Deuteronomio 29:1-29
29 Irotaque icantacantayetiri Tasorentsi, icantaqueriri Moiseshi irimoncaratacayeriri ishanincajeitaniri Israel anta Moabaqui, aisati icantitacariri toncaariqui Horeb.
2 Ari yapatotajiri ishanincapee, icantiri:
“Avirojeitaque neaquerori maaroni imataqueri Tasorentsi Egiptoqui, yonijantacariri yora Faraón jeri amitacoyetiriri. Avirotaque neasanojeitaquerori antearoite itasorenca caari ineapiniyeeti.
3 -
4 Iro cantaincha, irosati meeca tequera iriotacayempiro aisati tequera irishinetempi piotacotasanotero maaroni oshiacantayetiri.
5 Ocarataque 40 osarentsi nojivatantaquempiri caaraiteriqui, te ontsoquimateaji aitsaarepee aisati asapaatotepee.
6 Te aimatajeaji tanta aisati te irimatajeji ovaja jero shintsijayetatsiri, piojeitanteari yora Tasorentsi iriotaque Pivincatsarite.
7 “Areetantacarori quipatsica, ipocajeivetaca Sihón pincatsariventirori Hesbón, aisati Og pincatsariventirori Basán, imanajeivetapaaquee iriori. Iro cantaincha atsoncajeitavaqueri irinti. Irosati aitajeitantacari iipatsitepee, impoiji nopaqueri ishanincapeeni Rubén, Gad jeri ishanincapeeni Manasés nopaarantaqueri iriori.
8 -
9 Irotaque ocameetsatantari pimoncaratsanotero ocantayetiri icoacaasanotaquempiri, pimatapinijeitero, pimatantearori maaroni paitapeerica pantayeteri.
10 “Meeca apatojeitimentacari Avincatsarite Tasorentsi, acarajeitaqueri jivatacaayetimpiri jeri amitacoyetiriri, maaroni shiramparipee,
11 jananequipee, tsinanepee, pashinisatipee saviquimoyetimpiri amapinitimpiri tsitsi aisati nija;
12 pincantasanojeitanteari: ‘Queario, amoncarajeitero icantacantiri Tasorentsi; tempa queario ineajeitaquee.’
13 Meeca avirotasanojeitaque ishanincajeitajari, aisati iriotaque Pitasorentsite. Tempa icantasanotitacari intacantajeitaqueeri Abrahamani, Isaacani jeri Jacoboni.
14 Iro cantaincha te apaniro incarajeitempi Tasorentsi aisati irimoncaratempiro icantasanotaquempiri,
15 aisati iriori icantaqueri caariquera acarajeiti aca apatotimentacarica.
16 Tempa piotasanojeitaquero jaoca acantacari asavicantavetacari Egiptoqui aisati jaoca acantacari aquenajeitantapaacari nampitsipeequi aisati paita aneajeitanaqueri avotsiqui.
17 Aitaque aneitayetanaqueriri caariperori ijitasorentsitashiyetari atiri apincajeitiri, ivetsicashiyetaro inchato, mapi, plata, jeri oro; iriotaque ipincatsatiri.
18 Tecatsiya picarajeitica shirampari, tsinane aisati pishanincasanori joquerine Avincatsarite Tasorentsi, impicatsatanteariri ijitasorentsitashiyetari nampitsipeequiniri. Quearioyea piquempejeitarocari quepishitatsiri ovaritsa inchato piantatsiri.
19 “Ariorica piquemayevetacaro ocantayetiri picantasanojeitantacariri Tasorentsi, timatsirica aparoni jitanaintsineri icameetsatasanoti, inquenqueshiretanteari: ‘Aitaque nontimaque cameetsa, omaveteata nantero paitapeerica nocoacaayetari.’ Iriotaque cantacantajeiterine maaroni iroashinonqueejeitanteeteariri.
20 Eiro ipeacotanaritsi Tasorentsi iriori. Aitaque inquishimentajeitaqueri, intianqueneri oashinoncantsipee sanquenatacoyetainchari aca, aisati intsoncajeitajeri irishanincajeivetajeari.
21 Irinashitajeari ishanincasanoripee iriori, iroashinoncanteariri. Omoncaratea maaroni oashinoncantsi icantacantiri Tasorentsi sanquenatacoyetainchari aca.
22 “Yora impoijeitajantsineri coajicani pishanincajeitajeari, aisati inquempetea pashinisatipee poneayetachaneri areejiqui irineajeitero oashinoncantsipee aisati mantsiarentsipee intiancayetempiri Tasorentsi aca quipatsiqui.
23 Irineajeitero maaroni nampitsipee oncaaraiteasanotanaquero icanteetiri azufre aisati tivi, ontaavanetasanotanaquea quipatsi, tecatsi panquitantajearine aisati eiro oshiocayetanajitsi tojari. Onquempetanaquearo Sodoma, Gomorra, Admá jero Seboím, itsoncasanotantacarori Tasorentsi iquisasanotantanacarori.
24 “Impoiji incantajeite atiripee: ‘¿Paitaquea itsoncantacariri Tasorentsi savicantajeitaroniri nampitsipee? ¿Paitaquea iquisasanotantacariri?’
25 Jeroca incantayeteri: ‘Iro itsoncantacariri: yojocajeitanaquero icoacaavetacariri Ivincatsarite Tasorentsi; te irimoncarajeitero icantasanotaqueriri intacantajeitaquerini, yoimishitoajeitantajariri Egiptoqui.
26 Iquemisantashijeitanacari ijitasorentsiyeetiri aisati ipincatsatashijeitacari caari ioti, tecatsi imateneri imperiri paitapeerica.
27 Irotaque iquisantacarori Tasorentsi oca quipatsi, itiancantacarori oashinoncantsipee sanquenatacotainchari aca; irotaque ishinecoventantacariri yayeejeitanaqueri pashinipeequi nampitsi, irosati meeca.’
28 -
29 “Ainiro manachari caari ayojeiti, apaniro iotiro irinti Avincatsarite Tasorentsi. Iro cantaincha ainirotatsi iotacaajeitaqueeri aisati iriori atomipee, amoncaratapinijeitantearori maaroni ocantayetiri icantacantiri.
