Deuteronomio 8:1-20
8 “Pimajeitero icantacantiri nocamantaquempiri, pisavicantajeiteari cameetsa aisati pishequiasanojeitantanaqueari; pimanatacoventajeitantearori quipatsi icantasanotaqueriri Tasorentsi intacantajeitaqueerini.
2 Pinquenqueshirejeitajero aquenajeitantapaacarori caaraiteri, quiso yoaquee Avincatsarite Tasorentsi ocarataque 40 osarentsi, iriotacaasanojeitanteeri ampincatsateri. Irotaque ineantantaqueeri aisati iriotacanteeri paita aquenqueshireyetiri, ariorica amoncarajeitaquero icantacantiri, irompa eirorica.
3 Aisati yoashinoncaajeivetaquee aasanojeivetaque atashe. Iro cantaincha ipajeitaqueero maná avajeitacari, caari aneapinijeiti aisati iriori intacantajeitaqueerini. Iriotacantajeiteeri te apaniro oaneante avapinijeitari, irointiquea oaneasanotantatsi icantacantiri Tasorentsi.
4 Ocaravetaca 40 osarentsi aniijeitaque, iro cantaincha te eerejeitanaqueji aitipeequi, aisati te antsoncacojeiteaji aitsaarepee.
5 Pinquenqueshiretasanojeiteri Avincatsarite Tasorentsi; tempa yoametasanotaquee antime cameetsa, iquempetiri atiri iquenquejairi itomi.
6 Pimoncaratasanojeitero meeca icantacantiri aisati pimpincatsajeiteri; pinquearioventasanotero yoametaqueeri.
7 Tempa iriotaque aajeitanaquempine cameetsaiteriqui quipatsi, otimasanoyetapai osantenipee sotoajayetatsiri oirincaiteayetapai aisati toncaaripeequi.
8 Aitaque onintasanoyetapairi tirico, cebada, ova, higuera, shimampiqui, orivo quejiquiyetatsiri jeri pitsi.
9 Anta quipatsiqui tecatsi coiteimoyetapempine. Eiro piquenqueshireyetirotsi poayeteari aisati paitapeerica. Aitaque otimantayetapaarori mapi icanteetiri hierro. Aisati anta toncaaripeequi aitaque paayeterori icanteetiri cobre.
10 Ariorica ontimimotasanojeitanaquempi poajeiteari pinquemapinijeitearica, ocameetsati pincantacojeiteri Atasorentsite: Icameetsati; tempa iriotaque paquempirori quipatsi cameetsaiteri.
Icamantasanotajiri eiro ipeacotantaritsi Tasorentsi.
11 “Queariompia pipeacojeitaricari Avincatsarite Tasorentsi, pincanteani pimoncaratapinijeitero icantacantiri nocamantajeitaquempiri.
12 Aitaque oncanteari poapinijeitea, pinquemapinijeitea aisati pintimantayetearo cameetsayetatsiri pancotsi. Irishequiasanojeitanaque pivacate, povishate, aisati inquempetanaquea oro, plata, paitapeerica pashiyetapempari.
13 -
14 Queariompiyea pishemetimentajeitirocari, pipeacotaricari Avincatsarite Tasorentsi. Tempa iriotaque oimishitoajeitajimpiri anta Egiptoqui iperanajeitanteevetaquempiniri.
15 Aquenajeitantapaacarori antearoite caaraiteri ocovencaitetasanoti, itimasanoyetapai maranque quepiayetatsiri jeri quitoniropee, teenta ontimayetapee nija. Iro cantaincha yora Atasorentsite ishitoaajatacaaquero imperitaqui irajeitantavacari.
16 Aisati ipajeitaqueero maná, caari ineajeiti intacantajeitaqueerini, iriotacaasanojeitanteeri ampincatsateri. Irotaque ineantantaqueeri antimantajeiteari cameetsa aisati ashiretasanojeitantanaqueariri.
17 “Quearioyea, picantashitacari: ‘Oca timimoyetaquenari, narotaque antaveetimentajeitaquerori.’
18 Irointiquea pinquenqueshiretasanoteri Tasorentsisanori Pitasorentsite, iriotaque shintsitacaajeitaquempiri otimimotantayetaquempiri pashiyetacari. Imoncarataquero icantasanotitacariri intacantajeitaqueerini.
19 “Iro cantaincha ariorica pimpeacojeitanajeari, pimpincatsatashiyetanaqueari ijitasorentsitashiyeetari, noncantasanotempi: aitaque intsoncasanojeitajempi.
20 Inquempetaquero nampitsipee pinquenimojeivetanaqueari. Aitaque inquempetacantasanotaquempiri Tasorentsisanori Pitasorentsite, ariorica pimpiatsataqueari.
