Deuteronomio 3:1-29
3 “Impoiji aquenantajeitanajaro otsipa avotsi jatantachari nampitsiqui Basán, ipincatsariventiri Og. Iquemacojeitavaquee iriori, irosati ipocashijeitantaquee, yamajeitaqueri maaroni manajeitachari icarajeitiriri, imanajeitavaquee anta nampitsiqui Edrei.
2 “Ari icantaquena Tasorentsi: ‘Eiro pitsaroacaajeitaritsi; tempa narotaque matacayempine pintsoncantajeiteariri, piquempetanaqueri Sihón ivincatsariteni amorreopee savicajeiveitachaniri anta Hesbón.’
3 “Aitaque ocantacari, imatacaajeitaqueero Atasorentsite avantacariri pincatsarini Og aisati maaroni manajeitacharini; tecatsi timanajantsine.
4 Aisati aajeitaquero maaroni nampitsipee ipincatsariventaveitaniri, tecatsi aparo ajocanaque. Ocarati apatoanaca 60 aajeitaqueri timatsiri anta Argob aisati Basán.
5 Antearopee onaveta itantoyetirori, oquisotasanoyevetaca. Aisati ashitacoropeeni, antearocotapee yoashiyetironiri. Ainiro oshequi onayeveta caari timayetatsi otanto, iro cantaincha te amoncarateroji.
6 Maaroni atsoncajeitanaqueri: shirampari, tsinane jeri jananequipee. Aquempejeitanaqueri Sihón pincatsariventaveitaroniri Hesbón.
7 Irintiquea aayetanaque ivirapeeni jero timimoyetiriniri pinatasanotachari.
8 “Aitaque ocantacari aapitsajeitaqueri iipatsite apiiteroqueti pincatsari: yora amorreopee savicajeiveitachaniri acaqueroca nijaqui Jordán, oponeanaca nijaqui Arnón irosati toncaariqui Hermón.
9 (Ora toncaari Hermón ipajitiro sidonosatipee Sirión, irioquea amorreopee ipajitiro Senir.)
10 Atsoncanaqueri avajeitanaqueri nampitsipeequiniri timayetatsiniri opampaiteapai toncaari jenoqui. Aisati timatsiri Galaad jero Basán irosati Salcá jero Edrei. Irotajeitaque ipincatsariventiniri Og.
11 (Yora Og iriotaque ishanincapeeni refaíta antearitsantsayetatsiniri, apaniro itimavetanaca irinti. Ora imaamento ashiro oni, ocarati otsantsati 4 metro. Iroquea otsaranca ocarati 1 metro avishimaataquero 90 centímetro. Ainiro anta Rabáqui, inampiqui ishanincapeeni Amón.)
Isavicantacari ishanincapeeni Rubén, Gad jeri Manasés.
(Núm. 32.1-42)
12 “Irosati nopantacari quipatsi ishanincapeeni Rubén jeri Gad, oponeanaca nampitsiqui Aroer, irosati otsapijaqui Arnón aisati onianquirequi toncaari Galaad, yaacotaquero nampitsipee.
13 Iro timashivetapaachari cashetani quipatsi Galaad, irotaque nopaarantayetaqueriri ishanincapeeni Manasés irosati anta nampitsiqui Basán ipincatsariventiniri Og, jero Argob, iipatsite ishanincapeeni refaíta.
14 (Yora Jaír, ishanincapeeni Manasés, yaajeitaquero iriori quipatsi Argob, irosati overapaaca iipatsite Guesur jeri Maacá. Ora nampitsi Basán ipajitajiro iriori Havot-jaír. Irosati meeca ocanta.)
15 Irioquea yora Maquir nopaqueri Galaad. Aisati iriori ishanincapeeni Rubén, Gad nopajeitaqueri montetarori Galaad, irosati nijaqui Arnón. Aitaque overaanacari oirincaiteapai jatantachari nijaqui Jaboc, overapaaca iipatsite iriori ishanincapeeni Amón.
16 -
17 Aisati yaacojeitaquero quipatsi Arabá iquenapainta catsirincaiteri. Oponeanacaro toncaariqui Pisgá irosati overapaaca otsapijaqui Jordán, jatantachari incajarequi Quinéret irosati incajarequi Arabá, (opajitari aisati Catiojari.)
18 “Irosati nocantajeitantacari: ‘Irotaque oca quipatsi ipaquempiri Avincatsarite Tasorentsi pisavicantajeiteari avirori, irintiquea maaroni iotasanotatsiri imanajeita iraajeitanaquerota ivesamentopee, irijivajeitanaqueri ashanincapee.
19 Irointiquea tsinanepee jeri jananequipee savicanaintsine, irotaque amenajeiterine virantsipee. Tempa niotaque oshequi timimojeitimpiri.
20 Eirotsita pipiajeitajarotsi, ariorica impajeitaqueri Tasorentsi ashanincapee quipatsi intatiqueroniri nija Jordán, irisavicajeitanaquerica cameetsa. Piquempejeitaca avirori, irosati pimpiajeitantapaajearo aca piipatsitequi nopaquempiri.’
21 “Irosati nocantantacari iriori Josué: ‘Tempa pineasanotaquero avirori jaoca icantaqueriri Atasorentsite yora apitetatsiniri pincatsari. Aisati inquempejeitaqueri maaroni pincatsariyetatsiri intatiqueronta nija Jordán, pinquenajeitanaquenta.
22 Eiro pitsaroacaajeitaritsi savicajeitatsiri; tempa irio Atasorentsite majeiterine.’
Te irishineteri Tasorentsi Moiseshi irareetearo quipatsi Canaán.
23 “Irosati noquenquetsatacantacari Tasorentsi. Nocantiri: ‘Notasorentsite, pintacaro ponijaaquenaro picameetsatasanoti aisati oshequi pitasorenca. Tecatsi pashini tasorentsitatsine inquitequi aisati quipatsiqui mayeterone paitapeerica caari ineapiniyeeti quempetarori pimayetiri.
24 -
25 Nocantimpi, pishinetena nomonteanaquero nija Jordán. Nocoi noneero cameetsaiteri quipatsi, onta toncaaripeequiniri aisati otishi Líbano.’
26 Iro cantaincha avirojeitaque cantacaacarori caari onimotantari Tasorentsi nocantavetacariri. Irotaque icantantaquenari: ‘¡Aitapaaque! Eiro picantajanatsi.
27 Pintoncaanaque irointi onta toncaariqui Pisgá, aitaque pamenacoyetapeerori quirinca, catonco, acaqueroca jero antaqueronta. Iro cantaincha eiro pimontearotsi nija Jordán.
28 Irointiquea pincamantasanoyeteri Josué irantayeteri aisati poveshireacaasanoteari. Tempa iriotaque jivatanajerine pishanincapee irareetacanteariri quipatsi ora pamenacoyeteri.’
29 “Irosati atimajeitantapaaca oirincaiteapai montetarori Bet-peor.
