Proverbios 18:1-24
18 Yora quenqueshireacotachari irisati, icoanontaro irashiteari,aisati te inquemisantantero maaroni cameetsatatsiri icanteevetariri.
2 Yora caari iotatsi te incoyeji iriote;irointi iquempevetacanta ioyeti.
3 Ora caari cameetsatatsi oashiventanti;aisati shemetantsi, eiro opincatsatacanteetsi.
4 Ora irineane iotatsiri iotacanti,oquempetacaro nija saanajatatsiri sotoaajatatsiri.
5 Yora cantacoventantajeitatsiri te oncameetsateji irintacotashiteari cantacaarori,aisati eiro icantiritsi caari anterone: “Eiro namitacotimpitsi.”
6 Yora caari iotatsi irineanatanaquerica, iriotaque poneacantarori yantavacaa;ora icantashiyetari, irisati oashinoncaacantachane.
7 Ora ineaveetashiyetari caari iotatsi, irisati oashinoncaacantajanchane,oquempetaca ishiticatsanotaca irisati.
8 Ora cantacotantsipee oquempevetacaro chochoqui,oshequi icoasanoyeetiro iriniyeetero.
9 Yora perantipee aisati tsoncaarantantayetatsiriishanincatavacaajeitaca.
10 Yora Tasorentsi iquempetacaro pancotsi quisotasanotatsiri,yaventajeitari yora cameetsajeitatsiri, irojocaacoventanteariri.
11 Yora ashitaarantincari ishiretashivetacaro irovaararo ari ojocaacoventaqueri,iquempetacantaquero nampitsi timatsiri antearoite otanto.
12 Yora shemetatsiri irisati oashinoncaacantajanchane;yora caari shemetatsi, irisavique cameetsa.
13 Yora acashitachari tequera inquemisantasanotero icanteetiriri,te irioteji aisati impashiventea.
14 Ora veshireantsi otecatsitacotiri mantsiatatsiri;iro cantaincha yoashiretarica, tecatsi materoni intecatsitacayeri.
15 Yora iotatsiri aisati quenqueshireachariiriotasanotanaquero paitarica icoasanotiri.
16 Ariorica ampashitantea, iraacameetsajeitee ashanincapee aisati pincatsariyetatsiri.
17 Yora jivatatsiri ineaveeti yojocaacoventa, iquempetacantashitaca ocameetsataque icantaqueri;iro cantaincha impocapaaquerica itsipa camantacoterine, irioyeetanaqueri itseeyaca.
18 Ariorica incantacoventante Tasorentsi,iroimajerenteri antavacaajeitachari, irovetsicajeneri maaroni.
19 Opomerentsita irovetsicajeri iquisacaacari ishaninca;anaacotiro nampitsi tantotacotachari,aisati antavacaachari, eiro yaacameetsatavacaajatsi,iquempetacaro onijantayeti tantotsi.
20 Aparopeeni irineero covencatatsiri,irosati aashireantanaqueari paitarica ineanataqueri.
21 Ora aneanayetiri cameetsatatsiri oaneanti,ariorica aneanatero caari cameetsatatsi, oamanti;yora neaveetashitachari oshequi irashinoncaimentearo icantiri.
22 Ayerica ajina, aaquero cameetsatatsiri;irotaque yonijaaqueeri Tasorentsi inintaquee.
23 Yora coiteaveeyetatsiri icoacotanti,yora ashitaarantincari te iraacameetsateri, irointi iquisatsatiri.
24 Ainiro tsipatavacaavetachari intsipaite inquisanajeri;iro cantaincha timatsi quearioventirori itsipavintsatavacaa, iquempetacantaqueri irirentisanori.
