Proverbios 8:1-36
8 Ora iotantsi ocajemasanoti catsini,aisati quenqueshireantsi onijantiro oneane.
2 Otimi jenoqui toncaariqui aisati nianqui avotsiqui,
3 aitaque iquemeetirori iqueantapiniyeetaroriqui nampitsi:
4 “Avirojei atiri, noquenquetsatacairi.
5 Evancaripee, caari iotatsi aisati caari quenqueshireacha,¡pincoasanote pinquenqueshiretea,aisati piotero cameetsatatsiri!
6 Pinquemisantavaquero noncantempiricameetsatasanotatsiri aisati queariotasanotatsiri.
7 Ora noncanteri, queario oni;te noncoye noneanatero tseeyantsi.
8 Maaroni nocantiri ocameetsatasanoti;te aneimateroji amatavitantsi.
9 Yora quenqueshireachari aisati iotatsirioconijatimotiri noneane aisati ocameetsatimotiri.
10 Picoavetari plata aisati oro ioshitachari,Pincoasanojeitero irointi oametantsi aisati iotantsi.”
11 Ocameetsatasanoti irointi iotantsi,anaacotiro mapiquipee pinatasanoyevetachari;tecatsi quempetearone.
12 “Naro iotantsi, nocaratiro quenqueshiretantsi,niotiro noametantiro cameetsatasanotatsiri.
13 Ampincatsateririca Tasorentsi, aquisaquero caari cameetsayetatsi.Noquisaquero shemetantsi, ora jitacantashitantsi,aisati caari cameetsatatsi jero amatavitantsi.
14 Naro quenqueshiretirori nantayetiri aisati nomatasanotiro;narotaque ashitarori quenqueshireantsi cameetsa, aisati shintsitantsi.
15 Naro matacairiri pincatsariyetatsiri aisatijivatacantayetatsiri incantacoventanti cameetsa.
16 Naro matacairiri pincatsariyetatsiri ipincatsariventantiaisati incantacoventanti, cameetsa jivatacantatsiri.
17 Nonintiri maaroni nintanariaisati coasanotatsiri irineena, aitaque irineaquena.
18 Naro ashitaarantacantachari aisati nopincatsatacanti,ineacameetsatavacanteetari aisati cameetsa isavicanteetari.
19 Ora nopantiri ocameetsatasanoti catsini,anaacotiri oro aisati plata ioshitasanovetachari.
20 Nosaviqui cameetsa aisati otampaticati nantayetiri
21 Yora nintanari nompaaranteri iriori,ojaasanotanaquea ivancoqui cameetsayetatsiri.
22 Narotaque intacari yovetsicaquena Tasorentsi,tequeratani irintearo maaroni,
23 yovetsiquitaquena tequerani irovetsiquero quipatsi.
24 Itimacaitaquena tequerani ontimeni antearo incajarepeeaisati nijapee jero sotoaajayetanaintsiri.
25 Tequeratani irovetsiquero otishipee aisati toncaaripee,itimacaitaquena Tasorentsi;
26 aisati tequerani yovetsiqueroni quipatsi,aisati shiocayetatsiri jero quipatsitanaintsiri.
27 Noneaquero iquisotacaaquero inquitequioquempetaca osavicantacaro antearoite incajare.
28 Yovetsicantacarori mencoripee inquitequiniri,aisati yoaquero incajare saanajatatsiri,
29 icantantacarori jaoca ovecarayeteari,eiro oquenaajatashiyetantanacatsi,aisati yoantacarori quisotacairori quipatsi.
30 Nocantani quiso noaqueri, aisati nocantani noimoshirenquiri,aisati ineaquena noneatsatimentaro maaroni quitaiteripee.
31 Noneatsatimentacaro maaroni yovetsicaqueri,aisati noquimoshireventaqueri atiri.
32 Notomipee, meeca pinquemisantena;nocoi pinquempetena avirori, irotaque pinquimoshirejeitanteari.
33 Pinquemisantajeitero camantantsi,eiro picantajeititsi: ‘Te noncoyeroji iotantsi.’
34 Inquimoshirete quemisantenaneri,incanteani iraamaventempa maaroni quitaiteripeequi, impocapiniterica novancoqui.
35 Yora iotajenaneri, aitaque irineaquero aneantsi,aisati irineacameetsateri Tasorentsi;
36 iro cantaincha yora nijantareanajenaneri, irineero covencayetatsiri,¡Yora quisanari, inintaquero caamanentsi!”
