Proverbios 24:1-34
24 Eiro piquisanentiritsi caari cameetsajeitatsi,aisati eiro picoasanotitsi pincarajeiteri;
2 tempa apatiro iquenqueshiretiro iroantashiyetea,aisati iquenquetsatacoyetiro irantero caari cameetsatatsi.
— 20 —
3 Yora iotasanotatsiri yovetsiquiro cameetsa ivanco,iquenqueshiretasanotiro yoatiquiro cameetsa otincamipee oquisotantari,
4 aisati iotasanoti yaanontasanotaro pinatasanoyetachari icoasanoyeetiri.
— 21 —
5 Icameetsati irinti iotatsiri, yanaacotiri shintsitasanovetachari;ocameetsatasanoti iriotasanote, anaacotiro irishintsitasanovetea;
6 tempa ariorica irimanayeetea, irijivate inquenquetsatacaavacaajeitea,aisati inquemisantasanoteri oamejeitiriri iriotacaajeitanteariri iranaacotante.
— 22 —
7 Yora caari iotatsi te irioteji paita incanteri anta cantacoventantatsiriqui;tempa te ontimimoteri iotantsi.
— 23 —
8 Yora quenqueshiretapinitirori iroashinoncante,ari irioyeetanaqueri iriotaque caari cameetsatatsi.
9 Ora icoashiyetari caari iotatsi, irotaque caari cameetsatatsi;¡tecatsi amavetacoterine cantimatantatsiri!
— 24 —
10 Ariorica pincantashirete ompomerentsitimotempi,eiro otimimotanajimpi pishintsire.
— 25 —
11 Poavisaacotacantajeri icantacoventeetiri iroyeeteri,aisati covencatacotatsiri incamanteari, poimpacaacoventajeri.
12 Ariorica pincantavetea: “Te nioteji”;tempa iotaquero yora Amenacoventimpiri piquenqueshiretiri panteri,iriotaque pinajeiterine aparopeeni paitapeerica yantayetiri.
— 26 —
13 Notomi, pantsoteri ija pitsi, ipochajatasanotipineanteari icameetsajatasanotaque.
14 Aitaque onquempetimotempiri iotantsi aisati quenqueshireantsi,ariorica pimataquero, eiro pipeatsi,pintime cameetsa aisati poyeacotaqueri,eiro catsini otsoncatsi.
— 27 —
15 Eiro piquenqueshiretatsi poashinoncayeri cameetsajeitatsiri,aisati eiro picantitaveetiritsi timimoyetiriri ivancoqui.
16 Omavetaquea oncarate 7 pantacaapiniyeveteari, incanteani iranaacotero.Irintiquea yora caari cameetsajeitatsi, irashinoncaasanotea.
— 28 —
17 Eiro piquimoshiretanaquetsi pineeririca quisanentimpiri ompomerentsitimoteari.
18 Tempa yora Tasorentsi eiro ineacameetsatirotsi oca;aisati eiro yoashinoncairitsi iriori.
— 29 —
19 Eiro piquisashiretatsi pineaqueririca caari cameetsajeitatsi,aisati eiro piquisanentimentacotiritsi yashiyetari piatsajeitachari;aisati eiro picoitayetiritsi yantajeitiri.
20 Tempa yora caari cameetsajeitatsi, eiro ineirotsi cameetsatatsiri;tecatsi irimate, iquempetacari tsiorontsi tsivacatsiri.
— 30 —
21 Notomi, pimpincatsateri Tasorentsi aisati pincatsari,eiro picarajeitiritsi quisajeitiriri;
22 tempa irotaintsi iroashinoncayeri Tasorentsi jeri pincatsari,aisati tecatsi ioterone jaoca oncanteari covencatatsiri mapoquerine.Otsipa icantayetiri ioyetatsiri
23 Irosati ocapee icantayetiri ioyetatsiri:Yora cantacoventantatsiri, te oncameetsateji irinashitacayeteari itsipa.
24 Jaanicarica cantacoventerine antirori caari cameetsatatsi, incante: “Tecatsi irantane”,yora savicayetatsiri nampitsipeequi iroamaimajeiteri,aisati yora pashinisatipee intseencajeiteri.
25 Irintiquea oashinoncairiri, yora atiripee irineacameetsajeiteri.
26 Yora acantatsiri cameetsa irisampiyeteririca,iquempetacari tsipavintsatavacaachari.
27 Pijivate poameetsatero ora pipimantayetiri aisati pantaveetasanote poanequi,impoijiquea povetsicanontea pivanco, pisavicanteari cameetsa.
28 Eiro picantacotashiyetaritsi pishaninca tecatsirica irante,aisati eiro pitseeyacotaritsi.
29 Eiro piquenqueshiretirotsi catsini pimpiateari itsipa iquempetaquempi iriori.
30 Aparo quitaiteri nojataque iroanequi perantiaisati noquenanaquero irovamashitequi caari quenqueshireacha.
31 Noneanaquero otimasanotaque quitotseequimashiaisati otantotacovetari mapipee otireayetaque.
32 Noneantacarori, ari noquenqueshireacotanaquero,irosati niotantanacaro noaquero oca oametantsi:
33 Ainiroquera aasanotimpi pivochoquine,pitaapiniti, pisatevacota, pimaasanotantari;
34 irotaintsi omapoquempi tsoncacotantsi,oquempetari quenaquenayetatsiri ivetsica irimanatea.
