Deuteronomio 7:1-26
7 “Yora Avincatsarite Tasorentsi iriotaque areetacaajeitempine quipatsiqui pisavicajeitantapaajeari, irojocacaajeitempiro caratatsiri 7 nampitsipee oshequiasanojeivetachari anaacojeitimpiri aisati neaperoyevetachari: yora hititapee, gergeseopee, amorreopee, cananeopee, ferezeopee, heveopee jeri jebuseopee.
2 Ariorica irimatacaajeitaquempiri panaacojeitanteariri, ontimatiye pintsoncajeiteri. Eiro catsini picantiritsi: ‘Tsame ancaratavacaajeitajea;’ aisati eiro picavintsaajeitiritsi.
3 Aisati eiro picarajeitiritsi yaitiricari pitomipee irishinto, aisati pishintopee yaitimpirocari itomipee iriori.
4 Tempa ario irojocacaaqueri iquemisantiri Tasorentsi, irointi impincatsatashiyetanaqueari ijitasorentsiyetiri iriori. Irotaque inquisasanotantanaquempiri Tasorentsi iroashinoncaasanotempi, eiro osamanititsi intsoncajeitempi.
5 Irointiquea cameetsatatsi pintatsinquitajeiteri itaantashiyetari, aisati pimporoquitasanojeiteri imapinepee. Impoiji pinchaquititajeiteri irinchatorepee ipincatsatashiyetari, pintaitajeiteri maaroni.
6 Tempa avirojeitaque ishanincatasanotajari Avincatsarite Tasorentsi, inashitacaasanotaquempi. Icoyeaquempi te pinquempeteariji savicayetatsiri pashinipeequi quipatsi. Apaniro yashitasanotaquempi.
Inintashitacari Tasorentsi ishanincajeitaniri Israel.
7 “Queario inintaquempi Tasorentsi, avirojeitaque icoyeaqueri. Te iro incoyeantempi pishequitasanojeiti, panaacotiri pashinisati nampitsipeequiniri. Tempa capichaji pinajeiti.
8 Tempa inintasanotaquee, icoaque irimoncaratajero icantasanotaqueriri intacantajeitaqueerini. Irotaque yoimishitoajeitantajimpiri iperanajeitantavetaquempiri pincatsaritatsiri Egiptoqui, inijaasanotaqueri itasorenca.
9 Ocameetsati meeca piotasanoteri Atasorentsite, iriotaque Tasorentsisanori, moncaratirori icantasanotiri. Incanteani incarajeiteri maaroni ninterineri aisati moncarateroneri icantacantiri.
10 Irintiquea intsoncajeite quisajeitiriri, iroashinoncaasanoteri. ¡Eiro osamanititsi iroasanquetaimenteri yantayetaqueri!
11 Pimoncarajeitero meeca icantacantiri nocamantajimpiri, aisati pimatapinijeitero.
Intasoncacoventeri Tasorentsi quemisanterine.
(Lev. 26.3-13; Deut. 28.1-14)
12 “Piquemajeitavaquerorica ocapee, pimoncarataquerorica aisati pantapinitaquero, irosati incarajeitantempiri Tasorentsisanori Atasorentsite, irimoncaratempiro maaroni icantasanotaqueriri intacantajeitaqueerini.
13 Oshequi irinintasanojeitempi aisati intasoncacoventajeitempi. Iroshequiacaasanojeitempi anta quipatsiqui icantasanotaqueriri intacantajeitaqueerini: ‘Nompajeiteri.’ Intasoncacoventempiri pitomipee jero pivanquirepee: tirico, ova, quejiquiyetatsiri aisati irishequiacaasanotempiri irijanipee pivacate jeri povishate.
14 Intasoncacoventasanojeitempi panaacojeiteri pashini nampitsipeequiniri. Eiro otimitsi tsinane shiravarotatsine, eiro itimitsi shirampari caari oacantatsine. Aisati inquempetea pivirapee.
15 Eiro ishinecoventimpitsi ompocashijeitempi covencayetatsiri oashinoncantsi quempetarori pineajeitaqueri Egiptoqui. Irintiquea iroashinoncaajeite quisajeitempineri.
16 Ocameetsati pintsoncasanojeiteri nampitsipeequiniri irishinetempiri Avincatsarite Tasorentsi. Eiro catsini pintacoshirearitsi aisati eiro pipincatsatitayetiritsi ijitasorentsitashiyetari, pipeashijeitacari avirori.
17 “Arioyeata pincantajeitaque: ‘Antearoiteitaqueteemi nampitsi, oshequi catsini savicantarori, yanaajeitaquee ainti; ¿Jaoca ancantajeiteriri ajocantajeiteariri?’
18 ¡Eiro pitsaroacaajeitaritsi! Pinquenqueshirejeitajero jaoca icantaqueriri Avincatsarite Tasorentsi savicajeitatsiri Egiptoqui jeri pincatsariventiriri.
19 Aisati aneajeitantacarori covencayetatsiri caari aneapinijeiti. Tempa avirojeitaque neaquerori itasorenca yoimishitoajeitantajeeri Ejiptoqui. Aitaque inquempejeitaqueriri iriori pitsaroacaajeivetacari.
20 Incantacaashireacaajeiteari intsaroashijeitanaquea catsini, irosati intsoncajeitantajeari savicaarantayevetanainchaneri jeri tsitiyevetanainchane.
21 Irotaque nocantasanotantimpiri: Eiro pitsaroacaajeitaritsi. Yora Atasorentsite, Itasorentsitasanotaque catsini, iriotaque carajeitaqueeri.
22 Intsiquero incantaqueri irojocayeteri, eirota intsipaite itsonquitajeitaritsi yoshequiasanojeitanaquecari covencayetatsiri, yatsicajeitimpicari.
23 Iriotaque matacaajeitempirine nampitsipeequiniri pimanajeitanteariri, irosati pintsoncantajeitaqueari.
24 Impoiji irishinejeitempiri ivincatsaritepeeni, eiro ipiacoventanacatsi irosati pintsoncantaqueari, tecatsi quenqueshireacojeitajerine.
25 Irosati pintaitajeitantaqueari ishiacantayetiri ijitasorentsitashiyetaniri. Eiro pineveshireavacaritsi oro jeri plata ipatacacoyetironiri,
26 Eiro catsini paanaqueritsi pivancoqui, itsoncacantajeitimpicari avirori. Tempa
