Proverbios 26:1-28
26 Te omoncaratavacayea catsincaiteri aisati osarentsiqui,aisati ompariye incani yaviitanteetarori oitsoquipee;aisati inquempetea caari iotatsi, te imoncarateari ipincatsayeetiri.
2 Ora oamaimatavacaashitantsi, eiro catsini omata oashinoncante,oquempetacari choriquiti peachariaisati ashivanti caari timatsi imenco.
3 Yora cavaayo ipasayeetiri, aisati aashino ishiticavontsoyeetiri inquemisantanteari;irintiquea caari iotatsi, ocameetsati impasayeeteri.
4 Yora caari iotatsi, eiro paquiritsi,piquempetaricari avirori.
5 Yora aquiriri caari iotatsi, ishiavetacari jaoca icanta.
6 Yora tianquiriri caari iotatsi incamantante,oquempeta itoyetiro iitipee aisati icoayetiro neantsipee.
7 Yora mayejaari eiro imatirotsi irijate areejiqui,aisati caari iotatsi, eiro imatirotsi yoametantiri iotatsiri.
8 Antsipetashitearo ampincatsateri caari iotatsi,oquempeta atsipetashitaro ashitiquiro mapi varacatsaqui.
9 Yora shinquitincari eiro iquemiro onquenteri totseequi,aisati caari iotatsi, eiro imatirotsi inquemero icantiriri iotatsiri.
10 Yora manatirori chacopi quentashitariri maaroni avisayetatsiri,iquempetacari antaveetacairiri caari iotatsi ivancoqui.
11 Yora otsiti yoipiaro iyamarancaro,aisati iriori caari iotatsi, yapiitapinitiro caari cameetsatatsi.
12 Yora caari iotatsi yanaacotiri yora jitacantashitachari ioti.
13 Yora peranti te incoyeji irantaveete, icantashiyeta:“Anta avotsiqui timatsi anteariite maniti, yoyeaquena.”
14 Yora peranti inicacota imaamentoqui,iquempetacaro shevatacaarori ashitacorontsi, ocantani opiapiata.
15 Yora peranti yajiricavetaro yoantari,iro cantaincha eiro imatirotsi iroanquero iraco iroanteari.
16 Yora peranti ijitacantashiveta iotasanoti,yanaacotaqueri caratatsiri 7 iojeitatsiri yaquiro sampitantsi.
17 Ariorica irantavacaajeitea irancapaaquerica pashini,iquempetacari ajiriquiriri otsiti iyempitaqui.
18 Yora amatavitiriri itsipavintsatari, impoiji icanti: “Irointi nantavintsatimpi”,iquempeta shinquiventicari pishonquirori chacopipee amorecatsiri oamantatsiri.
19 -
20 Eirorica otimitsi tsitsi, otsivaqui paamari,aisati eirorica otimitsi cantantsiyetatsiri, ompeanaquea antavacantsi.
21 Ontimerica tsimenquito, irotaque ontimanteari paamari;ora inchajempequi irotaque amorecanteari;aisati ontimanteari antavacantsi, intimerica quishincari.
22 Ora cantacotantsipee, oquempevetacaro chochoqui,oshequi icoasanoyeetiro iriniyeetero.
23 Yora neanavetachari cameetsajenca, iro cantaincha icoaque iramatavitante,iquempetacari chomo yovichaacotanteetarori plata.
24 Yora quisanentantatsiri imaniro ariorica ineanati,iro cantaincha timatsi iquenqueshiretiri iranteri caari cameetsatatsi.
25 Eiro piquemisantiritsi ariorica ineanatimpi cameetsa;tempa ora iquenqueshiretiri iyoshitaca caari cameetsatatsi.
26 Omavetaquea irimanavetearo iquisa,iro cantaincha ari irioyeetaquero iranteri caari cameetsatatsi.
27 Yora quianaterone omoro, irisati tetajearone,aisati titiyeroneri antearo mapi, irisati ompichaaje.
28 Yora tseeyari te irineacameetsatero queariotasanotatsiri;aisati neanavetachari cameetsajenca, iponeacantaro eiro isaviquitsi cameetsa.
