Proverbios 3:1-35
3 Notomi, eiro pipeacotarotsi noametaquempiri,pinquenqueshiretasanotero nocantacantiri;
2 irotaque paneanteari osamani,aisati pinquimoshiretasanote cameetsa.
3 Eiro catsini pipeacotarotsi pinintanti aisati queariotasanotatsiri,quiso poyero, pinquenqueshiretero,pinquempetacantero nenquetsiqui.
4 Irotaque irineacameetsatantempiri Tasorentsi,aisati iraacameetsatempi atiripee.
5 Pishiretasanoteari Tasorentsi,eiro piquenqueshireashitarotsi piotiri.
6 Pincantapiniteri Tasorentsi paitapeerica pantayeteri,iriotaque matacayempirone cameetsatatsiri.
7 Eiro pijitashitatsi avirori piotasanoti;pimpincatsateri Tasorentsi,pojocajero caari cameetsatatsi.
8 ¡Irotaque quempetarori aavintarontsi cameetsatatsiri,pishintsitantajeari pivatsapeequi!
9 Pimpincatsateri Tasorentsi, pimpaaranteri timimoyetimpiri,aisati jivayetatsiri oitsoquiyeti pivanquirepee;
10 aitaque ojaasanotanaquea piquempoyeantaroriqui,aisati pijantarori ovaja.
11 Notomi, eiro piquisoshiretitsi iroametempirica Tasorentsi,aisati eiro pishemashireatsi iroashinoncayempirica.
12 Tempa yora Tasorentsi yoametiri inintiri,iquempeta atiri yoametiri itomi inintasanotiri.
13 Inquimoshirete iotatsiri,aisati quenqueshireachari cameetsa.
14 Tempa ocameetsatasanoti, anaacotiri plata,aisati omatacaasanotanti cameetsatatsiri anaacotiri oro.
15 Ora iotantsi ocoasanota catsini, anaacotiro mapiquipee pinatasanoyevetachari.¡Tecatsi quempetearone paitapeerica icoasanoyeevetari!
16 Ora iotantsi oneacantiro osamani aneantsi,aisati ashitaarantacanta jero opincatsatacanti.
17 Ancoasanoterorica iotantsi, oimoshirencanti;anquemisanterorica, irotaque asavicanteari cameetsa.
18 Ora iotantsi irotaque oaneajerine coasanotirori,inquimoshirejeite quiso oaquerori.
19 Otimimotasanoti iotantari Tasorentsi aisati iquenqueshireantari,imatantacarori yovetsicaquero inquite, quipatsi,
20 aisati inashitacantacarori incajare,jero otimantanacari mencorijenca cajashiiteatsiri.
21 Notomi, pincanteani pincoyero cameetsatatsiri,eiro pipeacotarotsi pinquenqueshiretasanotea cameetsa.
22 Irotaque oaneajempine pisavicanteari cameetsa,oquempetacaro nenquetsiqui.
23 Jaocapeerica pijayeteri, tecatsi paamaquea,eiro catsini pantiro caari cameetsatatsi.
24 Ariorica pimacore, eiro pitsaroitsi,aisati pimaye cameetsa.
25 Eiro pitsaroacaarotsi covencatatsiri mapocantatsiri,aisati oashinoncantsi pocashiterineri caari cameetsajeitatsi.
26 Iriotaque Tasorentsi matacayempine pishiretasanotanteariri aisati jocaacoventempine,eiro yamataviyeetantimpitsi.
27 Eiro catsini pitsaneapitsataritsi paitarica coacotempine timimotimpiri,ocameetsati pamitacoteri.
28 Eiro picantitsi: “Osaitequera namitacotempi”.Pamitacotiteari intsipaite.
29 Eiro piquenqueshireatsi poashinoncayeri pishaninca saviquimotimpiri, neacameetsatimpiri.
30 Te oncameetsate pantantashiyetea,tecatsirica antanatempine.
31 Eiro piquisanentimentiritsi yantayetiri caari cameetsatatsi,aisati eiro pinquempetaritsi avirori.
32 Te irineacameetsateriji Tasorentsi ishanincapee caari cameetsajeitatsi;irintiquea ineacameetsatiri cameetsajeitatsiri.
33 Yora Tasorentsi yoashinoncairi caari cameetsatatsi aisati icarajeitiri;irintiquea cameetsatatsiri, itasoncacoventiri.
34 Ishirontimentari Tasorentsi yora shirontimentantachari;irintiquea caari shemejeitatsi, icavintsairi.
35 Yora iotatsiri, ineacameetsayeetiri aisati ipincatsayeetiri;irintiquea caari iotatsi, irisati manintacantachane eiro ipincatsayeetiri.
