Proverbios 28:1-28
28 Yora caari cameetsatatsi ishiashita tecatsi oijanavetearine;irintiquea cameetsajeitatsiri ineaperota, iquempetacari anteariite maniti.
2 Teerica irisavicajeite cameetsa atiripee,aiquero yoshequiashitanacari pincatsariyevetachari;irintiquea pincatsariventantatsiri cameetsa, ioti isavicacanti cameetsa.
3 Yora caari cameetsatatsi oashinoncairiri coiteaveetatsiri;iquempetacaro antearo incani tsonquirori panquirentsipee.
4 Yora jocajirori icantacantiri Tasorentsi, iveshireimentari yora caari cameetsatatsi;irintiquea yora moncarajeitirori, iquisanentaqueri.
5 Yora caari cameetsajeitatsi te irioteroji catsini cameetsayetatsiri;irintiquea pincatsatiriri Tasorentsi, iotasanotiro maaroni.
6 Ocameetsatasanoti eiro ashitaarantatsi, irointiquea ancameetsate,ashitaarantavetearica, irointi antashiyetearo paitapeerica.
7 Yora moncaratirori icantacantiri Tasorentsi, iriotaque evancari quenqueshireachari;irintiquea caratiriri oashentipee, yoashiventairi iriri.
8 Yora oanairori ovinaro yashiyetari,impioteneri neshinoncatiriri coiteaveetatsiri.
9 Itimirica caari quemisantiro icantacantiri Tasorentsi,aisati iriori eiro iquemisantirotsi iquenquetsatacaavetariri.
10 Yora caari cameetsatatsi antacairiri cameetsajeitatsiri caari cameetsatatsi,irisati oashinoncaajanchane;irintiquea caari timatsi irantane, irineero cameetsatatsiri.
11 Yora ashitaarantincari ijitacantashitaca iotasanoti;irintiquea yora caari ashitaarantacha quenqueshireachari,ario iriotacotaqueri jaoca icantari.
12 Ariorica iranaacotante cameetsajeitatsiri, inquimoshiretasanojeite;ariorica iranaacotante caari cameetsajeitatsi, irimanapitsajeiteari atiri.
13 Yora manacotirori irantane, eiro itimitsi cameetsa;irintiquea camantacotirori, irojocanajerorica, impeacoyeetajeneri.
14 Inquimoshirete atiri pincatsatapinitiriri Tasorentsi;irintiquea quisoshiretatsiri, irashinoncayempa.
15 Yora caari cameetsatatsi pincatsariventirori nampitsi, itimajeitinta coiteaveeyetatsiri,iquempetacari anteariiti maniti amoroatsiri, terica meeni covencatatsiri.
16 Yora pincatsariventantatsiri caari quenqueshireatsa cameetsa, aiquero ijatatii yoashinoncanti;irintiquea caari neveyetaro paitapeerica, osamani intime.
17 Yora oantatsiri tecatsi intacotearine,aitaque iroyeetajeri iriori.
18 Yora savicatsiri cameetsa, tecatsi incanteeteri;irintiquea caari cameetsatatsi, irashinoncayea.
19 Yora antaveetatsiri ontimimotasanoteri iroyeari;irintiquea caratiriri peranti, incanteani oncoiteimoteri.
20 Yora cameetsatatsiri iriveshireimenteeteari;irintiquea coasanotirori irashitaarantea, iroashinonqueeteri.
21 Te oncameetsateji pinashitacantea;yora aantariri ishaninca capichaji, yantaquero caari cameetsatatsi.
22 Yora coanontarori irisati, ishintsiventiro irashitaarantanteari;iro cantaincha te irioteji omapoqueri coajica oncoiteimoteri.
23 Coajica pineacameetsatanajeri cantimentimpirori pantane,iranaacoteri yora cantimpiri: “Picameetsati.”
24 Yora coshitiriri ashitariri, aisati cantatsiri: “Tecatsi nante”,iriotaque tsipavintsatariri oantajeitatsiri.
25 Yora coasanotashiyetarori paitapeerica, iriotaque intacantarori yantavacaa;irintiquea shiretariri Tasorentsi, irisavique cameetsa.
26 Yora caari iotatsi ishemetimentiro iquenqueshireashiyetari;irintiquea iotasanotirori yantiri, tecatsi avishimoterine.
27 Yora amitacotiriri coiteaveetatsiri, tecatsi coiteimotearine;irintiquea caari amitacoterine, oshequi incantimayeeteri.
28 Ariorica iranaacotante caari cameetsajeitatsi, irimanapitsajeiteari atiri;ariorica incamajeitaque, impincatsariventante cameetsajeitatsiri.
