Proverbios 1:1-33
1 Jero icantiri Salomón, itomini David, pincatsariventiriniri ishanincajeitaniri Israel:
2 Icoasanotaque iroametantero iotantsi jero oametantsi,iriotacaajeitanteariri itsipapee ocantayetiri iotiri,
3 iriotantearori oametantsi, inquenqueshiretempa cameetsa,irantero cameetsatatsiri, irineanate tampatica, aisati iraacameetsatante.
4 Irotaque iriotantearori evancaripee caari iotatsi,inquenqueshiretantanaqueari cameetsa.
5 Yora iotatsiri, quenqueshireachari, iquemisantiro icanteetiriri,aiquero iriotasanotanaqueri.
6 Irotaque iriotantearori yoametantiri iotasanotatsiri,aisati ocantayetiri irineane, ishiacaaventayetiri jero neantsipee manachari.
7 Ayotasanotanteari, ocameetsati ajivate ampincatsateri Tasorentsi;yora caari iotatsi te irineacameetsateroji iotantsi aisati oametantsi.Yoametiri Salomón itomi.
8 Aviro notomi, pinquemisantero noametimpiri,aisati eiro pipeacotarotsi oametimpiri piniro.
9 Irotaque oameetsatempineri pisavicanteari cameetsa,oquempeta nenquetsi inenqueyeetari aisati amatseerentsi.
10 Ariorica incoavetea antayetirori caari cameetsatatsi iramatavitempi,¡notomi, eiro pishinetaritsi!
11 Incantempirica: “Pimpoque pincarajeitena;tsame amataviteri caari ioveetatsi, avavaquerita iravisanaquerica.
12 Tsame ampeacaashitearita cameetsajeitatsiri antecatsireavaquerita;anquempetacanteri camatsiri itijeetiri.
13 Impoiji ontimimotasanotee paitapeerica ashitaarantayeteari¡aajaquero avancoqui acoshiyetaqueri!
14 Caate, pincarajeitena antero paitapeerica amayeteri;impoijiquea ampaarantavacayea maaroni aayeteri.”
15 Notomi, ¡Eiro poijatiritsi,pinijantareeri, eiro pantirotsi irantayeteri!
16 Tempa icoashita irantashiyetearo caari cameetsatatsi aisati iroantashiyetea.
17 Atsipetashitaro ariorica avashitiri tsimeeri ario irineaquero;
18 Yora atiripee irisati oashitanontaincha,irashinoncanteari iroyeeteri.
19 Aitaque incantajeiteari yora caari cameetsajeitatsi,incamimentero icoashiyetaniri.Ora iotantsi ocoacairi evancaripee iroijajeitero
20 Ora iotantsi, onijantiro oneane avotsipeequi iquenantapiniyeetari,
21 jero ashitacoropeequi nampitsiaisati jaocarica yapatotapinijeitantari.
22 “¡Avirojei evancaripee caari iotiro cameetsatatsiri, tseencantajeitatsiri, caari iojeitatsi!¿Jaoca oncarate pincoye piojeite,aisati picoasanoti pincantimatante,aisati pitseencajeitero iotantsi?
23 Pinquemisantena noncantimentempiro caari cameetsatatsi,aisati niotacaasanotempiro niotiri aisati noquenqueshiretiri.
24 Nocajemavetaquempi nocoacaavetaquempi, pimpocashitena,iro cantaincha te pincoajeiteji pinquemisantena.
25 Irointi pitseencajeitaquero noamejeivetimpiri,te pincoajeiteji noncantimentempiro pantayetiri.
26 ¡Ari noshirontaquea ariorica omapocaquempi ompomerentsitimojeitempi!¡Aitaque novashiventaaquempi, ariorica pintsaroasanojeitanaque,
27 ariorica omapocajeitaquempi pintsaroajeite aisati neantsiyetatsiri,pinquenqueshireacotashiyetanaquea, aisati poashiretasanojeitanaquea,pinquempetearo antearo tampea apishoirincatsari tsoncantatsiri!
28 Impoiji paventajeivetanaquena,iro cantaincha eiro naquimpitsi;pincoajeivetajena, eiro pineajanatsi;
29 tempa, te pincoajeiteroji iotantsi,te pincoajeiteji pimpincatsateri Tasorentsi.
30 Te pincoajeiteji pinquemisantero nocantajeivetimpiri,aisati pitseencaquero nocantimentavetimpiro pantayetiri.
31 ¡Irotaque pashinoncaimentajeitantearori pantayetiri!¡Ontimasanotanaque picoashiyetari!
32 Yora caari iojeitatsi ompeacaajeiteari, te irioteji;aisati ontsoncajeitajeri caari quenqueshireacha.
33 Irintiquea quemisantajeitenane, irisavicajeite cameetsa,eiro itsaroacaajeitarotsi paitapeerica covencayetatsiri.”
