Deuteronomio 4:1-49
4 “Meeca noshaninca, pinquenqueshiretasanojeitajero icantacantiri Tasorentsi noametaquempiri. Ocameetsati pimatasanojeitero pintimajeitanteari cameetsa quipatsiqui impempiri Tasorentsi icantitacariri intacantajeitaqueerini.
2 Eiro pisanquenayetajitsi pashini, aisati eiro piveayetajirotsi nocamantaquempiri. Pimoncarajeitero maaroni icantacantiri Avincatsarite Tasorentsi.
3 Tempa pineajeitaquero imataqueri Tasorentsi itsoncajeitantacariri ashanincapeeni anta toncaariqui Baal-peor, pincatsatashiyetacaroniri ijitasorentsiyetiri savicajeitatsiniri. Iro cantaincha avinti piquemisantasanotaqueri Tasorentsi, irotaque paneantajeitacari.
4 -
5 Iro noametasanotantajimpirori icantacantiri, icantaquenari Avincatsarite Tasorentsi, pimajeitantearori pimoncarajeitero anta quipatsi pisavicajeitapaajenta.
6 Ocameetsati pimatasanojeitero aisati pimoncarajeitero piotasanojeitanteari. Irotaque iriotantanaquempiri maaroni nampitsipeequiniri ainiro piotantari aisati piquenqueshireantari. Ariorica iriotasanojeitanaquero, aitaque incantajeitanaque: ‘Yonta savicajeitapaintsiri, oshequi iotasanoti, aisati iquenqueshirea cameetsa.’
7 ¿Paita quempetearone nampitsi antearoite iquempejitari ijitasorentsiyeetiri, iquempetaquee Atasorentsite itsipajeitaquee ariorica aquenquetsatacaapinitiri?
8 Aisati tecatsi quempetearoneri timatsiri icantacantiri Tasorentsi queariotasanotatsiri, quempetarori maaroni nocamantajeitaquempiri.
9 Queariompia pipeacotarocari pineaqueri. Pincanteani pinquenqueshiretero, pincamantajeiteri iriori pitomipee jeri picharinepee.
Ineanatantacari Tasorentsi toncaariqui Horeb.
10 “Ora quitaiteri asaviquimojeitantapaacariri Avincatsarite Tasorentsi toncaariqui Horeb, icantantaquenari: ‘Pampatojeiteri pishanincapee inquemantenari noneanate iriojeitanteari impincatsatapinitena, aisati iroamejeitanteariri itomipee inquempejeitantanaqueariri iriori.’
11 Piquempejijeitantacarori otsapitapaa toncaari, pineaquero amorecatsantsaataque paamaritatsiri irosati jenoqui, aisati otsitenishaaque mencori.
12 Irosati ineanatantaquempi Tasorentsi nianqui paamaritatsiriqui. Tempa piquemajeivetacari, iro cantaincha tecatsi pineimataque, irointi piquemashitaca irineane.
13 Aitaque iotacaajeitaquempirori, Icantacantiri caratatsiri 10, isanquenataqueri apicotatequi mapi, aisati icantasanotaquempi pimatasanotantearori.
14 Narotaque icantaqueri noamejeitempiro pimoncarajeitantapemparori anta quipatsi pisavicajeitapaajenta.
Icantasanotiri: Eiro pijitasorentsiveetashiyetatsi
15 “Pinquenqueshirejeitajero anta toncaariqui Horeb piquemantacariri Tasorentsi ineanataque nianqui paamaritatsiriqui, tecatsi catsini pineimataque.
16 Quearioyea paamaventajeitea pipeashijeitacari, povetsicashiyetacari shiacantsiyetatsiri quempevetearine shirampari jero tsinane aisati poshiniripee, vanquiyetachari, mitajayetatsiri jeri shimapee.
17 –
18 -
19 Ariorica pamenajeite jenoqui pineeririca catsirincaiteri, cashiri, impoquiropee aisati maaroni timayetatsiri, quearioyea picoashirejeiticari pimpincatsateri. Tempa iriotaque Avincatsarite Tasorentsi vetsicajeitaqueriri timayetatsiri jenoqui quitaiteacojeiterine maaroni atiri.
20 Tempa avirojeitaque yomishitoajeitajiri pashinoncaajeivetantacaniri Egiptoqui, oquempetaca pisavicajeivetaca tsompoinaqui itaapiniyeetironta ashiroyetatsiri. Irotaque meeca yashijeitantajimpiri ishanincajeitajimpi.
21 Iro cantaincha iquisatsataquena Tasorentsi, avirojeitaque cantacaacarori. Icantasanotantaquenari: ‘Eiro nomontearotsi nija Jordán aisati eiro nareetarotsi cameetsaiteri quipatsi impempiri pisavicantajeitapaajeari.’
22 Aitaque noncameri narori aca. Eiro nomontearotsi nija Jordán. Avintiquea monteajeitanaquearone pisavicantajeitapempari cameetsaiteriqui quipatsi.
23 Iro cantaincha paamaventea pipeacotarocari icarajeitaquempi Tasorentsi aisati timatsi icoacaaquempiri. Eiro povetsicashiyetatsi pijitasorentsiyeteri aisati eiro pishiacantayetiritsi.
24 Tempa irio Avincatsarite Tasorentsi tsaneacotaquempirori, ¡iquempetacaro paamari tsoncantatsiri!
25 “Ariorica intimayetanaque pitomipee jeri picharinepee, ariorica povashiventaajea povetsicashiyetanaquea paitapeerica shiacantsiyetatsiri, pantimotasanotaqueri Avincatsarite Tasorentsi caari cameetsatatsi, irotaque pinquisacanteariri:
26 noncamantero inquite aisati quipatsi oncamantacotantempiri, intsipaite pimpeajeitajea pisavicajeivetapemparica intatiqueroqui nija Jordán. Eiro osamanititsi pintimantajeitearo, pintsoncajeititajea maaroni.
27 Pinquenaquenayetanaque pashinipeequi nampitsi, eiro pishequitasanojeitanajitsi pinampiqui; tempa irio Tasorentsi coacaaquempiri.
28 Aitaque pimpincatsayetapeeriri ijitasorentsiyetiri atiri isheroncayetiro inchato jero mapi caari neantatsi, caari quematsi, caari oacha, aisati caari anencatsi.
29 Iro cantaincha ariorica pincoasanotanaje pinquemisantasanoteri Avincatsarite Tasorentsi aisati pishiretasanotanajeari, aitaque pineajeri.
30 Ariorica avishimojeitaquempi maaroni oashinoncantsi pomerentsitantsi, aitaque pinquenqueshiretanajeari pinquemisantasanotanajeri Tasorentsi.
31 Tempa iriotaque cavintsantatsiri, eiro yojocajeitimpitsi, eiro itsoncajeitimpitsi. Aisati eiro ipeacotarotsi icantasanotitacariri intacantajeitaqueerini: ‘Noncarajeitempi’, aitaque irimoncarataquero.
32 “¿Timatsimpa peerani yovetsicantacarori Tasorentsi quipatsi aisati atiri, neaquerori aisati quemacotaquerori quempetarori aneajeitaqueri? Jentsite pijayetaite nampitsipeequi, pisampitacoventayetaitero.
33 ¿Timatsimpa pashini atiripee quemaqueriri ineanati Tasorentsi nianqui paamaritatsiriqui, piquempejeitaca avirori piquemajeivetacari, iro cantaincha te pincamajeite?
34 Tecatsi ijitasorentsiyeetiri coyeiriri atiri irishanincajeitanteariri aisati onijantayetirori itasorenca, mayetirori paitapeerica covencayetatsiri caari ineapiniyeeti aisati piatariri oantatsiri, quempetarori yonijaajeitaquempiri Avincatsarite Tasorentsi anta Egiptoqui.
35 Iro yonijaajeitantaquempirori, piojeitanteariri iriotasanotaque Tasorentsisanori, tecatsi pashini quempetearine.
36 Iriotaque neanataquempiri inquitequi, noametasanotantempiri pintime cameetsa. Ishinetaquempi pineajeitantacarori amorecatsantsaataque paamaritatsiri aisati piquemantacariri ineanataque nianqui.
37 Inintasanotaqueri intacantaqueerini, irotaque icoyeantajeitaqueeri yoipacaacoventajeitantajeeri anta Egiptoqui, yonijaasanojeitaqueero itasorenca.
38 Aisati yojocajeitaqueri savicajeiveitachaniri nampitsipeequi shequiasanoveitachaniri aisati neaperoyetachaniri anaacovetaquempiri, paitajeitantacariri iipatsitepee pisavicajeitantacari meeca.
39 “Ocameetsa meeca pinquenqueshiretasanoteri, iriotaque Tasorentsisanori pincatsariventantatsiri inquitequi aisati quipatsiqui. ¡Tecatsi pashini quempetearine!
40 Pimoncaratasanoteneri maaroni icantacantiri nocamantaquempiri, pintimantajeiteari cameetsa, aisati inquempetajea pishanincajeitajeari. Aisati irotaque pisavicantajeiteari pincantaitatiyempani anta quipatsiqui impempiri Avincatsarite Tasorentsi.”
Nampitsipee iraventeari.
41 Ari icoyeaque Moiseshi mava nampitsi acaqueroquinta nija Jordán iraventeari caari tsatantavetacha iroante, eiroquea yoanteetaritsi iriori.
42 -
43 Jero ovajiro: Béser, otimi anta opampaiteapai toncaari jenoqui caraiteriquiniri, irotaque iraventeari ishanincapeeni Rubén. Jero otsipa opajita Ramot, otimi iroori anta Galaad, irotaque iraventeari ishanincapeeni Gad. Iroquea vecarantapaarori opajita Golán, otimi iroori quipatsiqui Basán, irotaque iraventeari ishanincapeeni Manasés.
44 Irotaque icantacantiri Tasorentsi, yoametaqueriri Moiseshi ishanincapee ishitoantajeitanajarori Egiptoni.
45 -
46 Isavicajeitantapaacari acaqueroca nijaqui Jordán, oirincaiteapai montetarori Bet-peor, iipatsitequi Sihón savicantaroniri Hesbón, pincatsariventiriniri amorreopee. Iriotaque itsoncajeitanaqueri ishanincapee Moiseshi, ishitoantanajarori Egiptoni.
47 Irosati yaitajeitantapaacari iipatsite, aisati irashi Og pincatsariventironiri Basán. Iriotaque apitetatsiniri pincatsariventiriniri amorreopee savicajeitatsiniri acaqueroca nijaqui Jordán.
48 Ora iipatsite yaitajeitapaaqueriri antearoite oni, oponeanaca Aroeriqui otsapijaqui Arnón, irosati toncaariqui Sirión (opajitari aisati Hermón.)
49 Yaacojeitapaaquero maaroni quipatsi Arabá acaquerocaniri nija Jordán, irosati incajarequi Catiojari overapaaca toncaari Pisgá.
Icantacantiri Tasorentsi caratatsiri 10.
(Éxo. 20.1-17)
