Proverbios 25:1-28
25 Jero aisati icantayetiri Salomón, isanquenatacotajiri amitacotiriri Ezequías, pincatsariventajiriri ishanincapeeni Judá.
2 Ampincatsatanteariri Tasorentsi; tempa iotasanoti caari imati atiri iriotero,aisati ampincatsateri pincatsari coasanotatsiri iriotacoteri Tasorentsi.
3 Tecatsi ioterone jaoca ocarati otsantsati jenoqui otimantari inquite aisati otsompoinati quipatsi,aisati oquempeta iquenqueshireantari pincatsari, tecatsi materone iriotero.
4 Yora vetsiquiriri plata, ijivati yojoquiro ivitsivanerepee,impoiji yovetsiquiro iramentotsi.
5 Aisati inquempetea pincatsari, irojoqueri amitacoyevetariri caari cameetsatatsi,incanteani impincatsariventante, aisati incantacoventante cameetsa.
6 Eiro pineaperotimotaritsi pincatsariaisati eiro panaacotiritsi pisavique isavicamentoqui irioperoyetatsiri.
7 Ocameetsati irointi incantempi: “Pimpocanaque aca”,eiro yoashiventantimpitsi pincatsariyetatsiri.
8 Paitapeerica pineayevetaqueari, eiro pishiashitanacaritsi intsipaite cantacoventantatsiri,paamayeari itsipa intseeyacotashitempi, impoiji tecatsi pincantanaqueri avirori.
9 Pojocaacoventempa incantacotashiyeetempirica,iro cantaincha eiro poinijantitacotiritsi imanaqueri itsipa.
10 Jaanicarica quemaquempine, ari iroashiventaaquempi,inquemacoyeetaquempirica, tecatsi pincantacotajea.
11 Ora neantsipee ineanayeetiri intsipaite, amitacotanti;oquempetacaro shiarori chochoqui vetsicachari oro jeri plata.
12 Yora iotatsiri iquenquejanti aisati aavaquerori,oquempetacari aniiyo aisati nenquetsi vetsicachari oro iyoshitachari.
13 Yora camantantatsiri cameetsa, iquimoshiretacairi tianquiriri,iquempetacaro catsincajencaiteri quitaiteriqui osarentsiiteasanotirica, oquimoshiretacanti.
14 Yora cantashitachari: “Nompashitempi”, iro cantaincha te irimatero impashitantea,iquempetacaro mencori tsitenishaatsiri aisati tampea omparianteameri incani,iro cantaincha te omateaji.
15 Ora oyeacotantsi ocatsimareacantiro quisantsi,aisati neantsipee cameetsajencatatsiri oveiro shintsijencatantsi.
16 Ariorica pineaque pitsi ija, eiro patsotasanotiritsi,yashinentanaquempicari picamarancajiricari.
17 Ariorica pinquivanteri pishaninca, eiro pipiashitapinitaritsi;ishemimpicari aisati inquisanentanaquempicari.
18 ¡Yora tseeyacotariri ishanincaiquempetacaro posamentotsi, sataamentotsi aisati tsampitsoaquitasanotatsiri chacopi!
19 Pishiretearirica aacantantatsiri ariorica ompomerentsitimotempi,oquempetaca paniitantacaro aparoni pivori carajatsiri, aisati poantacaro aparo mocatsari paji.
20 Yora pampoyeimotiriri oashiretachari,oquempetaca icachoquitaqueiri ivatsaaro, aisati yaapitsataqueri iitsaare catsincaiteriquii.
21 Ariorica aaqueri quisanentimpiri itashe, pimperi iroyeari;aisati aasanotaqueririca imire, pimperi irireri.
22 Aitaque pincanteriri impashiventantanaqueari,irio Tasorentsi pinatajempirone.
23 Ora tampea quenatsiri quirinca amiro incani,aisati oquempeta neantsipee caari cameetsatatsi, ocatsimavorotacanti.
24 Ocameetsati intime atiri otataroqui pancotsi apaniro,anaacotiro intimantearo antearoite pancotsi irisavicacantearori tsinane quishincaro
25 Ora camantantsi cameetsatasanotatsiri poneachari otsipaqui nampitsi,oimoshirencanti oquempetacaro nija iroaquerajatatsiri irasanotiri miretatsiri.
26 Yora caari timatsi irantane, intsaroacayearirica cantacaarori,iquempetacaro nija sotoaatatsiri quipatsijari.
27 Te oncameetsateji antsoyeteri oshequi ija pitsi,aisati te oncameetsateji ancoye impincatsatashiyeetee.
28 Yora caari iotatsi iraamaventacotea yantashiyetaro paitapeerica,iquempetacaro nampitsi caari tantotacotacha, covencatacotatsiri.
