsipaite impocapaaque, inquempejeitapempari yari anteariite paquitsa. Aisati incovencatasanotapaaque, eiro ipincatsayeetapairitsi anteashiparipee aisati eiro ineshinoncayeetapairitsi jananequipee.
50 -
51 Iroitayetapaaquempiri pivirapee aisati oitsoquipee pivanquire; intsonquitasanojeitanaquempiro timimoyetimpiri. Eiro yoanajimpitsi tirico, ovaja, oreji orivo aisati irijani pivacate jeri povishate. Aasanojeitanaquempi pitashe irosati pincamantajeitaquea.
52 “Aisati irishoncajeitapaaquearo pinampipee irimanajeitapaaquempi, irosati ontireantanaquea otanto antearoyevetachaneri aisati onquisotasanoyevetaquea paventapinivetari. Aitaque irimajeitaquero pinampipee, aisati piipatsite ipavetaquempiri Avincatsarite Tasorentsi.
53 “Ariorica irimanajeitaquempi, oshequi pintasheasanojeitanaque, poayetanaqueari pitomi jero pishinto itasoncaventavetaquempiri Avincatsarite Tasorentsi.
54 Aisati inquempeyetanaquea shiramparipee cavintsantayevetachari jeri nintantayevetachari picarayevetari, inquisanentayetanaqueri irirenti, ijina jeri itomi timaarantavetanajanchane eiro ipayetanajirotsi ivatsa iroyeari. Tecatsi paajeitanajero poayeteari. Irimanayeetaquempirica, oshequi iroashinoncaasanojeitempi manajeitempineri pinampipeequi.
55 -
56 “Aisati onquempeyetanaquea tsinanepee picarayevetari cavintsantayevetachari, cameetsatasanoyevetachari caari coavetacha aniicontatashitea, oncatsimajaquiyetanaqueri ojime onintasanovetari aisati otomipee. Eiro opaarantantayetanajaritsi isheito otimajaniyetiri, omanacaanaqueari. Tempa tecatsi poajeitanajeari irimanajeitaquempirica quisajeitimpiri pinampipeequi.
57 -
58 “Eirorica pimajeitirotsi maaroni nocamantayevetaquempiri sanquenatacoyetainchari, aisati eirorica pipincatsatiritsi Avincatsarite Tasorentsi yora Pincatsaritasantatsiri,
59 intianquempiro avirori aisati iriori pishanincajeitajeari antearoite covencayetatsiri oashinoncantsi, aisati mantsiarentsi oamaantatsiri, caari imayeeti iravinteetero.
60 Aajeitajempi aayetaqueriri egiptosati, oimintsaroajeivetanaquempiri, pincanteani pashinoncaapinijeitanaquea.
61 “Ainiro pashini intianquempiri mantsiarentsipee oashinoncayetempine caari sanquenatacotacha aca. Irotaque tsoncajeitempine.
62 Noshaninca, meeca pishequitasanojeivetaca catsini, piquempejeitacari impoquiropee. Iro cantaincha pintimanaje capichaji, eirorica piquemisantasanotiri Avincatsarite Tasorentsi.
63 Oquempetaca isavicacaajeitaquempi cameetsa, yoshequiacaasanojeitaquempi, aisati onquempetaquea intsoncasanojeitajempi anta nampitsipeequi pisavicasanojeivetapempanta.
64 “Yora Tasorentsi irovaraayetanaquempi jaocapeerica nampitsipeequi aisati pashinipeequi quipatsi. Aitaque pimpincatsayetapeeriri ijitasorentsitashiyeetari vetsicayetachari inchato, mapi, caari pineapinijeiti aisati caari ineapiniti intacantajeitaqueerini.
65 Anta pisavicajeitapenta, eiro pisavicajeititsi cameetsa aisati eiro pimaoreajeitanajitsi. Tempa incantacaashireacayempi Atasorentsite, pintsaroapinijeite aisati poashiretapinijeitea pinquenqueshireveetashitea.
66 Pincanteani isareapiniyetempi iroyeetempi; pintsaroapinijeite quitaiteriqui aisati tsiteniriqui. Eiro catsini pitimasanoyetitsi osamani.
67 Oshequi pintsaroacaajeiteari paitapeerica pineayeteri. Ariorica onquitaiteamane pincantapinite: ‘¡Cantenane intsipaite ontsitenitaje!’ Aisati tsiteniripeequi pincantapinite: ‘¡Cantenane intsipaite onquitaiteaje!’
68 Icantasanovetaquempi Tasorentsi: ‘Eiro pipiajeitanajatsi Egiptoqui.’ Iro cantaincha aitaque iroimpiajeitanajempi pitotsiqui impimanteetempi, iro cantaincha tecatsi coatsine iramanantavajempi.”
