Deuteronomio 9:1-29
9 “Pinquemajeite noshanincapee. Irotimataintsi pimonteajeitearo nija Jordán, pimanajeitanteariri nampitsipeequiniri anaacojeitimpiri yoshequiasanojeiti aisati ineaperotasanojeita, antearopee inampi, oshoncayetacaro otantopee irosati jenoqui.
2 Aisati antearitsantsapee inajeiti, iquempejeitacari ishanincapeeni Anac. Tempa piotiro icanteetiri: ‘Tecatsi materine irimanateri ishanincapeeni Anac, antearitsantsayetatsiri.’
3 “Ocameetsati meeca piotasanojeite iriotaque Avincatsarite Tasorentsi ivatanaquempine, inquempetanaquearo paamari tsoncantatsiri. Irotaque panaacojeitanteariri pintsoncasanojeiteri intsipaite; tempa icantasanotitaquempi.
4 Ariorica irimatacaajeitaquempi, eiro picantashijeitatsi: ‘Ariovee imatacaajeitaquee Tasorentsi ipantaqueerori quipatsi; tempa acameetsajeitaque.’ Iro intsoncajeitanteariri, te irineacameetsatacojeiteriji caari cameetsatatsi yantajeitiri.
5 Te iro irimatacantempiri picameetsajeiti, paitajeitanteariri iipatsitepee. Irointi intsonquimentajeiteri caari cameetsatatsi yantayetiri. Irimoncaratajero icantasanotaqueriri intacantajeitaqueeri Abrahamani, Isaacani jeri Jacoboni.
6 Piotasanojeite meeca, te iro pincameetsate impantempirori Avincatsarite Tasorentsi quipatsi cameetsaiteri pisavicantajeitapaajeari. Tempa avirojei piatsari, oshequi catsini piquisoshirejeiti, iro cantaincha ipashitaquempiro.
Ipiatsataca ishanincapeeni Israel toncaariqui Horeb.
(Éxo. 31.18–32.35)
7 “Eiro catsini pipeacojeitarotsi picantimajeitaquerini Avincatsarite Tasorentsi anta caaraiteriqui aponeajeitantajari Egiptoqui. Aitaque picantani picantimajeitaqueri, irosati areejeitantacari aca.
8 Aisati anta toncaariqui Horeb, aitaque piquisacaasanotacariri Tasorentsi, icoasanovetanaca intsoncajeitempime.
9 Irosati notoncantanaca toncaariqui, namacotantacarori mapiqui Icantacantiri ora icantasanotaquempiri. Nosavicaiti 40 quitaiteri aisati 40 tsiteniri, te noimateaji aisati te nireji.
10 Irosati ipacotantaquenaro apicotatequeti mapi isanquenatacotantacarori maaroni icantaqueri anta toncaariqui nianqui paamaritatsiriqui, apatojeitantacari.
11 Avisantanacari 40 quitaiteri aisati 40 tsiteniri ipacotantaquenarori.
12 Irosati icantantajana: ‘Pijate intsipaite, poirincanajea pamenapaajeri pishaninca pamajeivetajari Egiptoqui, impeashijeiteani. Te inquenqueshiretanajeroji irimoncaratero nocantavetaquempiri, yovetsicashitacaro ashiro ijitasorentsitaqueri.’
13 “Icantaquena aisati: ‘Noneajeitaqueri oshequi catsini iquisoshirejeitaque. ¡Aitapaaji meeca pashereaquena! Pishinetena nontsoncajeitajeri, tecatsi quenqueshireacojeitanajerine. Avintiquea, noshequiacaasanotaje pineaperotasanojeitanaquea, panaacotasanojeitajeri.’
14 -
15 “Noirincantapaajarori toncaari otimantacari amorecaintsiri, namacotaquero apicotatequi mapi isanquenatacotantacaarori cantacantiri.
16 Noneantajeitapaaquempiri pantimotanaqueri Tasorentsi caari cameetsatatsi, povetsicashitaca ashiro pishiacantaqueri vacajaniqui. Pipeacojeitanacaro icantavetaquempiri pinquenqueshiretemeri. Irosati nopishonquimotantapaaquempiro apicotatetatsiri mapi, oporocantapaacari.
17 -
18 Impoiji notiyeroashitanacari Tasorentsi noquenquetsatacaajiri. Aisati noquempetajiro nosavicantaitari 40 quitaiteri aisati 40 tsiteniri, te noimateaji aisati te nireji. Irotaque nantaquempiri; tempa pantimotasanojeitaqueri Tasorentsi caari cameetsatatsi, piquisacantacariri.
19 Oshequi notsaroacoventasanotanaquempi iquisantacari, icoavetanaca intsoncajeitempime. Iro cantaincha nocantacoventavajimpi, irosati iquemisantantajana.
20 Aisati iquisasanotanaqueri Aarón, icoasanovetanaca iroamaajerime. Iro cantaincha nocantacoventaqueri iriori.
21 Irosati naantapaacari povetsicavetacari vacajaniqui pantantavetacarori caari cameetsatatsi, nojoquitaquempiri paamariqui. Impoiji notononcavaqueri, irosati nojocavanetantacari nijateniqui quenaatapaatsiri toncaariqui.
22 “Aisati piquempejeitaca anta nampitsipeequi Tabera, Masaa jero Kibrot-hataava, aitaque piquisacaasanotacariri Tasorentsi.
23 Aisati anta Cadés-barneaqui, icantantajeeri ‘Povaajeitanajea pareejeitantearori quipatsi nompempiri.’ Aitaque aisati pipiatsajeitacarori icantacantiri, te pishiretimateariji. Te pincoimateji pinquemisanteri.
24 ¡Aitaque niotacotitaquempini, avirojeitaque piatsatapinitariri Tasorentsi!
25 Icoasanotantavetacari intsoncajeitempime. Notiyeroashitanacari osamani, ocarataque 40 quitaiteri aisati 40 tsiteniri. Nocantasanotiri: ‘Notasorentsite, eirove pitsoncajeitiritsi noshaninca. Tempa iriojeitaque pishanincatacari aisati poipacaacoventajiri poimishitoantajeitajariri Egiptoqui, ponijaasanotaqueri pitasorenca.
26 -
27 Pinquenqueshiretacotajeri quemisantajeitimpiri Abrahamani, Isaacani jeri Jacoboni. Eiro meeca piquenqueshiretacotiritsi iquisoshirejeitaque aisati caari cameetsatatsi yantimovetaquempiri,
28 tecatsiquea incantajeite egiptosati: Yora Tasorentsi, te irimatero irareetacaajeiteari quipatsi icashiacaajeivetacariri. Iroyeata yaantanajariri inquisajeiteri, icoaque iroamaacantajeiteri caaraiteriqui.
29 Tempa iriojeitaque pishanincatacari; irotaque poimishitoantajariri Egiptoqui ponijaasanotaqueri pitasorenca.’
Ipacotantajariri aisati Tasorentsi Moiseshi Icantacantiri
(Éxo. 34.1-10)
