Deuteronomio 30:1-20
30 “Ariorica ompocashijeitaquempi maaroni nocamantayetaquempiri, ora tasoncaventantsi aisati oashinoncantsi, nocantaquempiri pincoyeanontea, impoiji pinquenqueshiretapaajero anta nampitsipeequi jaocarica irovaraajeitaquempiri Avincatsarite Tasorentsi.
2 Ariorica pimpiashijeitajeri Tasorentsi, pinquemisantasanotajeri maaroni pishirequi, aisati pishiretasanotajeari, pincarajeitajeri pitomipee; tempa nocamantaquempi, irosati impashiniantajearo aisati incavintsaajeitajempi, irampatojeitajempi jaocarica piponeanacari pincarajeitajeri nampitsipeequiniri.
3 -
4 Omavetaquea povaraayevetanaca areejipeequi, aitaque iramenajantempi Tasorentsi iramajeitajempi, iroimpiantajempiri iipatsitequi intacantajeitaqueerini. Irosati pisavicasanojeitantapaajea cameetsa, ontimimotasanoyetanajempi pashiyeteari aisati irishequiacaajeitajempiri pitomipee, panaacojeitajeri intacantajeitaqueerini.
5 -
6 Iroameetsashiretasanotempi Tasorentsi, pinquenqueshiretapinitantearori icantacantiri, aisati inquempetajea pishanincajeitajeari, irinintasanoteri aisati irishiretasanojeitajeari, irotaque iraneasanojeitantajeari.
7 Impoiji intiancayeteneri oashinoncantsipee quisajeitempine jeri oijanajeivetempine.
8 “Irosati pimpiashijeitantajeari Tasorentsi pinquemisantasanotanajeri, aisati pimatapinijeitero maaroni icantacantiri nocamantaquempiri meeca.
9 Irosati irishequiacaasanojeitantajempiro paitapeerica pantayeteri: pitomipee, pivira aisati paviiyetiri pivanquire. Aitaque intasoncacoventajeitajempi Avincatsarite Tasorentsi, isavicacaajeitajempi cameetsa, iquempetaqueri peerani intacantajeitaqueerini,
10 ariorica pinquemisantasanotajeri aisati pimoncarajeitero icantacantiri sanquenatacoyetainchari aca sanquenarentsiqui, aisati pimpiashitajeri maaroni pishirequi aisati pinquenqueshiretsanotajeri.
11 “Oca icantacantiri noametajimpiri, te ompomerentsitasanoteaji pinquemajeitero, ario pimataquero.
12 Te ontime inquitequi, pincantajeitanteari: ‘¿Jaanica jatatsineri anta iramanteerori iriotacantajeitapeerori, amatantearori amoncarajeitero?’
13 Aisati te ontime intatiqueroqui incajare, pincantajeitanteari: ‘¿Jaanica monteashitanaquerone iramanteerori iriotacantajeitapeerori, amatantearori amoncarajeitero?’
14 Tempa ocantani otimi quempeji, aitaque pineanatacotaquero aisati pinquenqueshiretapinitero, pimajeitantearori pimoncaratero.
15 “Pamenajeite meeca, nocamantaquempiro pincoyeanontanteari cameetsatatsiri aneacantatsiri, aisati caari cameetsatatsi oamaantatsiri.
16 Pinquemisantajeiterorica nocamantaquempiri aisati pinintasanoteririca Avincatsarite Tasorentsi, pinquearioventasanotanaquero icoacaimpiri, aisati pimoncaratapinitero icantacantiri; ari paneasanojeitaje, intimajeitanaque oshequi pitomipee aisati intasoncacoventasanojeitempi pisavicajeitapaajenta.
17 Irompa eirorica piquemisantirotsi maaroni oca, irointirica pijatashijeitanaqueri ijitasorentsitashiyeetari pinquemisantashijeitanteariri aisati pintiyeroashitanteariri, niotacaasanotempi meeca, aitaque pincamitajeitaquea, eiro osamanititsi pintimantasanojeitearo quipatsi pimanatacoventajeivetaqueari pimonteanaquerorica nija Jordán.
18 -
19 Meeca oca quitaiteri noncamantero inquite aisati quipatsi ocantacoventajeitempi. Nocantaquempi: Pincoyeanontea meeca oaneantatsi iroorica caamanentsi, aisati tasoncacoventantsi jero oashinoncantsi. Pincoyeanonteaqueti meeca oaneantsi paneajeitanteari aisati iriori pishanincajeitajeari.
20 Pinintasanoteri Avincatsarite Tasorentsi, pinquemisantasanoteri. Tempa iriotaque oaneajeitaquempiri pisavicantajeiteari oshequi osarentsipee anta quipatsiqui impempiri, icantasanotaqueriri Abrahamani, Isaacani jeri Jacoboni; tempa iriotaque intacantajeitaqueeri.”
Impoyeetantajeariri Josué Moiseshi.
(Núm. 27.12-23)
