Deuteronomio 5:1-33
5 Irosati yapatotantajari Moiseshi maaroni ishanincapee, icantiri:
“Pinquemisantero noshanincapee, noncamantajempiro icantacantiri Tasorentsi. Pinquenqueshirejeitajero piotasanotavajero catsini, aisati pimatapinijeitero.
2 “Anta toncaariqui Horeb, yora Atasorentsite icantasanotaquee, incarajeitee, aisati timatsi coacaaqueeri.
3 Te apaniro incanteri intacantajeitaqueerini, aisati arori icantaquee apatojeitantacari.
4 Ineanataque nianqui paamaritatsiriqui anta toncaariqui.
5 Nocarataqueri nainti, nocamantantaquempirori icantaquenari. Tempa pitsaroacaajeitacaro avinti paamaritatsiri caari pitoncaanta. Icantantacari:
6 “Narotaque Tasorentsisanori Pitasorentsite oipacaacoventajimpiri iperanajeitanteevetaquempirini Egiptoqui.
7 “Eiro pijitasorentsitashiyetatsi pashini pinquempetacantantenari.
8 “Eiro catsini povetsicashiyetatsi pishiacantantayeteariri pineayetiri inquitequi aisati timayetatsiri quipatsiqui jeri incajaresatipee.
9 Eiro pitiyeroashiyetaritsi pimpincatsajeitanteariri. Tempa narotaque Pitasorentsite tsaneacotimpirori, oasanquetaimentantirori caari cameetsatatsiri yantayetiri atiripee cantimatanari, aisati itomipee, icharinepee irosati irishanincajeitajeari.
10 Irintiquea nintanari aisati irishanincajeitajeari, irimoncaraterorica nocantacantiri, noncantaitatiyempani noncavintsaajeiteri.
11 “Eiro pineavetacotashiyetarotsi novajiro, aitaque noasanquetaimentaqueri neavetacotashitearone.
12 “Pinquenqueshiretero quitaiteri pimaoreantajeiteari, pimpincatsatantenari. Tempa irotaque nocantacantiri.
13 Oncarate 6 quitaiteri pantaveejeitanteari paitapeerica.
14 Iro caratapaatsineri 7 quitaiteri, irotaque pimaoreajeitanteari; tempa nonashitacaacaro. Eiro catsini pantaveejeititsi aisati pitomipee, pishintopee, piveranaro, jeri pashinisati saviquimoyetimpiri, aisati eiro pantaveetacaayetiritsi pivirapee. Ocameetsati pimaoreacaajeiteri.
15 Pinquenqueshiretajero iperanajeiyeevetaquempini Egiptoqui, iro cantaincha narotaque oipacaacoventajimpiri, nonijaasanojeitaquempiro notasorenca. Irotaque nocantasanotantimpiri ocameetsati pimaoreantajeitearo quitaiteri.
16 “Pimpincatsateri piri aisati piniro; tempa irotaque nocantacantiri. Aisati irotaque noaneasanojeitantempiri osamani, pisavicantajeiteari cameetsa piipatsitequi nompajeitempiri.
17 “Eiro poantajeititsi.
18 “Eiro paimentarotsi pijina.
19 “Eiro picoshijeititsi.
20 “Eiro pitseeyacotantashitatsi, pincantacantanteariri pishaninca.
21 “Eiro pinevetitayetaritsi ijina pishaninca aisati ivanco, irovane, inampirepee, ivacatepee, iraashinotepee, aisati timimoyetiriri.”
Itsaroacantacariri ishanincajeitaniri Israel Tasorentsi.
(Éxo. 20.18-26)
22 “Irotaque icantaqueri Tasorentsi, ineanatantacari antearojenca nianqui amorecatsantsaataquenta paamaritatsiri aisati otsitenishaantapaacari mencori, apatojeitantacari overapaacanta toncaari. Tecatsi pashini incante. Irosati isanquenatantacaro apicotatequi mapi, impoiji ipacotaquenaro.
23 Iro cantaincha piquemajeitantavacarori irineane mencoriqui otsitenishaaquenta, aisati pineantacarori toncaariqui amorecatsantsaataque. Irosati pipocashijeitantaquena aisati jivatacaayetiriri ishanincasanori jeri jivatacaajeiteeri.
24 Picantajeitapaaquena: ‘Queariotasanotaque yora Atasorentsite iriotaque onijaasanojeitaqueerori itasorenca aisati aquemajeitantacarori irineane nianqui amorecatsantsaataque paamaritatsiri. Meecaquea ayotasanotaque ariorica irineanateri Tasorentsi atiri, eiro icamajeititsi.
25 Iro cantaincha, ¡paita ancoanteari ontsoncajeitee covencatatsiri paamari. Ariorica anquemajeri irineanataje aisati, ari ancamajeitaque!
26 Tecatsi atiri quemerine Tasorentsi Aneasanotatsiri irineanaterica nianqui paamariqui, eiro icamitsi, aquempetaca arori aquemajeivetacari; iro cantaincha te ancamajeiteji.
27 Aviroyeata quempejitearine Tasorentsi pinquemantearori maaroni incantempiri, impoijiquea pincamantapaajenaro. Irosati nomoncarajeitantearo incantaquempiri.’
28 “Ainiroquera piquenquetsatacaana, iquemaquempi Tasorentsi picantaquenari. Irosati icantantaquena: ‘Noquemaquero icantajeitaqueri pishaninca, oshequi ocameetsatimotaquena.
29 ¡Cantenane irosati incantea inquenqueshiretapinitanaquero impincatsatapinitantenari, aisati irimoncarajeitanaquero maaroni quitaiteripeequi nocantacantiri, Irotaque nontasoncacoventanteariri aisati itomipee, irisavicajeitanteari cameetsa inquimoshirejeite!
30 Pincantajeri meeca irijayetajeta ivancopeequi.
31 Avintiquea savicanaintsine, noncamantasanotantempirori maaroni nocantacantiri. Poametasanotantapempariri pishanincapee, irimatantearori irimoncarajeitero anta quipatsiqui nompantajeariri irisavicanteari.’
32 Irotaque nocantantimpiri, pimoncarajeitero maaroni icoacaaquempiri Avincatsarite Tasorentsi, eiro catsini pipeacotarotsi.
33 Pinquenqueshiretasanotanaquero icamantaqueeri, pisavicantajeiteari cameetsa oshequi osarentsi anta quipatsiqui impempiri.
