Salmos 105:1-45
105 Pimpasonquijeiteri Tasorentsi,pincantajeiteri atiripee icameetsataque;pincamantajeiteri imayetaqueri.
2 Pimpampoyeeneri pampoyeantsipee pimpincatsateri,pinquenquetsatacotero maaroni yantayetaqueri.
3 Pineacameetsatasanoteri Tasorentsi, icameetsatasanotaque.Avirojei aventajeitariri Tasorentsi, piveshireimentasanoteari.
4 Paventajeiteari Tasorentsi, timatsi itasorenca.Pincanteani paventapinijeiteari.
5 Avirojei ishanincajeitaniri Abrahamani, quemisantiriri,aisati ishanincajeitaniri Jacoboni, icoyeajeitaqueri,pinquenqueshirejeitero maaroni caari aneapinijeiti imayetaqueri,aisati icantacantaqueri icamantajeitaqueeri.
6 -
7 Yora Tasorentsisanori, iriotaque Atasorentsite,pincatsariventirori maaroni quipatsi.
8 Ariorica ompeeranitasanovetanaquea,eiro ipeacotarotsi icaratantacariri Abrahamani,aisati icantasanotaqueriri Isaacani,
9 -
10 aisati iquearioventaqueneri Israel,oncanteani ontime.
11 Icantantacariri:“Nompajeitempiro quipatsi Canaánnocashiacaaquempiri, pisavicajeitanteari.”
12 Te irishequitasanoveteani,iquempevetaca pashinisati inajeitaque.
13 Icantani ijayetaque aparopeequi nampitsi.
14 Te irishinecoventeriji Tasorentsi iroashinoncayeeteri,irointi icantacoventaqueri pincatsaripeequi.
15 Incantiri: “Eiro pantiritsi nocoyeanepee aisatieiro poashinoncaajeitiritsi camantacotanari.”
16 Aisati icantacantaquero otashentsiiteanaque quipatsiqui Canaán, tecatsi iroajeitajeari.
17 Iro cantaincha itianquitacari José ijivatanaque,ipimantaqueri irirentipee iromperanayeetanteariri.
18 Yachacanteetacari iitiqui carenatsa,aisati yashitacoyeetaqueri ashirotatsiriqui, yoiminqueetaqueri,
19 irosati omoncaratantaca icamantitacari José;iotacaaqueriri Tasorentsi oqueariotasanotaque irineane.
20 Yora pincatsari, pincatsariventiriri oshequi atiripee, yoimisoquijacantajiri.
21 Ipeajiri amitacotiriri aisati amenacanterine maaroni ishanincapee
22 aisati iroamejeiteri amitacoyetiririjeri jivatacantayetatsiri iriojeitanteari.
23 Impoiji ijatanaque iriori intacantaqueerini Israel, pajitachari aisati Jacobo,pashinisati inaque anta Egiptoqui,isavicaque iipatsitequi ishanincapeeni Cam.
24 Yoshequiacaasanotaqueri catsini Tasorentsi ishanincajeitajari;ineaperotasanojeitaca, yanaacojeitaqueri egiptosati.
25 Iro cantaincha icantacashireacaajeitacari egiptosati,iquisajeitantacariri ishanincajeitajari Tasorentsi,aisati yamatavitaqueri yora quemisantaqueriri.
26 Impoiji Tasorentsi itiancaqueri Moiseshini, quemisantiririaisati Aarón, yora icoyeaqueri.
27 Imatacaasanotaqueri yonijaaqueri itasorenca anta caaraiteriqui;¡aisati caari ineapinijeiti iipatsitequi ishanincapeeni Cam!
28 Itiancaquero Tasorentsi tsiteniri apataanaca maaroni.Iro cantaincha egiptosati te inquemisantajeiteroji irineane.
29 Ipeaquero irajantsi nija, icamajeitanaque shimapee.
30 Yoshequiacaasanotaqueri mashero,iqueaquero irosati ivancoqui pincatsari tsompoina.
31 Ineanataque Tasorentsi, itimasanotanaque Egiptoqui shimpoquipee aisati shineequipee.
32 Itiancaquero iriniqui,opariaque oquempevetacaro incani,aisati paamari, otsoteaquero iipatsite.
33 Otsoncapaaquero irovamashitepee, panquirentsi higuerajero inchatomashipee egiptoquiniri.
34 Ineanataque aisati Tasorentsi, itimanaque tsinaripee;oshequi catsini inajeitaque, tecatsi materine irioyeeteri.
35 Itsoncapaaquero inchatoshipee aisati maaroni panquirentsipee.
36 Anta Egiptoqui yoamaitajeitaqueri itomipee maaroni jivayetatsiri itimi.
37 Yoimishitoajeitaqueri Tasorentsi ishanincajeitaniri Israel,yaajeitanajiri oshequi catsini oroaisati quireequi ipayetavaqueriri,tecatsi aajeitavajerine.
38 Yora egiptosati iquimoshireventajeitavajiri ineavajiri ijajeitanaji;tempa oshequi itsaroasanojeitaque catsini.
39 Yoaquero Tasorentsi mencori manavaqueririaisati paamaritatsiri tsiotacojeitaqueriri tsiteniriqui.
40 Icoacojeitaqueri iroyeari,ari itiancaqueneri contonapeeaisati maná poneachari inquitequi, iquemajeitacari.
41 Icotareaquero imperita, ocontejatanaque nija,oquenaajatanaque caaraiteriqui oquempetacaro antearoja nija.
42 Iquenqueshireaquero cameetsatasanotatsiriicantasanotaqueriri Abrahamani yora quemisantiriri.
43 Aitaque ocantacari yaajeitanajiri Tasorentsi icoyeanepee,icajemajeitanaque iquimoshiretasanojeitanaque.
44 Ipajeitaqueri iipatsitepeeni itsipapee atiri aisati ivanquirepee,
45 irotaque inquemisantajeitantearori, icantacantiri Tasorentsi,aisati irimoncarajeitantearori yoamejeitaqueriri.¡Icameetsataque Tasorentsi!
