Deuteronomio 31:1-30
31 Ari icamantajiri Moiseshi ishanincapee icantiri:
“Meeca caratapaaque 120 nosarentsite, te noshintsitasanoyetanaje nojatantayeteari jaocapeerica. Aisati icantasanotaquena Tasorentsi: ‘Eiro pimontearotsi nija Jordán.’
2 -
3 Iro cantaincha iriotaque jivatanaquempine intsoncajeiteri nampitsipeequiniri, paajeitantajearori iipatsite. Yoca Josué, iriotaque jivatanajempine; tempa iriotaque icantaqueri Tasorentsi irijivatacaajeitajempi.
4 Imatacaajeitempi Tasorentsi iquempetanaqueri Sihón aisati Og ivincatsariteni amorreopee aisati iipatsitepee, imatacaaquempiri pitsoncajeitantancariri
5 Ariorica irimatacaajeitaquempiri Tasorentsi pintsoncajeiteri nampitsipeequiniri, ocameetsati pimoncaratasanotero nocantajeitaquempiri.
6 Pineaperojeitanaquea, eiro picantashirejeititsi, aisati eiro pitsaroajeititsi ariorica pimanajeitaqueri. Tempa quiso yoajeitimpi Avincatsarite Tasorentsi. Eiro ipeacotimpitsi, aisati eiro yojocajeitimpitsi.”
7 Irosati icajemantacari Moiseshi Josué. Iquemajeitaqueri ishanincapee icantiri:
“Pineaperotanaquea, eiro picantashireti. Aviro meeca aajeitanajerine ashanincapee anta quipatsiqui icantasanotaqueriri Tasorentsi intacantajeitaqueerini impempiri. Avirotaque payeterine irisavicantajeiteari.
8 Iriotaque Tasorentsi jivatempine, quiso iroyempi. Eiro catsini yojoquimpitsi. Irotaque nocantasanotantimpiri: Eiro pitsaroitsi aisati eiro picantashiretitsi.”
Irineanatacoteneri ireevitantatsiri icantacantiri osarentsiqui.
9 Ari isanquenatacoyetaquero Moiseshi icantacantayetiri Tasorentsi. Ipacotaqueri antaveetatsiri quijacotapinitirori Cajón. Aisati ipaqueri iriori jivatacantayetatsiri.
10 Irosati icantajeitantacari:
“Ariorica omoncaratapinitea 7 osarentsipee, pipeacotantapinijeitanariri caari pinayetatsi, piquimoshireventajeiterorica pivancoshetajaniquipee aisati pampatotacaapinijeitearirica ashanincapee anta Irinanteariqui Avincatsarite Tasorentsi; irotaque pineanatapinijeiteneriri.
11 -
12 Ocameetsati irampatojeitea maaroni shiramparipee, tsinanepee, jananequipee jeri pashinisatipee saviquimoyetimpiri, inquemantajeitavaquearori pineanateneriri, iriojeitanteari impincatsatasanoteri Avincatsarite Tasorentsi. Aisati irimajeitantearori iriori maaroni ocantayetiri.
13 Irotaque inquemantajearori pishanincajeitajeari caari iotacovetaro. Iriojeitanteari impincatsatapinijeitajeri Avincatsarite Tasorentsi anta quipatsiqui pimonteanaquerorica nija Jordán.”
Yoverantacarori Tasorentsi iquenquetsatacaavajiri Moiseshi.
14 Impoiji icantajiri Tasorentsi Moiseshi:
“Irotaintsi meeca omoncaratea pincamanteari. Pincajemeri meeca Josué, paanaqueri Novancoqui papatotimentantanari, pincatiacaapeeri, noncamantantayeteariri paitapeerica noncoacayeriri.”
Irosati ijajeitantaca.
15 Ari inijaacari Tasorentsi mencoriqui. Ocatiatsantsataca iqueantapinitaroriqui.
16 Irosati icantantacari Moiseshi:
“Irotaintsi meeca pincame. Yora pishanincapee oshequi irantayetapeero caari cameetsatatsi irisavicajeitapaajenta. Impincatsatashiyetapempari ijitasorentsitashiyetari pashinisatipee atiri. Aitaque irojocajanajenari impiatsatanaquena, eiro nocaratajiritsi.
17 Irotaque nonquisasanojeitanteariri, nojocajeitanajeri aisati eiro noquenqueshireacojeitajiritsi. Irointi noshinecoventeri omapocajeiteri oashinoncantsipee; oshequi ompomerentsitimotanaqueari. Impoiji incantajeivetanaquea: ‘Iro ashinoncantacari, te intsipajeitanajeji Atasorentsite.’
18 Ariorica omoncaratapaaquea aitaque nonijantareimentasanotanaqueri irantashiyetanaquearorica caari cameetsatatsi, impincatsatashiyetanaqueari ijitasorentsiyeetiri.
19 “Meecaquea pisanquenatacotavaquero pampoyeantsi niotacayempiri, poamejeiteriri pishanincapee impampoyeantearori. Irotaque quenqueshiretacayerine nocantasanotaqueri: ‘Pantajeitirocari caari cameetsatatsi.’
20 Ariorica nareetacaajeitaqueari quipatsiqui nocoacaasanotaqueriri, nocantasanotaqueriri intacantajeitaquempiniri nompajeiteri, oshiocasanoyetapai panquirentsiyetatsiri, eiro ocoiteimoyetajaritsi paitapeerica, aisati incanteani iroasanojeitapempa; irosati inquenqueshiretantanaquea impincatsatantayetanaqueariri ijitasorentsitashiyeetari. Eiro iquemisantanajanatsi, impiatsatanaquena, eiro nocaratajiritsi.
21 Iro cantaincha ariorica ompocashitaqueri oshequi oashinoncantsi aisati pomerentsitimoyetearine, ora pampoyeantsi irotaque quenqueshireacayerine, aisati iriori irishanincajeitajeari. Eiro ipeacotantarotsi impampoyero. Tempa niotitacari paita iquenqueshireyetiri aisati paita irantayeteri, tequerata nareetacayeari quipatsiqui nocashiacaaqueriri nomperiri.”
22 Irosati isanquenatantacaro Moiseshi pampoyeantsi iroamejeiteriri ishanincapee.
23 Ari icantasanotiri Tasorentsi Josué, yora itomini Nun:
“Pineaperotanaquea aisati pishintsishiretanaque. Tempa aviro aajeitanajerine pishanincapee pareetacaajeitanteariri quipatsiqui nocantasanotitacari. Noncanteani quiso noyempi.”
24 Itsoncantacarori Moiseshi isanquenataquero icantaqueriri Tasorentsi,
25 irosati icantantacari ishanincapeeni Leví quijacotapinitirori Cajón:
26 “Jeroca nosanquenataqueri. Pintsipatayero Cajón otimantari Icantacantiri Tasorentsisanori Pitasorentsite. Irotaque iotacayempineri icantasanotaquempiri Tasorentsi: ‘Pantirocari caari cameetsatatsi.’
27 Tempa niojeitaquempi avirojei quishincari aisati piatsari. Aitaque picantajeita oshequi pipiatsajeitari Tasorentsi ainiroquera nocarajeitimpi, ¡jaocarica pincantajeitanaqueari ariorica noncamaque!
28 Pamajeitaqueri aca maaroni jivatacantatsiri aisati jivatacaajeitiriri ishanincasanoripee, noncamantantayeteariri ocapee. Onquemanteariri inquite aisati quipatsi irotaque camantacoterineri.
29 Tempa niotaque ariorica noncamaque, ario pantajeitanaquero caari cameetsatatsi, pimpeacojeitanaquearo nocantavetaquempiri. Aisati niotacotaquempi coajica omapocajeitempi oashinoncantsi. Tempa pantimotaqueri Tasorentsi irotaque pinquisacanteariri.”
Ivampoyeane Moiseshi
30 Irosati ipampoyeacaajeitantacari Moiseshi ishanincapee pampoyeantsi yapatojeitacanta. Intanacaro irosati overapaaca.
