Salmos 39:1-13
(Ivampoyeane David)
39 Nocantasanotaque: “Naamaventacotea narosati,eiro noneanatantaro caari cameetsayetatsi,noimajerentero novanteainiroquera nocarajeiteri caari cameetsajeitatsi.”
2 Noquempetacantaca masonti, tecatsi noneanataque.¡Te catsini noneanatantearo cameetsatatsiri!Iro cantaincha aiquero ocatsitimotanaitiana.
3 ¡Ocatsitaquena nasancanequi!Ariorica noquenqueshiretacota,aiquero ocatsitimotasanotaquenari,irosati nocajemasanotantanaca. Nocanti:
4 “Notasorentsite, piotacayena jaoca noncanteari noncame,aisati jaoca oncarate osarentsi nanee;niotasanotantearori iotantsi.
5 Tempa poaneaquena capichaji,pineaquero avinti eiro osamanititsi;intsipaite incamajeite atiri,iquempetacaro yanenquirica.
6 Maaroni atiripee iquempejeitacaro tsimancaiteri,Yatsipetashitaro yoshequiiro irovaararo,te irioteji jaanica aitajerineri.
7 Aitaque ocantari, Notasorentsite,¿paita meeca noyeacoteri?¡Avirotaque noyeacoteri avinti!
8 Poipacaacoventena nantayetiri caari cameetsayetatsi;eiro pishinetiri caari iotatsi intseequimatena.
9 Noquempetacari masonti, te noneaveeteji;tempa avirotaque shinetanari nashinoncayea.
10 Aitapaaque poashinoncaaquena, poamaanacari.
11 Poametiri atiri, poashinoncaimentiri yantaqueri,aisati pipeiro icoasanoyevetari.¡Maaroni atiripee te inquisojeite,iquempetacaro yanenqui!
12 Notasorentsite, pinquemero noquenquetsatacaimpiri,eiro piquemashitanatsi nocavintsaa;¡aisati eiro pimajeretashitatsi ariorica niraa!Tempa noquempetimotaquempi pashinisatiaisati tsimeeri avisatsiri intsipaite;noquempetacari intacantaquenaniri.
13 Eiro pamenanatsi catsima;pishinetena nomacoreaje capichaji tequerata noncame.”
