Salmos 35:1-28
(Ivampoyeane David)
35 Tasorentsi, pimpiateari yora piatanari.Poasanquetayeri yora manajeitanari.
2 Payero ashiromeronta pojocaacoventena,caate pamitacotena.
3 Pajiriquero pisataamento,pimpiateari oijanajeitaquenari.¡Pincantena: “Naro oavisaacotempine!”
4 Nocoi impashiventajeitanaquea, irishiajeitanaquecoajeitatsiri iroyena,aisati coatsiri iroashinoncayena.
5 ¡Irojoqueri inampire Tasorentsi,inquempetacanteri casaveshipee oaraayetiro tampea!
6 ¡Iroijanatanaqueri inampire Tasorentsi,onquempetimotanaqueri ontsitenishaanaque iravoqui,aisati oncarentsaiteanaque!
7 Tecatsi nantavetea, yoashiveetashitaquena oashirentsi,aisati iquiacashitaca omoro nomparianteari.
8 ¡Omapoquerita oashinoncantsi!¡Impariantajeitajearota yoashitashitacari,irashinoncaajeiteata!
9 Irosati nonquimoshireventantaqueri Tasorentsi;tempa yoavisaacotaquena.
10 Noncantasanote:“¿Jaanica quempetimpiri, Notasorentsite?Maaroni caari otimimoti paitapeerica, aisati coiteaveetatsiri,pojocaacoventiri anaacojeivetacariri aisati peranajeivetacariri.”
11 Icantacotashitaquena caari cameetsajeitatsiaisati isampitashitanaro paitapeerica caari niotacoti.
12 Yoashinoncaashitaquena naacameetsavetari,irotaque oca oashiretacaasanotanari.
13 Ariorica imantsiajeiti iriori,oshequi noashiretaconentari,noquitsaataro tontamaori, aisati te noyeaji;nocantani namanashiretacoventiri.
14 Oshequi noashiretapinitaca, nomaoshiretaque;noquempetacantaqueri iroorica camatsine ina, nirenti aisati notsipavintsatari.
15 Iro cantaincha nashinoncantacari,oshequi ishirontimentajeitaquena;aisati iriori pashinisati atiripee caari noneapiniti,icantani yoashinoncaapinitaquena.
16 Ineacatsitacaaquena, yantavintsanajeitaquena,yamenajeitaquena icatsimajaquitaque.
17 Notasorentsite, ¿jaoca oncarate osamanite pineashiteari?¡Poavisaacotena, eiro yoantanatsi quisajeitaquenariquempetariri anteariite maniti iquenayeti yamoroi!
18 Nompasonquitempi, inquemena pishanincajeitajari apatojeitainchari.¡Noncantacotempi: Icameetsatasanoti Tasorentsi!
19 Te noncoyeji inquimoshireventena quisajeitanari.Aisati te noncoyeji intamacoreavacayea quisashitanari.
20 Tempa te incoyeji irisavicajeite cameetsa,irointi iquenqueshiretiro irantashiyetearoiroashinoncanteariri savicavetachari cameetsa iipatsitequi.
21 Antearojenca icantacotashitaquena:“¡Pamene, noneajeitaquempi pantaquerocaari cameetsatatsi!”
22 ¡Aviroquea, Notasorentsite, iotirori maaroni!¡Eiro pimajeretitsi! ¡Aisati eiro pojocanatsi!
23 Pishintsite, Notasorentsite, pamitacotenapincantacoventena cameetsa.
24 Pincantacoventena, Notasorentsite;tempa pitampaticatasanoti.¡Eiro pishinetiritsi quisajeitanari irishirontimentena!
25 Eiro inquenqueshireantatsi aisati incante:“¡Amataqueri atsoncasanotaqueri; irotaque acoajeitiri!”
26 Impashiventasanojeitanaqueataquimoshireventajeitirori pomerentsitimotaquenari,aisati jitacantashitachari yanaacotaquena.
27 Iro cantaincha incajemajeiteta,inquimoshirejeite irinti coasanotatsiri irineena nanaacotante;incantapinijeite:“¡Yora Tasorentsi ipincatsaritasanoti,onimotaqueri irisavique cameetsa quemisantiriri!”
28 Nonquenquetsatacotero cameetsatatsiri pantayetaqueri.¡Maaroni quitaiteripeequi noncantacotempi: Picameetsati!
