Deuteronomio 34:1-12
34 Ari itoncaanaquero Moiseshi toncaari Nebo, irosati otishitapaaque Pisgá montetarori Jericó. Aitaque yonijayetaqueriri Tasorentsi maaroni quipatsi, oponeanaca Galaad irosati anta irisavicayetenta ishanincapee Dan.
2 Jero irashiteari Neftalí, Efraín jeri Manasés, jero maaroni irashiteari Judá irosati incajarequiniri Mediterráneo. Oponeanaca quipatsiqui Négueb jero ovinteniiteapaita nija Jordán, irosati osantenitapaaque nampitsiquiniri Jericó, otimasanoyetapai compiroshipee, irosati nampitsiqui Sóar.
3 -
4 Irosati icantantacari:
“Irotaque onta quipatsi nocantasanotaqueriri Abrahamani, Isaacani jeri Jacoboni, coajica nompajeiteri pishanincajeitajeari. Irotaque nocoacaaquempiri pamenacoyetero. Iro cantaincha eiro pareetarotsi avinti.”
5 Aitaque ocantacari icamaque Moiseshi, quemisantasanotiriri Tasorentsi icoacaaqueriri. Tempa aitaque icantitaca Tasorentsi.
6 Ari ipeashitaca itijaca anta oirincaiteapai Moab, montetarori Bet-peor. Tecatsi iotatsine, irosati meeca.
7 Icamantacari, ocaratapaaque 120 irosarentsite. Irosati icanta ineantasanoti aisati te irimantsiaveetanaqueji.
8 Yora ishanincapee icantani yoashiretacojeitanacari, ocarataque 30 quitaiteri iraacotasanojeitacari. Imoncarataquero yamejeitari.
9 Irosati ipoyeetantajari Josué. Tequera incameni Moiseshi, yaajiricainataqueri iitoqui icantacoventantacariri Tasorentsiqui, iotacaasanotantacariri. Irotaque iquemisantasanojeitantacariri ishanincapee aisati imoncarajeitaquero icantaqueriri Tasorentsi Moiseshini.
10 Iro cantaincha te intimajeji pashini quenquetsatacantajantsine ishanincapeequi Israel, quempetajearine Moiseshi, iquenquetsatacaaquerini Tasorentsi quempeji,
11 aisati matajerone maaroni caari ineapiniyeti ora icantaqueriri Tasorentsi Moiseshi, yonijaaqueriri pincatsari anta Egiptoqui, jeri amitacotiriri aisati inampiquiniri.
12 Aisati tecatsi moncaratajearine imayetaquero antearoite yantayetaqueri ora ineacotapinijeitaqueriri ishanincapee.
