Proverbios 7:1-27
7 Notomi, pinquemisantero noneane,pinquenqueshiretasanotero nocantacantiri.
2 Pinquemisantero nocantacantiri aisati noametantiri,pishentero, pinquempetacantero poqui picavintsairo, irotaque paneasanotanteari.
3 Poisotacotearo pitsapaquiqui,pincanteani pinquenqueshiretero.
4 Pincoasanotero iotantsi, pinquempetacantero pitsiro;aisati quenqueshireantsi, pinquempetacantero pitsipavintsatari.
5 Irotaque jocaacoventempineeiro amatavitantimpitsi tsinane aimentariri ojime,aisati ashinentsi neanavetachari cameetsa.
6 Ari aparo quitaiteri nosaviqui novancoqui,namenacoyeti omoroqui
7 noneaqueri evancaripee caari quenqueshireacha,namenavaqueri aparoni caari quenqueshireasanotacha catsini.
8 Iquempejitantapaacarori osorinaqui avotsi, yavisanaque intatiquero,irosati iquenantanaca ovancoqui ora tsinane.
9 Aitaque tsitenijencaiteanaji,
10 irosati osotoantanaca tsinane intsipaite,ontonquiotantavaqueariri.Oanenquimentanacaro antashiyetantariri shirampari,
11 ocoashita irineveyeetearo,te oncoyeji osavicasanote ovancoqui;
12 irointi oquenaquenayeti nampitsiqui nianqui, aisati osorinaquiyetapaaque,oyeayetiri shirampari avisayetatsiri, aavaqueri.
13 Ari avitsanotavaqueri evancari, onintavorotaqueri,amenasanotaqueri ivoroqui, ocantiri:
14 “Nocantitaca nontayeri novira aacameetsatavacanteari,meeca nomoncarataquero nocantaqueri.
15 Irotaque meeca nopocantacari noneavaquempi.¡Oshequi nocoiteasanotaquempi, meecaquea noneajimpi!
16 Anta nomainta noameetsatanaquero nomaamento,cameetsamaotasanotatsiri poneachari Egiptoqui;
17 nosaitantayetaro casancajayetatsiri,mirra, áloe jero metaqui.
18 Tsame anintavacayea aisati aneavintsatavacayea,irosati onquitaiteantanajea.
19 Tempa yora nojime te irisavique, ijati iquivanti,
20 yaanaque oshequi quireequi;eiro ipoquitajatsi irosati isoquijantapaajea cashiri.”
21 Ari iquemisantaquero ocantayetaqueriri,oameetsantaqueri onevetacantacariri.
22 Irosati yoijatantanacaro,iquempetacari vaca yayeetiri iroanteeteaririaisati maniro aavaqueri oashirentsi,
23 impoiji inquenteeteri irasancanequi chacopiqui;aisati iquempetacari tsimeeri airi charija;te irioteji ari incamaque.
24 Irotaque nocantantimpiri notomi, pinquemisantena,pinquemisantero noametimpiri.
25 Eiro catsini piquenqueshiretirotsipijatashitero tsinane, opeacaimpicari.
26 Tempa oshequi oamaajeitaqueri antayetirori,aisati oshequi catsini oashinoncacantaqueri.
27 Ariorica poijatanaquero ovancoqui;oquempetaca pijataque caamanentsiqui.
